ເຄວສ ຢູໄນເຕັດ ປີນີ້ເນັ້ນໃຊ້ແຕ່ນັກເຕະລາວ ໄລ່ລ່າຄວາມສໍາເລັດໃນ ລາວລີກ 2

494

ທ່ານ ວົງພະທິບ ວິຣະວົງສາ ຜູ້ຈັດການທີມ ເຄວສ ຢູໄນເຕັດ ໄດ້ລາຍງານໃຫ້ຮູ້ວ່າ: ໃນຕົ້ນປີກໍມີການຄັດເລືອກນັກກີລາເປັນຈຳນວນຫຼາຍ ໄດ້ມີຄວາມພ້ອມເປັນຈຳນວນຫນຶ່ງ ໃນປີນີ້ ທີ່ຈິງແລ້ວໄດ້ມີການຝຶກຊ້ອມປົກກະຕິ ແຕ່ເນື່ອງຈາກການລະບາດຂອງ ໂຄວິດ-19 ຈິ່ງໄດ້ຢຸດຕິການຝຶກຊ້ອມ ໂດຍໄດ້ໃຫ້ນັກກີລາກັບບ້ານເພື່ອພັກຜ່ອນເກັບຕົວ, ໄດ້ແນະນຳໃຫ້ນັກກີລາຝຶກຊ້ອມ ແລະ ອອກກຳລັງກາຍ ເບົາໆ ເພື່ອກຽມພ້ອມທາງດ້ານ ຮ່າງກາຍ ແລະ ຈິດໃຈ.

“ ໃນປີນີ້ ເຄວສ ຢູໄນເຕັດ ຈະໃຊ້ ຄູຝຶກໃໝ່ ( ຍັງບໍ່ມີການເປີດເຜີຍ ) ເປັນຜູ້ທີ່ມີຄວາມສາມາດ ໃນການທີ່ຈະນຳນັກກີລາ ເຂົ້າຮ່ວມການແຂ່ງຂັນ ເພື່ອເຮັດໃຫ້ຜົນງານຂອງມາໃຫ້ດີທີ່ສຸດ ເຊິ່ງທັງຄູຝຶກ ແລະ ນັກກີລາມີຄວາມຕື່ນເຕັ້ນ ແລະ ທ້າທາຍຫຼາຍ ໃນການແຂ່ງຂັນໃນປີນີ້, ສ່ວນນັກກີລາແມ່ນໄດ້ເສີມມາເພີ່ມ ແລະ ນັກເຕະຕ່າງປະເທດ ປະທານ ສະໂມສອນ ຍັງຕົກລົງກັນບໍ່ໄດ້ ເນື່ອງຈາກມີຜົນກະທົບຈາກໂຄວິດ ເຮັດໃຫ້ໃນປີນີ້ຍັງບໍ່ພ້ອມທີ່ຈະເອົານັກກີລາຕ່າງປະເທດເທື່ອ ເນື່ອງຈາກວ່າປະເທດທີ່ເຮົາພົວພັນເອົານັກກີລາຕ່າງປະເທດນັ້ນປິດປະເທດ, ຢ່າງໃດກໍຕາມ ປີນີ້ຈະເຮັດສຸດຄວາມສາມາດ ເພື່ອໃຫ້ຜົນງານອອກມາດີທີ່ສຸດ ” ຜູ້ຈັດການທີມກ່າວ.

ສໍາລັບ ສະໂມສອນ ເຄວສ ຢູໄນເຕັດ ແມ່ນສ້າງຕັ້ງຂຶ້ນໃນປີ 2019 ໂດຍໄດ້ສົ່ງທີມເຂົ້າຮ່ວມການແຂ່ງຂັນ ຄອມມານໂດ ສາຍ ກໍ ( ລາວລີກ 2 ປັດຈຸບັນ ) ປະຈໍາປີ 2019 ເຊິ່ງໄດ້ອັນດັບ 10 ຂອງຕາຕະລາງຄະແນນລວມ ລົງແຂ່ງຂັນ 22 ນັດ ຊະນ 5, ສະເໝີ 3, ເສຍ 15 ແລະ ມີ 10 ຄະແນນ ເຊິ່ງທີ່ຕັ້ງຂອງ ສະໂມສອນ ເຄວສ ຢູໄນເຕັດ ແມ່ນຕັ້ງຢູ່ບ້ານ ສີວິໄລ ເມືອງໄຊທານີ ນະຄອນຫຼວງວຽງຈັນ.

ການແຂ່ງຂັນບານເຕະ ຄອມມານໂດ ລາວລີກ 2 ໃນປີ 2020 ມີ ທີມເຂົ້າຮ່ວມທັງໝົດ 12 ທີມ ເຊິ່ງປີນີ້ ເຄວສ ຢູໄນເຕັດ ມີໂອກາດຫຼາຍຂຶ້ນ ເພາະເປັນທີມທີ່ມີປະສົບການໃນລາວລີກ 2 ລວມທັງປີນີ້ ສະຫະພັນບານເຕະແຫ່ງຊາດລາວ ບໍ່ອະນຸຍາດໃຫ້ ສະໂມສອນໃນການແຂ່ງຂັນ ເປບຊີ ລາວລີກ 1 ປະຈໍາປີ 2020 ບໍ່ສາມາດສົ່ງທີມໍາຮອງ ຫຼື ທີມສອງ ຂອງສະໂມສອນເຂົ້າຮ່ວມແຂ່ງຂັນ ຄອມມານໂດ ລາວລີກ 2 ປະຈຳປີ 2020, ສ່ວນວັນເວລາເປີດການແຂ່ງຂັນແມ່ນຍັງບໍ່ທັນກໍານົດແນ່ນອນ ເນື່ອງຈາກຍັງຕ້ອງລໍຖ້າເບິ່ງສະຖານະການຂອງ ໂຄວິດ-19 ຕໍ່ໄປ.
( ຈາກ: ສະຫະພັນບານເຕະແຫ່ງຊາດລາວ )