ສຸກອາພອນ ພິກວິກິດເປັນໂອກາດໃຊ້ເວລາພັກຮັກສາຮ່າງກາຍ ກ່ອນກັບມາຊ້ອມໃຫຍ່ກາງເດືອນໜ້າ

794

ສຸກອາພອນ ວົງຈຽງຄໍາ ກອງໜ້າທີມຊາດລາວ ເປີດເຜີຍກັບ ທີມຂ່າວພວກເຮົາວ່າ: ນັບແຕ່ຕົ້ນປີ 2020 ການແຂ່ງຂັນບານເຕະໃນລີກຕ່າງໆທົ່ວໂລກ ໄດ້ຮັບຜົນກະທົບຈາກການແຜ່ລະບາດຂອງ ໂຄວິດ-19 ຈົນເຖິງໄດ້ຢຸດການແຂ່ງຂັນໄວ້ຊົ່ວຄາວ. ສໍາລັບ ຂ້ອຍເອງ ກໍບໍ່ໄດ້ໃຊ້ເວລາພັກການແຂ່ງຂັນໃຫ້ເສຍໄປລ້າ ດ້ວຍການຊ້ອມປົກກະຕິດ້ວຍຕົວເອງ ຈົນມາຮອດປັດຈຸບັນ ເພື່ອຮັກສາຮ່າງກາຍໃຫ້ພ້ອມຢູ່ສະເໝີ ກ່ອນທີ່ໃນວັນທີ 15 ມິຖຸນາ 2020 ຄະນະຄູຝຶກ ແລະ ນັກເຕະຂອງ ປຣະຈວບ ເອັຟຊີ ຈະກັບມາຊ້ອມຮ່ວມກັນອີກຄັ້ງຢ່າງເປັນທາງການ.

“ ໄລຍະກັກຕົວຈາກ ໂຄວິດ-19 ຂ້າພະເຈົ້າກໍເນັ້ນຮັກສາສະພາບຮ່າງກາຍເປັນຕົ້ນແມ່ນ ໄປແລ່ນອາທິດໜຶ່ງ 3 ຄັ້ງ ( ໄລຍະ 8-10 ກິໂລແມັດ ) ແລະ ເຂົ້າຟິດເນັດທຸກໆມື້ ລວມທັງບາງເວລາກໍຊ້ອມການຍິງປະຕູ ແລະ ເທັກນິກໆຄົນດຽວດ້ວຍເອງໃນສະໜາມ ເພື່ອແກ້ໄຂຈຸດອ່ອນຂອງຕົວເອງ. ດັ່ງທີ່ຮູ້ ໄລຍະຕົ້ນປີຂ້ອຍໄດ້ຮັບບາດເຈັບ ເຊິ່ງໄລຍະພັກການແຂ່ງຂັນທີ່ຜ່ານາ ຮູ້ສຶກວ່າຂ້ອຍສາມາດຮັກສາສະພາບຮ່າງກາຍໄດ້ດີກວ່າໃນໄລຍະເວລາປົກກະຕິ ເພາະວ່າມີເວລາຜັກຜ່ອນ ຫຼັງຈາກອອກກໍາລັງກາຍ ແລະ ການຝຶກຊ້ອມ ເວົ້າລວມໄດ້ມີເວລາຮັກສາສະພາບຮ່າງກາຍຫຼາຍຂຶ້ນ ຈົນເຮັດໃຫ້ຮ່າງກາຍກັບມາສົມບູນແບບ ແລະ ດີຂຶ້ນກວ່າເກົ່າ ” ສຸກອາພອນ ກ່າວ.

ສຸກອາພອນ ເລີ່ມການເປັນນັກເຕະກັບສະໂມສອນ ເອສຣາ ເມື່ອປີ 2003 ເຊິ່ງເປັນຊຸດທໍາອິດຂອງສະໂມສອນດັ່ງກ່າວກ່ອນຍ້າຍໄປຫຼິ້ນໃຫ້ກັບກະບີ່ ສະໂມສອນໃນດິວິຊັນ 1 ຂອງປະເທດໄທ ເມື່ອປີ 2011-2012, ຕໍ່ດ້ວຍພິດສະນຸໂລກ ໃນລີກ 1 ຂອງປະເທດໄທເຄິ່ງລະດູການເມື່ອປີ 2013 ແລະສຸດທ້າຍກໍຍ້າຍໄປຢູ່ສະຣະບູລີ ເມື່ອປີ 2014 ດ້ວຍການເປັນສ່ວນໜຶ່ງພາທີມເລື່ອນຂຶ້ນຊັ້ນສູ່ ໄທພຣີເມຍລີກກ່ອນຈະຫວນຄືນມາສູ່ວົງການບານເຕະລາວຮ່ວມກັບລ້ານຊ້າງຢູໄນເຕັດ ເມື່ອປີ 2015, ຕໍ່ດ້ວຍ ເອັສຣາ ເອັຟຊີ ແລະ ວຽງຈັນ ຢູໄນເຕັດ ກ່ອນເດີນໜ້າໄປໄທລີກອີກຄັ້ງຮ່ວມກັບ ສີສະເກດ ເອັຟຊີ ໃນປີ 2018-2019 ຫຼ້າສຸດປີນີ້ ຫຼິ້ນໃຫ້ກັບ ປຣະຈວບ ເອັຟຊີ ທີມໃນລີກສູງສຸດຂອງປະເທດໄທ.
ຄັດຈາກ: ໜັງສືພິມເສດຖະກິດການຄ້າ