ເຄພີເອັສ ເອັຟຊີ ຕັ້ງເປົ້າຕິດ 1 ໃນ 3 ເພື່ອຄວ້າສິດສູ່ ລາວລີກ 1

690

ທ່ານ ແກ້ວພະແສງ ສີປະເສີດ ຮອງປະທານສະໂມສອນ ທັງເປັນຜູ້ຈັດການທີມ ເຄພີເອັສ ເອັຟຊີ ໄດ້ໃຫ້ສຳພາດວ່າ: ສໍາລັບທີມ ເຄພີເອັສ ໃນປີນີ້ເວົ້າເລື້ອງຄວາມພ້ອມແມ່ນດີກ່ວາປີທີ່ຜ່ານມາ ສ່ວນນັກເຕະກໍ່ໄດ້ມີການຄັດເລືອກແລ້ວກ່ອນທີ່ ໂຄວິດ ຈະເກີດ ເຮົາໄດ້ຄັດເອົານັກເຕະຢູ່ໃນນະຄອນຫຼວງ ແລະ ກໍມີນັກເຕະຕ່າງແຂວງມາຄັດນໍາ ເຫັນວ່າມີນັກເຕະໃຫ້ຄວາມຮ່ວມມືເຂົ້າມາຄັດຫຼາຍພໍສົມຄວນ ເຊິ່ງມີປະມານ 100 ປາຍຄົນເຂົ້າມາຮ່ວມໃນການຄັດເລືອກຄັ້ງນີ້ ແຕ່ເຮົາເອົາພຽງແຕ່ 25 ຄົນທີ່ຈະເຂົ້າໄປແຂ່ງຂັນໃນ ລາວລີກ 2 ພວກເຮົາຈະບໍ່ໃຊ້ນັກເຕະເກົ່າຫຼາຍ

“ ສໍາລັບ ປີນີ້ພວກເຂົາຈະໃຊ້ນັກເຕະໜ້າໃໝ່ເພາະວ່າເຮົາຢາກໃຫ້ໂອກາດນັກເຕະທີ່ບໍ່ມີປະສົບການແຕ່ມີພອນສະຫວັນ ມີເຕັກນິກ ເຮົາຕ້ອງການຢາກໃຫ້ໂອກາດນັກເຕະ ຮຸ່ນອາຍຸ 15 ປີ ແລະ ຮຸ່ນອາຍຸ 18 ປີຂື້ນມາທົດແທນ ເຊິ່ງພວກເຮົາໄດ້ຄັດເລືອກເຂົ້າມາຫຼາຍເກືອບວ່າຍົກທີມໃໝ່ ສ່ວນນັກເຕະຕ່າງປະເທດເຮົາຈະເສີມຢູ່ຈໍານວນໜຶ່ງ ເຊິ່ງເປົ້າໝາຍໃນການເຂົ້າຮ່ວມພວກເຮົາຢາກຂຶ້ນ ລາວລີກ 1 ແລະ ຕ້ອງການຢາກຕິດ 1 ໃນ 3 ຂອງລີກ 2, ສ່ວນການຝຶກຊ້ອມ ໃນໄລຍະທີ່ ໂຄວິດ ມີການລະບາດ ໄດ້ໃຫ້ນັກກິລາເກັບໂຕ ແລະ ຊ້ອມຢູ່ເຮືອນໃຜເຮືອນມັນກ່ອນ ແຕ່ລະທິດພວກເຮົາຈະມີການສອນອອກກໍາລັງກາຍໃຫ້ແຕ່ລະຄົນເປັນທັງ ວີດີໂດ ອອນລາຍ, ວີດີໂອ ຄອນ ອາທິດໜຶ່ງ 3 ເທື່ອເພື່ອກຽມຄວາມພ້ອມ ແລະ ຫຼັງໂຄວິດພວກເຮົາກໍ່ຈະມາຊ້ອມກັນຄົບທີມ ” ທ່ານ ແກ້ວພະແສງ ກ່າວ.

ສໍາລັບ ປະຫວັດ ສະໂມສອນ ເຄພີເອັສ ເອັຟຊິ ໃນປີ 2010 ສ້າງເປັນທີມນ້ອຍ, ປີ 2016 ສ້າງເປັນທີມເດີ່ນໄຫຍ່ ແລະ ລະເຂົ້າຮ່ວມ ສາຍກໍ 2017 ເປັນຕົ້ນມາ, ໃນເມື່ອກ່ອນໃສ່ຊື່ ເອັສເອັນຈີ, ປີ 2016 ປ່ຽນມາໃສ່ ເຄພີເອັສ, ອະຄາເດມີປະຈຸບັນມີ ຢູ 10, 12, 13, 14, 18 ແລະ ຊຸດໃຫຍ່

ການແຂ່ງຂັນບານເຕະ ຄອມມານໂດ ລາວລີກ 2 ໃນປີ 2020 ມີ ທີມເຂົ້າຮ່ວມທັງໝົດ 12 ທີມ ເຊິ່ງປີນີ້ເຮັດໃຫ້ ເຄພີເອັສ ເອັຟຊີ ມີໂອກາດຫຼາຍຂຶ້ນ ເພາະເປັນທີມທີ່ມີປະສົບການໃນລາວລີກ 2 ລວມທັງປີນີ້ ສະຫະພັນບານເຕະແຫ່ງຊາດລາວ ບໍ່ອະນຸຍາດໃຫ້ ສະໂມສອນໃນການແຂ່ງຂັນ ເປບຊີ ລາວລີກ 1 ປະຈໍາປີ 2020 ບໍ່ສາມາດສົ່ງທີມໍາຮອງ ຫຼື ທີມສອງ ຂອງສະໂມສອນເຂົ້າຮ່ວມແຂ່ງຂັນ ຄອມມານໂດ ລາວລີກ 2 ປະຈຳປີ 2020, ສ່ວນວັນເວລາເປີດການແຂ່ງຂັນແມ່ນຍັງບໍ່ທັນກໍານົດແນ່ນອນ ເນື່ອງຈາກຍັງຕ້ອງລໍຖ້າເບິ່ງສະຖານະການຂອງ ໂຄວິດ-19 ຕໍ່ໄປ.
(ຂໍ້ມູນຈາກ: ສະຫະພັນບານເຕະແຫ່ງຊາດລາວ )