ພັດທະລະວະດີ ຜູ້ຮັກສາປະຕູ ທີມຊາດຍິງລາວ ທີ່ໜ້າຕິດຕາມ

495

ມາຮູ້ຈັກນັກກີລາລາວກັນຕໍ່ກັບ ນາງ ພັດທະລະວະດີ ສໍໂພທິຣາຊ ( ພັດທະລະວະດີ ສໍໂພທິຣາຊ ) ຜູ້ຮັກສາປະຕູທີມຊາດຍິງລາວ ເຊິ່ງປີທີ່ຜ່ານມາແມ່ນສາມາດຢຶດຕໍາແໜ່ງຜູ້ຮັກສາປະຕູມື 1 ຂອງທີມຊາດຍິງລາວ ໃນຫຼາຍຮຸ່ນໄປຮູ້ຈັກນໍາກັນເລີຍ.

ພັດທະລະວະດີ ( ແນນ ) ເລົ່າວ່າ: ຊີວິດໃນໄວເດັກກໍເປັນຄົນທີ່ມັກກີລາບານເຕະ ດ້ວຍການຫຼິ້ນຢູ່ຕາມທົ່ງນາ, ແຖວບ້ານຂອງຕົນເອງ ແລະ ແຖວໂຮງຮຽນ ຕັ້ງແຕ່ຍັງເປັນເດັກນ້ອຍສະໄໝຮຽນປະຖົມ ພາຍໃຕ້ການຊັກຊວນຂອງ ໝູ່ເພື່ອນ ແລະ ພໍ່ແມ່ທີ່ຊຸກຍູ້ສົ່ງເສີມມາຕະຫຼອດ ໂດຍສະເພາະແມ່ນພໍໍ່ທີ່ເປັນຕົ້ນແບບຂອງຕົນເອງໃນການຫຼິ້ນກີ ຈົນເຮັດໃຫ້ຕົວເອງຕິດປະສົມແຂວງ, ທີມເມືອງ ແລະ ທີມໂຮງຮຽນ ເຂົ້າຮ່ວມການແຂ່ງຂັນລາຍການຕ່າງໆ ເຊິ່ງໄດ້ຮັບລາງວັນຊະນະເລີດຕະຫຼອດມາ.

ຈົນມາເຖິງປີ 2017 ໄດ້ກ້າວສູູ່ ທີມຊາດລາວ ຮຸ່ນອາຍຸບໍ່ເກີນ 15 ປີໄດ້ເຂົ້າຮ່ວມຄັດເລືອກທີມຊາດ ໂດຍຕິດ 1 ໃນ 25 ນັກເຕະຊຸດດັ່ງກ່າວ ໂດຍເລີ່ມຈາກການເປັນຜູ້ຮັກສາປະຕູມື 4 ຂອງທີມ, ມາຮອດປີ 2018 ໄດ້ມາຄັດເລືອກອີກຄັ້ງ ເພື່ອເຂົ້າຮ່ວມການແຂ່ງຂັນບານເຕະຍິງຊີງແຊັມອາຊຽນ ຮຸ່ນອາຍຸບໍ່ເກີນ 16 ປີ ປະຈຳປີ 2018 ທີ່ປະເທດອິນໂດເນເຊຍ ຖືກຄັດເລືອກເຂົ້າທີມຊາດລາວ ເປັນຄັ້ງທຳອິດ ແລະ ກໍສ້າງຜົນງານໄດ້ດີພໍສົມຄວນ ພາທີມໄດ້ອັນດັບ 4 ຂອງການແຂ່ງຂັນ ຈາກລາຍການດັ່ງກ່າວເປັນການແຈ້ງເກີດ ຈົນສາມາດຢຶດຜູ້ຮັກສາປະຕູມືໜຶ່ງຂອງທີມໃນຮຸ່ນ ອາຍຸບໍ່ເກີນ 16, 17 ແລະ 19 ປີ ແນ່ນອນຄວາມຝັນຂອງນ້ອງກໍຢາກຕິດທີມຊາດລາວ ຊຸດໃຫຍ່ ແລະ ໄປຫຼິ້ນກັບສະໂມສອນ ຕ່າງປະເທດໃນອະນາຄົດ

ສໍາລັບ ພັດທະລະວະດີ ເກີດວັນທີ 17 ກັນຍາ 2003 ທີ່ບ້ານທ່າສະໂນ ນະຄອນໄກສອນພົມວິຫານ ແຂວງສະຫວັນນະເຂດ ລວງສູງ 165 ຊັງຕີແມັດ ແລະ ນໍ້າໜັກ 70 ກິໂລກຣາມ ຜົນງານທີ່ຜ່ານມາມີດັ່ງນີ້:
– 2018 AFF U16 GIRLS’ CHAMPIONSHIP 2018 ຢູ່ທີ່່ປະເທດອິນໂດເນເຊຍ ໄດ້ອັນດັບ 4
– 2018 AFC U-16 WOMEN’S CHAMPIONSHIP 2019, Qualifiers Round 1 ຢູ່ທີ່ປະເທດມົງໂກລີ ເປັນແຊ້ມກຸ່ມ ບີ

– 2019 AFC U-16 WOMEN’S CHAMPIONSHIP 2019, Qualifiers Round 2 ຢູ່ທີ່ ສປປລາວ
– 2019 Jockey’s Club Girls’ International Youth Invitational Football Tournament U17 ຢູ່ທີ່ ຮົງກົງ ໄດ້ອັນດັບ 1
– 2019 Bangamata U-19 Women’s International Gold Cup 2019 ຢູ່ປະເທດບັງກະລາເທດ ໄດ້ອັນດັບ 1 ຮ່ວມ.
(ຮູບ-ຂໍ້ມູນຈາກ: ສະຫະພັນບານເຕະແຫ່ງຊາດລາວ)