ຫົງພະຈັນ ຄວ້າອັນດັບ 1 ຍິງປືນໄອພີເອັດຊີ ຄັ້ງທີ 2 ຄັດເລືອກທີມຊາດ ຮ່ວມຊີງແຊັມໂລກ

638

ເມື່ອບໍ່ດົນມານີ້ ທີ່ສະໜາມຝຶກຊ້ອມກີລາຍິງປືນ 5 ເມສາ ບ້ານສົມສະຫງ່າ ເມືອງໄຊເຊດຖາ ນະຄອນຫຼວງວຽງຈັນ ສະໂມສອນ ຍິງປືນ ໄອພີເອັດຊີລາວ ສືບຕໍ່ຈັດການແຂ່ງຂັນກີລາຍິງປືນ ໄອພີເອັດຊີ ຊີງແຊັມປະເທດລາວ ຄັ້ງທີ 2 ເຊິ່ງມີການແຂ່ງຂັນທັງໝົດ 10 ສະໜາມ ຜົນປະກົດວ່າ: ທີ 1 ທ່ານຫົງພະຈັນ ດາລາວົງ ຍິງລວມຄະແນນໄດ້ 900 ຄະແນນ, ທີ 2 ທ່ານ ທຽນອີ້ ຍິງໄດ້ 869 ຄະແນນ, ທີ 3 ທ່ານ ສຸນັນ ວັດທະນະບູນ ຍິງໄດ້ 863 ຄະແນນ, ທີ 4 ທ່ານສິງຄຳ ສີປະເສີດ ຍິງໄດ້ 729 ຄະແນນ, ທີ 5 ທ່ານນາງ ກົງຄຳ ບົວແສງພະຈັນ ຍິງໄດ້ 667 ຄະແນນ, ທີ 6 ທ່ານຕົ້ນຄຳ ເມືອງມະນີ ຍິງໄດ້ 655 ຄະແນນ, ທີ 7 ທ່ານສຸພອນສາ ນິຍົມ ຍິງໄດ້ 648 ຄະແນນ ແລະ ທີ 8 ທ່ານອາໂນໄທ ເມືອງມະນີ ຍິງໄດ້ 637 ຄະແນນ.

ຈາກຜົນດັ່ງກ່າວ ເຮັດໃຫ້ ຫົງພະຈັນ ແຊງຂຶ້ນແຖວໜ້າຂອງຕາຕະລາງຄະແນນລວມ ຫຼັງຄັ້ງທໍາອິດຢຶດອັນດັບທີ 3 ຕ້ອງລຸ້ນຄັດເລືອກອີກ 2 ຄັ້ງ ເພື່ອຕັດສິນວ່າ 8 ນັກກີລາຍິງປືນທີ່ດີທີ່ສຸດຈະຕົກເປັນຂອງໃຜ, ສ່ວນການແຂ່ງຂັນໃນຄັ້ງທີ 3 ຈະກັບມາແຂ່ງຂັນກັນຕໍ່ ໃນວັນທີ 5 ມິຖຸນາ 2020.

ສໍາລັບ ການແຂ່ງຂັນກີລາຍິງປືນ ໄອພີເອັດຊີ ລາຍການ ໂປດັກຊັ່ນ ຊີງແຊັມປະເທດລາວ ໃນຄັ້ງນີ້ ມີນັກກີລາເຂົ້າຮ່ວມຄັດເລືອກ 12 ຄົນ, ຍິງ 1 ຄົນ ໜ້ອຍກວ່າຄັ້ງທີ 1ທີ່ມີ14 ຄົນ. ການແຂ່ງຂັນກຳນົດ 10 ສະໜາມ ເຊິ່ງການຄັດເລືອກຄັ້ງນີ້ຈະຕັດເອົາອັນດັບທີ 1 ໃນ 8 ທີ່ມີຄະແນນສະສົມດີທີ່ສຸດ ຈາກການແຂ່ງຂັນ 4 ຄັ້ງ ເພື່ອມາໂຮມຄະແນນສະເລ່ຍລວມ ຫານັກກີລາລາທີ່ມີຄະແນນດີທີ່ສຸດ ຈາກ 4 ຄັ້ງ ໃນຈຳນວນ 8 ຄົນ ກໍຈະໄດ້ຕາງໜ້າທັບນັກກີລາຍິງປືນໄອພີເອັດຊີທີມຊາດລາວ ເຂົ້າຮ່ວມລາຍການຊີງແຊັມໂລກ ທີ່ປະເທດໄທ ໃນທ້າຍປີນີ້ທັນທີ.
ຂ່າວຈາກ: ໜັງສືພິມເສດຖະກິດການຄ້າ