ພຣີເມຍລີກ ອັງກິດ ຮ່ວມມືກັບ ຢູທູບ ກຽມຖ່າຍທອດສົດໃຫ້ເບິ່ງລ້າໆ ໄລຍະໂຄວິດ

896

ພຣີເມຍລີກ ອັງກິດ ກຽມກັບມາແຂ່ງຂັນລະດູການ 2019-2020 ໃຫ້ຈົບຕາມກໍານົດໃນເດືອນມິຖຸນາ 2020 ແລະ ກຽມນໍາການແຂ່ງຂັນອອກອາກາດຜ່ານທາງ ຢູທູບ ( Youtube ) ໃຫ້ເບິ່ງລ້າໆອີກດ້ວຍ.

ການແຂ່ງຂັນບານເຕະ ພຣີເມຍລີກ ອັງກິດ ຍັງຕົກຄ້າງອີກ 92 ນັດ ຫຼັງຢຸດການແຂ່ງຂັນໄປ ເນື່ອງຈາກການລະບາດຂອງ ໂຄວິດ-19 ແຕ່ທຸກນັດທີ່ເຫຼືອຈະກັບມາແຂ່ງຂັນອີກຄັ້ງ ເພື່ອຈົບລະດູການໃຫ້ໄດ້ ເຊິ່ງມີກໍານົດແຂ່ງຂັນຕໍ່ໃນວັນທີ 12 ມິຖຸນາ 2020.

ໂດຍປົກກະຕິແລ້ວ ສະກາຍ ສະປອດ ກັບ ບີທີ ສະປອດ ສະຖານີໂທລະພາບທີ່ມີຊື່ສຽງຂອງອັງກິດ ຮັບລິຂະສິດຖ່າຍທອດສົດ, ແຕ່ຫຼ້າສຸດພວກເຂົາກຽມພິຈາລະນາຍິງສັນຍານຜ່ານທາງ ຢູທູບ ໃຫ້ເບິ່ງລ້າໆ.

ຢ່າງໃດກໍຕາມ, ມີການລະບຸວ່າ ການຖ່າຍທອດສົດທາງ ຢູທູບ ຈະເລືອກຖ່າຍເປັນບາງຄູ່ເທົ່ານັ້ນ, ສ່ວນການເບິ່ງທາງຊ່ອງທາງ ສະກາຍ ສະປອດ ແລະ ບີທີ ສະປອດ ຈະຕ້ອງເສຍເງິນເບິ່ງ ຈິ່ງສາມາດເບິ່ງຄົບທຸກຄູ່ໄດ້.