100 ກວ່ານັກເຕະຮ່ວມຄັດເລືອກ ວຽງຈັນ ເອັຟທີ ກຽມລຸຍ ເປບຊີ ລາວລີກ 1 ປີນີ້

520

ທັບນັກກີລາບານເຕະ ທັງຮຸ່ນເຍົາວະຊົນ ແລະ ຊາວໜຸ່ມພາຍໃນ ນະຄອນຫຼວງວຽງຈັນ ຈໍານວນ 100 ກວ່າຄົນ ເຂົ້າຮ່ວມຄັດເລືອກ ເພື່ອຫວັງລຸ້ນໂຄຕ້າໃຫ້ຕົນເອງ ຕິດ 1 ໃນ 25 ຄົນ ເຂົ້າຮ່ວມເປັນຕົວແທນຫຼິ້ນໃຫ້ສະໂມສອນ ວຽງຈັນ ເອັຟທີ ລຸຍລາຍການ ເປບຊີ ລາວລີກ 1 ລະດູການ 2020 ເຊິ່ງການຄັດເລືອກໃນຄັ້ງນີ້ ໄດ້ມີຂຶ້ນເມື່ອລະຫວ່າງວັນທີ 21-22 ພຶດສະພາ ຜ່ານມາ ທີ່ສະໜາມກີລາເຕະບານຫຍ້າທຽມ ສັບພະວິຊາ ເມືອງສີສັດຕະນາກ ນະຄອນຫຼວງວຽງຈັນ

ທ່ານ ໃຈ ພົມມະທັດ ໃຫ້ສຳພາດວ່າ: ການຄັດເລືອກໃນຄັ້ງນີ້ ເປັນຄັ້ງຄໍາອິດທີ່ພວກເຮົາຄັດເລືອກນັກກີລາເຂົ້າຮ່ວມທີມກຽມລຸຍການແຂ່ງຂັນ ເປບຊີ ລາວລີກ 1 ໃນລະຫວ່າງ 2 ວັນ ກໍຄື ວັນທີ 21-22 ພຶດສະພາ 2020 ໂດຍຫຼັກໆແມ່ນເນັ້ນການທົດສອບແບບພື້ນຖານງ່າຍໆ ໃນການຈັບບານ, ສົ່ງບານ, ການໃຊ້ແນວຄິດໄອເດຍໃນການຄອງບານ ແລະ ກໍເຂົ້າເກມໃຫຍ່ ເພື່ອໃຫ້ເຂົາເຈົ້າໄດ້ສະແດງຄວາມສາມາດເຕັມທີ່.

ທ່ານກ່າວອີກວ່າ: ນອກຈາກນັ້ນ, ໃນມື້ສຸດທ້າຍ ກໍຈະໄດ້ເນັ້ນໃຫ້ນັກກີລາເຂົ້າເກມອີກຄັ້ງ ໂດຍໃຊ້ຄວາມຄິດຫຼາຍຂຶ້ນ ແລະ ຕິດຕາມທົດສອບວ່າ ນັກກີລາແຕ່ລະຕົວຈະມີຄວາມໄວ ແລະ ການອອກຕົວຕ່າງໆໃຜເດັ່ນໃຜດີ, ມີເທັກນິກ ແລະ ມີຄວາມສາມາດສູງແມ່ນຈະເລືອກເອົາຄົນນັ້ນ ການຄັດເລືອກໃນລະຫວ່າງ 2 ວັນດັ່ງກ່າວ ກຳນົດຈະເອົານັກກິລາຕົວຈິງທັງໝົດ ໃນ ຈຳນວນ 25 ຄົນ ເພື່ອເກັບຕົວຝຶກຊ້ອມໄປເລີຍ ຖ້າຫາກວ່າ ສະຫະພັນບານເຕະແຫ່ງຊາດ ກຳນົດໃຫ້ສົ່ງຊື່ນັກກີລາ 20 ຄົນ ພວກເຮົາກໍຈະຕັດຕົວນັກກີລາ 5 ຄົນອອກ ສ່ວນນັກກີລາໃຜທີ່ຈະສາມາດຕິດ 1 ໃນ 25 ຄົນ ຈະຂໍລາຍງານໃຫ້ທ່ານຊາບຕື່ມອີກ.

ສໍາລັບ ວຽງຈັນ ເອັຟທີ ສ້າງຕັ້ງຂຶ້ນມາແຕ່ວັນທີ 12 ພຶດສະພາ 2013 ໂດຍສ່ວນໃຫຍ່ ເປີດສອນສະເພາະໃນຮຸ່ນອານຸຊົນ ແລະ ເຍົາວະຊົນ ໃນຮຸ່ນອາຍຸບໍ່ເກີນ 6ຫາ11 ປີ 12 ປີ, 13 ປີ, 14 ປີ ແລະ 15 ປີ ໂດຍໄດ້ຮັບສິດເລື່ອນຊັ້ນຂື້ນໄປແຂ່ງຂັນໃນ ເປບຊີ ລາວລີກ 1 ໃນຖານະອັນດັບ 6 ການແຂ່ງຂັນ ສາຍ ກໍ ( ລາວລີກ 2 ) 2019 ເນື່ອງຈາກ ສະໂມສອນ ປກສ ເອັຟຊີ (2) ໄດ້ອັນດັບ 1, ຊ້າງນ້ອຍ ເອັຟຊີ (2) ໄດ້ອັນດັບ 2, ກອງທັບ ເອັຟຊີ (2) ໄດ້ອັນດັບ 3 ໄດ້ມີທີມ A ຫຼື ທີມໃຫຍ່ຂອງໂຕເອງຢູ່ໃນລີກສູງສຸດນັ້ນແລ້ວ ລວມເຖິງສະໂມສອນ ນະຄອນຫຼວງວຽງຈັນ ເອັຟຊີ ອັນດັບ 4 ບໍ່ເລື່ອນຊັ້ນ, ສະໂມສອນ ມຊ ເອັຟຊີ ອັນດັບ 5 ບໍ່ເລື່ອນຊັ້ນ ສະນັ້ນໂອກາດຈຶ່ງຕົກເປັນ ສະໂມສອນ ວຽງຈັນ ເອັຟທີ ຜົນງານໃນສາຍ ກ 2019 ລົງແຂ່ງ 22 ນັດ ຊະນະ 10, ສະເໝີ 5, ເສຍ 7 ແລະ ມີ 35 ຄະແນນ.
(ຂ່າວຈາກ: ໜັງສືພິມເສດຖະກິດການຄ້າ; ຮູບຈາກ: Vientiane Football Team ແລະ ສະຫະພັນບານເຕະແຫ່ງຊາດລາວ)