ແອ ຈໍແດນ ລຸ້ນທໍາອິດຂອງ ໄມເຄິລ ຈໍແດນ ປະມູນໄດ້ 5 ແສນກວ່າໂດລາ

723

ເກີບຍີ່ຫໍ່ ແອ ຈໍແດນ 1 ຂອງ ໄມເຄິລ ຈໍແດນ ນັກກີລາບານບ້ວງຊຸບເປີສະຕາແຫ່ງວົງການບານບ້ວງ ເອັນບີເອ ຫຼ້າສຸດໄດ້ມີການນໍາອອກມາປະມູນ ແລະ ມີແຟນຍອມຈົກເງິນກ້ອນໃຫຍ່ ເພື່ອເປັນເຈົ້າຂອງ.

ການປະມູນຄັ້ງຫຼ້າສຸດຂອງ ໂຊດບີ ບໍລິສັດຈັດການປະມູນທີ່ມີຊື່ສຽງໃນນິວຢອກ ມີການນໍາເອົາເກີບ ໄນກີ້ ແອ ຈໍແດນ 1 ສີຂາວ-ແດງ ຕັດໂລໂກດໍາອັນເປັນເອກະລັກ ພ້ອມລາຍເຊັນຂອງ ໄມເຄິລ ຈໍແດນ.

ເກີບຄູ່ດັ່ງກ່າວເປັນລຸ້ນທໍາອິດທີ່ຜະລິດໃນປີ 1985 ເຊິ່ງເປັນຄູ່ທີ່ ຈໍແດນ ໃສ່ລົງແຂ່ງຂັນບານບ້ວງເອັນບີເອ ມາແລ້ວຫຼາຍນັດ ໃນຕອນທີ່ຍັງເປັນນັກກີລາດາວເດັ່ນ ແລະ ມາຮອດປັດຈຸບັນຈະມີການຜະລິດເກີບ ແອນ ຈໍແດນ ລຸ້ນໃໝ່ ແລະ ນໍາລຸ້ນເກົ່າຜະລິດຊໍ້າອອກມາຢ່າງຫຼວງຫຼາຍ ແຕ່ກໍບໍ່ເທົ່າຄູ່ທີ່ ຈໍແດນ ເຄີຍໃສ່ເອງທີ່ແຟນໆຢາກໄດ້.

ການປະມູນເກີບ ແອນ ຈໍແດນ 1 ຄູ່ດັ່ງກ່າວ ສິ້ນສຸດລົງໃນວັນທີ 18 ພຶດສະພາ 2020 ປາກົດວ່າ: ມີແຟນທຸ້ມເງິນກ້ອນໃຫຍ່ ເພື່ອເປັນເຈົ້າຂອງດ້ວຍລາຄາ 560.000 ໂດລາ.