ບາເຢິນ ມິວນິກ ແຕ່ງຕັ້ງ ໂຄລເຊ ເປັນຜູ້ຊ່ວຍຄູຝຶກ

503

ບາເຢິນ ມິວນິກ ສະໂມສອນໃນບຸນເດສລີກາ ເຢຍລະມັນ ປະກາດແຕ່ງຕັ້ງ ມິໂຣສລາຟ ໂຄລເຊ ອະດີດກອງໜ້າຂອງສະໂມສອນ ເປັນຜູ້ຊ່ວຍຄູຝຶກເປັນທີ່ຮຽບຮ້ອຍ ໃນທ້າຍອາທິດ ທີ່ຜ່ານມາ ດ້ວຍສັນຍາ 1 ປີ ເຊິ່ງຈະໄປຊ່ວຍ ຮັນຊີ ຟລິກ ຜູ້ຈັດການທີມ ເລີ່ມເຮັດວຽກໃນວັນທີ 1 ກໍລະກົດ ຫຼັງຈາກກ່ອນໜ້ານີ້ ໂຄລເຊ ຮັບໜ້າທີ່ເປັນຜູ້ຈັດການທີມ ຢູ 17 ປີເປັນເວລາ 2 ປີ.

ໂຄລເຊ ເປີດໃຈວ່າ: “ ຮັນຊີ ຟລິກ ກັບຂ້ອຍຮູ້ຈັກກັນເປັນຢ່າງດີຕັ້ງແຕ່ຮ່ວມງານກັນທີ່ທີມຊາດເຢຍລະມັນ, ພວກເຮົາວາງໃຈເຊິ່ງກັນ ແລະ ກັນ ທັງໃນເລື່ອງຂອງການເຮັດວຽກ ແລະ ຊີວິດສ່ວນຕົວ ສໍາລັບຂ້ອຍນີ້ຄືກ້າວຍ່າງທີ່ສໍາຄັນໃນອາຊີບຄູຝຶກຂອງຂ້ອຍ ເຊິ່ງຂ້ອຍຫວັງວ່າ ປະສົບການຂອງຂ້ອຍຈະຊ່ວຍໃຫ້ ບາເຢິນ ມິວນິກ ປະສົບຄວາມສໍາເລັດໃນເປົ້າໝາຍທີ່ວາງໄວ້ ”.

ສໍາລັບ ໂຄລເຊ ສະໄໝເປັນນັກເຕະຫຼິ້ນໃຫ້ກັບ ບາເຢິນ ມິວນິກ ລະຫວ່າງປີ 2007-2011 ສາມາດຍິງ 53 ປະຕູຈາກການລົງແຂ່ງຂັນທັງໝົດ 149 ນັດ.