ປກສ ເອັຟຊີ ຕັ້ງເປົ້າຕິດ 1 ໃນ 3 ຂອງລາວລີກ 1 ລະດູການນີ້

680

ທ່ານ ພູມປັນຍາ ໄຊຊະວົງເພັດ ຫົວໜ້າາຄູຝຶກ ສະໂມສອນ ປກສ ເອັຟຊີ ເປີດເຜີຍຄວາມເຄື່ອນໄຫວຂອງທີມວ່າ: ສຳລັບ ປກສ ເອັຟຊີ ແມ່ນກະກຽມຄວາມພ້ອມມາຕັ້ງແຕ່ເດືອນມັງກອນ ເປັນຕົ້ນມາ ເພື່ອກະກຽມນັກກີລາເຂົ້າຮ່ວມ ການແຂ່ງຂັນ ເປບຊີ ລາວລີກ 1 ( ປ່ຽນຊື່ມາຈາກ ເປບຊີ ລາວພຣີເມຍລີກ ) ປະຈຳປີ 2020 ແລະ ງານມະຫະກຳກີລາແຫ່ງຊາດ ຄັ້ງທີ XI ຢູ່ທີ່ແຂວງ ຊຽງຂວາງ ແຕ່ຈາກທີ່ໄດ້ຮັບແຈ້ງການ ເລື່ອນການແຂ່ງຂັນລາຍການຕ່າງໆ ເນື່ອງຈາກໄດ້ຮັບຜົນກະທົບຈາກ ໂຄວິດ-19 ທີ່ມີການລະບາດຢ່າງຮຸນແຮງ ຈິ່ງໄດ້ແຈ້ງໃຫ້ບັນດານັກກີລາພັກການຝຶກຊ້ອມ.

“ ຢ່າງໃດກໍຕາມ, ນັກກີລາແຕ່ລະຄົນໄດ້ຝຶກຊ້ອມຢູ່ເຮືອນ ແລະ ນັກກີລາສ່ວນໃຫຍ່ຈະໃຊ້ໃນປີນີ້ແມ່ນຈະໃຊ້ນັກເຕະດາວເດັ່ນໜຸ່ມນ້ອຍ 80 % ຊຸດທີ່ ປກສ ໄດ້ແຊ້ມ ການແຂ່ງຂັນບານເຕະ ດີວີຊັນ 1 ໃນ 2 ປີຜ່ານມາ, ສຳລັບຄວາມຄາດຫວັງໃນປີນີ້ແມ່ນໄດ້ຕັ້ງເປົ້າໝາຍໃຫ້ຕິດ 1 ໃນ 3 ການແຂ່ງຂັນ ເປບຊີ ລາວລີກ 1 ປະຈຳປີ 2020 ” ຫົວໜ້າາຄູຝຶກ ປກສ ເອັຟຊີ ກ່າວ.

ສໍາລັບ ປກສ ເອັຟຊີ ເປັນສະໂມສອນດຶກດໍາບັນເຂົ້າຮ່ວມການແຂ່ງຂັນ ລາວພຣີເມຍລີກ ນັບຕັ້ງແຕ່ປີ 2013 – 2019 ເຊິ່ງການແຂ່ງຂັນໃນແຕ່ລະປີຈະຢູ່ອັນດັບຕົ້ນໆຂອງການແຂ່ງຂັນ ລາຍລະອຽດມີດັ່ງນີ໊: ປີ 2013 ໄດ້ອັນດັບ 5, ປີ 2014 ໄດ້ອັນດັບ 4, ປີ 2015 ໄດ້ອັນດັບ 4, ປີ 2016 ໄດ້ອັນດັບ 8, ປີ 2017 ໄດ້ອັນດັບ 2, ປີ 2018 ໄດ້ອັນດັບ 2 ແລະ ປີ 2019 ໄດ້ອັນດັບ 4.

ສ່ວນການແຂ່ງຂັນ ເປບຊີ ລາວພຣີເມຍລີກ 2020 ຈະປ່ຽນຊື່ມາເປັນ ການແຂ່ງຂັນບານເຕະ ເປບຊີ ລາວລີກ 1 ໄດ້ເລື່ອນມື້ເປີດການແຂ່ງຂັນຕາມກຳນົດເວລາເດີມໃນວັນທີ 25 ເມສາ 2020 ອອກໄປຈົນກວ່າສະພາບຈະກັບມາປົກກະຕິ ຫຼັງຈາກທີ່ໄດ້ຮັບຜົນກະທົບຈາກ ໂຄວິດ-19.