ອານຸສອນ ຕົ້ງເປົ້າປ້ອງກັນແຊັມ ໄທແລນ ໂອເພັນ 2020

468

ທ້າວ ອານຸສອນ ໄຊສາ ນັກກີລາແລ່ນທີມຊາດລາວ ເຈົ້າຂອງຫຼຽນທອງປະຫວັດສາດ ທັບນັກກີລາແລ່ນ-ລານລາວ ງານມະຫາກຳກີລາຊີເກມ ຄັ້ງທີ 27 ປີ 2013 ທີ່ມຽນມາ ແລະ ຄັ້ງທີ 30 ປີ 2019 ທີ່ປະເທດຟິລິບປິນ ໃນລາຍການແລ່ນຂ້າມຮົ້ວ 110 ແມັດຊາຍ ໃຫ້ສຳພາດວ່າ: ຈາກສະຖິຕິເດີມ ທີ່ເຄີຍຍາດໄດ້ຫຼຽນຄຳ ໃນລາຍການແລ່ນ 110 ແມັດຂ້າມຮົ້ວ ງານແຂ່ງຂັນກີລາແລ່ນ-ລານ ທົ່ວປະເທດໄທ ຫຼື ລາຍການ ໄທແລນ ໂອເພັນ ເມື່ອປີ 2019 ຜ່ານມາ ນ້ອງສາມາດເຮັດສະຖິຕິໄດ້ 14,02 ວິນາທີ ແຕ່ໃນປັດຈຸບັນ ສະຖິຕິຫຼຸດລົງເຫຼືອພຽງ 14,10 ວິນາທີ ເຊິ່ງກໍບໍ່ໄດ້ຫຼຸດລື່ນກັນຫຼາຍ ທຸກໆວັນນ້ອງກໍໄດ້ເກັບຕົວຝຶກຊ້ອມຕົວເອງຢ່າງເປັນປົກກະຕິ ທີ່ສະໜາມກີລາເຈົ້າອານຸວົງ ແລະ ສະໜາມກີລາແຫ່ງຊາດ ( ຫຼັກ 16 ) ເຖິງວ່າ ໂຄວິດ-19 ຍັງເປັນບັນຫາຂຸຄາມໃຫ້ແກ່ສັງຄົມໃນທົ່ວໂລກ ໄດ້ມີຄວາມລຳບາກ ຫຍຸ້ງຍາກຫຼາຍ ແລະ ສົ່ງຜົນກະທົບວິກິດທາງດ້ານເສດຖະກິດຢ່າງມະຫາສານ ໂດຍສະເພາະຢູ່ລາວເຮົາ ກໍໄດ້ຮັບຜົນກະທົບເຊັນກັນ.

“ ຢ່າງໃດກໍຕາມ, ໃນໄລຍະທີ່ພະຍາດທີ່ເກີດຂຶ້ນ ນ້ອງກໍໄດ້ລະມັດລະວັງຕົວເອງຢູ່ສະເໝີ ພ້ອມທັງງົດການໄປມາຫາສູ່ຍາດພີ່ນ້ອງເພື່ອນຊະໜິດມິດສະຫາຍ ແລະ ມາເນັ້ນ ການຝຶກຊ້ອມເປັນຫຼັກ, ໃນນັ້ນ ມີການຝຶກຊ້ອມເອົາພະລະກຳລັງ ແລະ ເທັກນິກ ເພື່ອຝຶກຊ້ອມລະບົບກ້າມຊີ້ນຂອງທຸກສ່ວນໃນຮ່າງກາຍ ໂດຍມີຄູຝຶກທີ່ຊຽວຊານລະດັບສາກົນ ຈາກສະຫະລັດອາເມລິກາ ເປັນຜູ້ວາງແຜນຝຶກຊ້ອມໃຫ້, ສ່ວນທ່ານ ສິດທິໄຊ ສັກປະເສີດ ແມ່ນເປັນຜູ້ຄວບຄຸມການຝຶກຊ້ອມ ແລະ ກ່ອນຈະຮອດມື້ແຂ່ງຂັນຕົວຈິງ ຄາດວ່າ ສະຖິຕິ ທີ່ເຄີຍຍາດໄດ້ແຊັມ ລາຍການ ໄທແລນ ໂອເພັນ 2019 ກໍຈະກັບມາເໝືອນເດີມ ຫຼື ອາດຈະສະຖິຕິດີກວ່າເກົ່າ ທັງນີ້ ກໍຫວັງຢາກຈະປ້ອງກັນແຊັມໄວ້ໃຫ້ໄດ້ອີກ 1 ສະໄໝ ເພື່ອເປັນຂອງຂວັນລາງວັນມາຝາກມາຕ້ອນໃຫ້ແກ່ພໍ່ແມ່ປະຊາຊົນຊາວລາວ ກໍຄື ຄອບຄົວ ແລະ ວົງການກີລາແລ່ນ-ລານລາວຢ່າງໜ້າພາກພູມໃຈ ” ອານຸສອນ ກ່າວ.

ສໍາລັບ ຜົນງານຂອງ ທ້າວ ອານຸສອນ ໄຊສາ ແຈ້ງເກີດໃນປີ 2013 ດ້ວຍການຄວ້າ ຫຼຽນທອງ ປະຫວັດສາດ ໃນງານກີລາຊີເກມ ຄັ້ງທີ 27 ປີ 2013 ທີ່ມຽນມາ ແລະ ຫຼ້າສຸດຄວ້າ 1 ຫຼຽນທອງ ໃນຊີເກມ ຄັ້ງທີ 30 ປີ 2019 ທີ່ປະເທດຟິລິບປິນ ໃນລາຍການແລ່ນຂ້າມຮົ້ວ 110 ແມັດຊາຍ, ສ່ວນຜົນງານໃນລາຍການ ໄທແລນ ໂອເພັນ 2019 ທີ່ນະຄອນຫຼວງບາງກອກ ປະເທດໄທ ໃນເດືອນພຶດສະພາ 2019 ສາມາດຍາດມາໄດ້ 1 ຫຼຽນຄຳ ປະເພດແລ່່ນຂ້າມຮົ້ວ 110 ແມັດຊາຍ.
ຂ່າວຈາກ: ໜັງສືພິມເສດຖະກິດການຄ້າ