ບີແກນ ຢູໄນເຕັດ ນ້ອງໃໝ່ ລາວລີກ 2 ເນັ້ນໃຊ້ຄູຝຶກຍິງ-ນັກເຕະຕ່າງແຂວງ ສ້າງສີສັນ

596

ອີງຕາມການເປີດເຜີຍຂອງ ທ່ານ ບຸນຍົງ ພົນສະຫວັດດີ ປະທານ ສະໂມສອນ ບີແກນ ຢູໄນເຕັດ ລາຍງານໃຫ້ຮູ້ວ່າ: ຍອມຮັບເລີຍວ່າເຮົາເປັນທີມນ້ອງໃໝ່ການກຽມທີມອາດຊ້າ ລວມເຖິງຍັງຢູ່ໃນໄລຍະທີ່ ໂຄວິດ-19 ລະບາດ ແຕ່ເຮົາກໍໄດ້ຄັດເລືອກນັກກີລາຈໍານວນໜຶ່ງ ແລະ ໃຫ້ທຸກຄົນ ຝຶກຊ້ອມດ້ວຍຕົນເອງຢູ່ເຮືອນ ເພື່ອຮັກສາສະພາບຄວາມພ້ອມຂອງຮ່າງກາຍ ເຊິ່ງນັກກີລາຂອງພວກເຮົາ ສ່ວນຫຼາຍແມ່ນຈາກຕ່າງແຂວງ ແລະ ບາງສ່ວນມາຈາກສະໂມສອນ ມຊ ເອັຟຊີ ໃນປີທີຜ່ານມາ ສ່ວນນັກກີລາຕ່າງປະເທດ ແມ່ນກຳລັງເຈລະຈານັກເຕະຕ່າງປະເທດ ເຊິ່ງເປັນນັກກີລາຈາກປະເທດເພື່ອນບ້ານ ມາຈາກປະເທດໄທ ພວກເຮົາອາດເສີມນັກເຕະຕ່າງປະເທດເຕັມໂຄຕາ.

ຂະນະທີ່ ຄູຝຶກພວກເຮົາໄດ້ດຶງໂຕ ທ່ານ ນາງ ພຸດ ຄຳສຸກຖາວົງ ຜູ້ຊ່ວຍຄູຝຶກ ທີມຊາດຍິງ ລາວ ຮຸ່ນອາຍຸບໍ່ເກີນ 16 ປີ ມາຄຸມທີມໃນປີນີ້ ເພື່ອສ້າງສີສັນໃຫ້ກັບວົງການບານເຕະບ້ານເຮົາ ໂດຍເລືອກໃຫ້ຄູຝຶກຍິງມາຄຸມທີມ, ສ່ວນເປົ້າໝາຍຂອງທີມເຮົາ ຢ່າງທີ່ຮູ້ກັນດີວ່າທີມເຮົາເປັນທີມນ້ອງໄໝ່ ເຮົາຍັງບອກບໍ່ໄດ້ວ່າຈະເຮັດໄດ້ດີພຽງໃດໃນການແຂ່ງຂັນຄັ້ງນີ້ ແຕ່ເຮົາຂໍບອກເລີຍວ່າເຮົາຈະສູ້ເຕັມຄວາມສາມາດ ແລະ ພະລະກຳລັງທີ່ເຮົາມີ ເພື່ອເຮັດໃຫ້ຜົນງານອອກມາດີທີ່ສຸດ

ທ່ານກ່າວອີກວ່າ: ສໍາລັບຜູ້ສະໜັບສະໜູນທີມພວກເຮົາຫຼັກໆແມ່ນຮ້ານຂາຍເຄື່ອງກີລາ Began sport ໃນຕອນນີ້ ແລະ ກຳລັງເຈລະຈາ ກັບພາກສ່ວນອື່ນໆ ເພື່ອໃຫ້ການສະໜັບສະຫນູນທີມຕື່ມອີກ, ແນ່ນອນຈຸດປະສົງການສ້າງທີມຄັ້ງນີ້ ແມ່ນກໍເພື່ອຜັກດັນນັກກີລາທີ່ບໍ່ມີໂອກາດ ໂດຍສະເພາະແມ່ນນັກກີລາຕ່າງແຂວງ ໃຫ້ເຂົາເຈົ້າໄດ້ພັດທະນາຄວາມສາມາດໃຫ້ກ້າວຂື້ນສູ່ລະດັບຕໍ່ໆໄປ ແລະ ທີ່ສຳຄັນເຮົາຫວັງວ່າທີມເຮົາຈະເປັນທີມໜຶ່ງທີ່ປຸກກະແສບານເຕະລີກສອງໃຫ້ມີຄວາມຄຶກຄື້ນ, ຕື່ນເຕັ້ນ ແລະ ໜ້າຕິດຕາມ.

ເຊິ່ງວ່ານັກເຕະໂຄຕາຕ່າງປະເທດຈາກປະເທດໄທ ທີ່ ບີແກນ ຢູໄນເຕັດ ກໍາລັງເຈລະຈາຢູ່ ຫຼ້າສຸດມີການເປີດເຜີຍອອກມາ 2 ຄົນຄື: ກໍລະວິດ ເໝືອນສີເລົາ ອາຍຸ 28 ປີ ກອງກາງ ອາດິດນັກເຕະເຍົາວະຊົນທີມຊາດໄທຊຸດດຽວກັບ ຊາລັດ ຢູເຢັນ, ສ່ວນອີກຄົນແມ່ນ ອິດທິພົນ ຣັດຕະນະໄພໂຣດ ອາຍຸ 29 ປີ ຫຼິ້ນໃນຕຳແໜ່ງປີກ. ຢ່າງໃດກໍຕາມ ຕ້ອງລໍຖ້າມື້ເປີດຕົວທີມຢ່າງເປັນທາງການແລ້ວຈະລາຍງານໃຫ້ຊາບຕື່ມພາຍຫຼັງ.

ສຳລັບ ບີແກນ ຢູໄນເຕັດ ແມ່ນຖືກສ້າງຕັ້ງຂຶ້ນໃນປີ 2020 ໂດຍຫ້ອງການຂອງ ສະໂມສອນ ແມ່ນຕັ້ງຢູບ້ານຕານມີໄຊ ເມືອງໄຊທານີ ນະຄອນຫຼວງວຽງຈັນ, ສ່ວນການແຂ່ງຂັນບານເຕະ ຄອມມານໂດ ລາວລີກ 2 ໃນປີ 2020 ມີ ທີມເຂົ້າຮ່ວມທັງຫມົດ 12 ທີມຄື: ເຄວສ ຢູໄນເຕັດ, ທຣີນີຕີ ເອັຟຊີ, ແຄນລາວ ຢູໄນເຕັດ, ເອັສອີຊີ ຢູໄນເຕັດ, ເຄພີເອັສ ເອັຟຊີ, ລາວທ໋ອບ ເອັຟຊີ, ເອັຟຊີ, ບີແຄນ ຢູໄນເຕັດ, ເຮັສບີທີ 941 ເອັຟຊີ, ກອງທັບ ເອັຟຊີ, ວຽງຈັນ ຢູໄນເຕັດ ແລະ ປະສານໃຈ ເອັຟຊີ. ຂະນະທີ່ ວັນເປີດການແຂ່ງຂັນແມ່ນຍັງກໍານົດບໍ່ໄດ້ ເພາະຍັງຢູ່ໃນໄລຍະ ໂຄວິດ-19.
ຂອບໃຈຮູບ-ຂໍ້ມູນຈາກ: Lao League 2