ເລື່ອນງານກິລາມະຫາວິທະຍາໄລອາຊຽນ ຄັ້ງທີ 20

498

ອີງຕາມຜົນກອງປະຊຸມຂອງຫົວໜ້າປະເທດຊາດຊະມາຊິກຂອງ ສະຫະພັນກິລາມະຫາວິທະຍາໄລອາຊຽນ ທີ່ຈັດຂຶ້ນໃນຮູບແບບ online ໃນວັນທີ 05/05/2020 ໂດຍມີບັນດາປະເທດສະມາຊິກເຂົ້າຮ່ວມຢ່າງພ້ອມພຽງ, ຊຶ່ງກອງປະຊຸມໄດ້ມີການປຶກສາຫາລືການກຽມຄວາມພ້ອມໃນການຈັດການແຂ່ງຂັນ AUG 20th ທີ່ ມະຫາວິທະຍາໄລ ອຸບົນຣາຊະທານີ ປະເທດໄທ ຮັບກຽດເປັນເຈົ້າພາບ ໃນລະຫວ່າງວັນທີ 13-22 ພະຈິກ 2020 (ກຳນົດການເດີມ), ໂອກາດດັ່ງກ່າວ ຕາງໜ້າມະຫາວິທະຍາໄລອຸບົນຣາຊະທານີ ໄດ້ລາຍງານຄວາມພ້ອມໃນການກະກຽມຈັດການການແຂງຂັນໃຫ້ທີ່ປະຊຸມຮັບຊາບ, ນອກຈາກນັ້ນໃນກອງປະຊຸມຍັງໄດ້ປຶກສາຫາລືກັນກ່ຽວກັບສະຖານະການປະຈຸບັນທີ່ມີການລະບາດຂອງພະຍາດ Covid-19 ທີ່ສົ່ງຜົນສະທ້ອນເຖິງດ້ານຕ່າງໆຕໍ່ການຈັດການແຂ່ງຂັນ ແລະປຶກສາກັນໃນບັນຫາອື່ນໆທີ່ກ່ຽວຂ້ອງກັບການຈັດການແຂ່ງຂັນ. ຜ່ານກອງປະຊຸມໄດ້ມີມີມະຕິເປັນເອກະພາບຮ່ວມກັນດັ່ງນີ້:

1. ກອງປະຊຸມເຫັນດີເລື່ອນການແຂ່ງຂັນ AUG 20th ໄປເປັນວັນທີ 18-27 ມິຖຸນາ 2021(ຖ້າຫາກສະຖານະການ Covid-19 ສາມາດຄວບຄຸມໄດ້). ຖ້າມີຄວາມຈຳເປັນກໍ່ຈະເລື່ອນໄປຈັດໃນເດືອນ ທັນວາ 2021 ຫຼື ອາດຈະຍົກເລີກການຈັດການແຂ່ງຂັນໃນຄັ້ງນີ້.

2. ກອງປະຊຸມເຫັນດີຮັບຮອງເອົາ 30 ປະເພດກິລາບັນຈຸເຂົ້າໃນການແຂ່ງຂັນຄື: ແລ່ນ-ລານ, ດອກປີກໄກ່, ບານບ້ວງ, ເພາະກາຍ, ມວຍສາກົນ, ໝາກເສິກ, ອີ-ສະປອດ, ບານເຕະ, ກັອບ, ຈູຈິດສູ, ຄາຣາເຕໂດ, ໂລນໂບ, ມວຍ, ປັນຈັກສີລັດ, ເປຕັງ, ໂຣວິງ, ກະຕໍ້, ປີນຜາ, ເຕັ້ນລີລາດ, ລອຍນ້ຳ, ປິ່ງປ່ອງ, ເທຄວັນໂດ, ເທັນນິດ, ບານສົ່ງ, ເນັດບອນ, ຍິງທະນູ, ຟັນດາບ, ຟຸດຊໍ, ແລະ ບານສົ່ງຫາດຊາຍ(ສ່ວນ ໂບລິ້ງລໍຖ້າການຕັດສິນໃຈຂອງເຈົ້າພາບອີກເທື່ອໜຶ່ງ)
3. ໄດ້ມີການປະກາດເຈົ້າພາບຈັດການແຂ່ງຂັນ AUG 21st ຊຶ່ງຈະແມ່ນປະເທດອິນໂດເນເຊຍໄດ້ຮັບກຽດເປັນເຈົ້າພາບໃນປີ 2022

(ຂໍ້ມູນ ແລະ ພາບຈາກ: ສະຫະພັນກິລາມະຫາວິທະຍາໄລລາວ)