ວຽງຈັນ ເອັຟທີ ນ້ອງໃໝ່ ເປບຊີ ລາວລີກ 1 ລະດູການ 2020 ເລື່ອນຈາກສາຍ ກ

518

ທ່ານ ສິລິສັນຕິພາບ ໂພຂະສົມບູນ ຫົວໜ້າຄູຝຶກ ວຽງຈັນ ເອັຟທີ ເປີດເຜີຍວ່າ : ວຽງຈັນ ເອັຟທີ ແມ່ນໄດ້ເຕົ້າຮ່ວມນັກກີລາຝຶກຊ້ອມໃນກາງເດືອນມີນາ 2020 ໄດ້ຝຶກຊ້ອມຈຳນວນ 1 ອາທິດ ກ່ອນຈະຢຸດຕິການຝຶກຊ້ອມ ເນື່ອງຈາກໄດ້ຮັບຜົນກະທົບຈາກ ໂຄວິດ-19 ຈົນຕ້ອງໄດ້ໃຫ້ນັກກີລາພັກຝຶກຊ້ອມ ແລະ ໄດ້ບອກນັກກີລາຝຶກຊ້ອມດ້ວຍຕົນເອງຢູ່ເຮືອນ ສ່ວນເລື່ອງນັກກີລາຕ່າງປະເທດແມ່ນໄດ້ຢາກເຂົ້າຮ່ວມທີມປະມານ 2 ຄົນ ເພື່ອເຮັດໃຫ້ທີມມີຄວາມແຂງແກ່ນຂຶ້ນຕື່ມ.

ສໍາລັບ ສະໂມສອນ ວຽງຈັນ ເອັຟທີ ໂດຍໃນເບື້ອງຕົ້ນແມ່ນເປັນອະຄາເດມີ ໃຫ້ກັຫຼາຍສະໂມສອນ ເຊັ່ນ: ສະໂມສອນ ເຄນກິດຕິສັກ, ຄຂປກ ແລະ ລາວໂຕໂຢຕ້າ ໂດຍ ຖືກສ້າງຕັ້ງຂຶ້ນຢ່າງເປັນທາງການ ໃນວັນທີ 12 ພຶດສະພາ 2013 ເປັນສະໂມສອນໜຶ່ງທີ່ ສ້າງນັກກີລາເຍົາວະຊົນ ຮຸ່ນສຶບທອດເຂົ້າສູ່ທີມຊາດຫຼາຍຮຸ່ນນັບຕັ້ງແຕ່ຮຸ່ນນ້ອຍ ຈົນເຖິງ ຊຸດໃຫຍ່ ເຊິ່ງໃນແຕ່ລະປີ ສະໂມສອນຈະເຂົ້າຮ່ວມການແຂ່ງຂັນທັງພາຍໃນ ແລະ ຕ່າງປະເທດເປັນຈຳ ພາຍໃຕ້ການຊີ້ນຳຂອງ ທ່ານ ຄຳສວນ ທອງມະນີວົງ ປະທານ ວຽງຈັນ ເອັຟທີ.

ວຽງຈັນ ເອັຟທີ ແມ່ນໄດ້ຮັບສິດເລື່ອນຊັ້ນຂື້ນໄປແຂ່ງຂັນໃນ ເປບຊີ ລາວພຣີເມຍລີກ 2020 ໃນຖານະອັນດັບ 6 ການແຂ່ງຂັນ ສາຍ ກໍ 2019 ເນື່ອງຈາກ ສະໂມສອນ ປກສ ເອັຟຊີ (2) ໄດ້ອັນດັບ 1, ຊ້າງນ້ອຍ ເອັຟຊີ (2) ໄດ້ອັນດັບ 2, ກອງທັບ ເອັຟຊີ (2) ໄດ້ອັນດັບ 3 ໄດ້ມີທີມ A ຫຼື ທີມໃຫຍ່ຂອງໂຕເອງຢູ່ໃນລີກສູງສຸດນັ້ນແລ້ວ ລວມເຖິງສະໂມສອນ ນະຄອນຫຼວງວຽງຈັນ ເອັຟຊີ ອັນດັບ 4 ບໍ່ເລື່ອນຊັ້ນ, ສະໂມສອນ ມຊ ເອັຟຊີ ອັນດັບ 5 ບໍ່ເລື່ອນຊັ້ນ ສະນັ້ນໂອກາດຈຶ່ງຕົກເປັນ ສະໂມສອນ ວຽງຈັນ ເອັຟທີ ຜົນງານໃນສາຍ ກ 2019 ລົງແຂ່ງ 22 ນັດ ຊະນະ 10, ສະເໝີ 5, ເສຍ 7 ແລະ ມີ 35 ຄະແນນ.

ສໍາລັບ ການແຂ່ງຂັນ ເປບຊີ ລາວພຣີເມຍລີກ 2019 ແມ່ນມີ 6 ທີມເຂົ້າຮ່ວມແຂ່ງຂັນ ໂດຍແຂ່ງຂັນ 3 ຮອບ, ສ່ວນ ເປບຊີ ລາວລີກ 1 ປັດຈຸບັນແມ່ນມີ 7 ທີມແຈ້ງເຈດຈຳນົງເຂົ້າຮ່ວມການແຂ່ງຂັນປະກອບມີ: ສະໂມສອນ ລາວໂຕໂຢຕ້າ ເອັຟຊີ, ມາສເຕີ 7 ເອັຟຊີ, ຊ້າງນ້ອຍ ເອັຟຊີ, ປກສ ເອັຟຊີ, ວຽງຈັນ ເອັຟຊີ ຈາກແຂວງວຽງຈັນ, ວຽງຈັນ ເອັຟທີ ແລະ ເອັສຣາ ເອັຟຊີ ກໍຈະເປັນການແຂ່ງຂັນໃນຮູບແບບລີກໂດຍແຂ່ງຂັນແບບພົບກັນໝົດ 3 ຮອບ ເຊິ່ງອາດຈະມີທີມເພີ່ມອີກ ຕ້ອງຕິດຕາມທາງ ສະຫະພັນບານເຕະແຫ່ງຊາດລາວ ຈະແຈ້ງທາງການອີກຄັ້ງ ເພາະປັດຈຸບັນແມ່ນຍັງຫາເວລາທີ່ເໝາະສົມໃນການເປີດລີກຢ່າງເປັນທາງການ ຫຼັງໄດ້ຮັບຜົນກະທົບຈາກ ໂຄວິດ-19.
(ຂອບໃຈຮູບ-ຂໍ້ມູນຈາກ: ສະຫະພັນບານເຕະແຫ່ງຊາດລາວ)