ສໍ​ລະ​ສັກ ທິ​ລະ​ວົງ ບອກເຫດຜົນທີ່ເລືອກຫຼິ້ນຕໍາແໜ່ງຜູ້ຮັກສາປະຕູຍ້ອນ…ຈົນຕິດທີມຊາດລາວ

749

ສໍລະສັກ ທິລະວົງ ຫຼື ກົບ ຜູ້ຮັກສາປະຕູດາວເດັ່ນທີມຊາດລາວ ກາຍເປັນທີ່ຮູ້ຈັກກັນຢ່າງຫຼວງຫຼາຍ ໃນງານ​ມະ​ຫະ​ກຳ​ກິ​ລາ​ຊີ​ເກມ ຄັ້ງ​ທີ 30 ທີ່​ປະ​ເທດ​ຟີ​ລິບ​ປິນ ທີ່​ຜ່າ​ນ​ມາ ໂດຍ​ສະ​ເພາະ​ນັດ​ທີ່ ທີມ​ຊາດ​ລາວ ເສຍ​ໃຫ້ ທີມ​ຊາດ​ໄທ 0-2 ສໍ​ລະ​ສັກ ສາ​ມາດ​ຊ່ວຍ​ປ້ອງ​ກັນ​ປະ​ຕູ ບໍ່​ໃຫ້​ທີ​ມ​ຊາດ​ລາວ ເສຍ​ປະ​ຕູ​ຫຼາຍ​ຄັ້ງ ພ້ອມທັງເປັນການແຈ້ງເກີດໄປເລີຍ ເຊິ່ງປັດຈຸບັນແມ່ນຫຼິ້ນໃຫ້ກັບ ຊ້າງນ້ອຍ ເອັຟຊີ ທີມອັນດັບ 3 ໃນເປບຊີ ລາວພຣີເມຍລີກ 2019.

ສໍລະສັກ ເລົ່າວ່າ: ການ​ເຂົ້າ​ສູ່​ວົງ​ການ​ບານ​ເຕະ ແມ່ນເລີ່ມ​ຝຶກ​ຊ້ອມ​ຢູ່ ສູນສະຫວັນ ເຊັນເຕີ ແລະ ເລີ່ມຫຼິ້ນກີລາຊະນິດນີ້ມາຕັ້ງແຕ່ 14 ປີ ​ເປັນຄົນທີ່​ມັກ​ເປັນ​ຜູ້​ຮັກ​ສາ​ປະ​ຕູ​ແມ່ນ ເວລາເບິ່ງເຕະບານກໍຈະມັກເບິ່ງຜູ້ຮັກສາປະຕູເປັນພິເສດເລີຍເລີ່ມຊ້ອມເປັນຜູ້ຮັກສາປະຕູ ແລະ ເຫັນວ່າມີຄວາມສຸກ ໂດຍເຮັດໄດ້ດີກ່ວາຕຳແໜ່ງອື່ນ​ເລີຍ​ເລືອກ​ຫຼິ້ນຕໍາແໜ່ງ​ຜູ້​ຮັກ​ສາ​ປະ​ຕູ ສ່ວນຄວາມຝັນແມ່ນຢາກໄປຫຼິ້ນຢູ່ທີ່ສະໂມສອນໃນຕ່າງປະເທດ.​

ສໍລະສັກ ທິລະວົງ ເກີດເມື່ອວັນທີ 03 ພະ​ຈິກ 2003 ເກີດ​ຂຶ້ນ​ຢູ່​ທີ່​ ບ້ານສະພານໃຕ້ ນະຄອນໄກສອນພົມວິຫານ ແຂວງສະຫວັນນະເຂດ ເປັນນັກເຕະທີ່ຮູບຮ່າງສູງເຖິງ 179 ຊັງ​ຕີ​ແມັດ ແລະ ນ້ຳໜັກ 73 ກິ​ໂລກ​ຣາມ ສາມາດໄຕ່ເຕົ້າຂຶ້ນມາຕິດ ທີມຊາດລາວແຕ່ ປີ 2018 ເປັນ​ຕົ້ນ​ມາ ຈົນມາຮອດປັດຈຸບັນ ແລະ ໄດ້ເຂົ້າຮ່ວມຫຼາຍລາຍການດັ່ງນີ້:
– JENESYS Japan-ASEAN U16 Football Exchange Programme ໃນວັນທີ 6-15 ມີນາ 2018 ທີ່ເມືອງ ມິຢາຊາກິ ປະເທດ ຍີ່​ປຸ່ນ.
– AFF​ U16 CHAMPIONSHIP 2018 ໃນວັນທີ 29 ກໍລະກົດ ຫາ 11 ສິງຫາ 2018 ທີ່ເມືອງ ຊູຣາບາຢາ ປະເທດ ອິນໂດເນເຊຍ
– JENESYS​ U17 2018 ໃນວັນທີ 3-10 ຕຸລາ 2018 ທີ່ປະເທດ ຍີ່​ປຸ່ນ.
– AFC U23 CHAMPIONSHIP THAILAND 2020 QUALIFIERS ໃນວັນທີ 19-26 ມີນາ 2019 ທີ່ນະ​ຄອນ​ຫຼວງ ກົວລາລຳເປີ ປະເທດມາເລເຊຍ.

– FIFA World Cup Qualifiers ໃນວັນທີ 11 ມິ​ຖຸ​ນາ 2019 ທີ່ປະເທດ ບັງກລາເທດ
– AFF U18 CHAMPIONSHIP 2019 ໃນວັນທີ 6-19 ສິງຫາ 2019 ທີ່ ນະຄອນ ໂຮຈີມິນ ສ​ສ ຫວຽດ​ນາມ
– AFC U19 CHAMPIONSHIP 2020 QUALIFIERS ໃນວັນທີ 3-10 ພະຈິກ 2019 ທີ່ ໄຕ້​ຫວັນ
– Seagame 2019 ໃນວັນທີ 23 ພະຈິກ ຫາ ວັນທີ 5 ທັນວາ ທີ່ປະເທດ ຟີລີບປິນ.
(ຮູບ-ຂໍ້ມູນຈາກ: ສະຫະພັນບານເຕະແຫ່ງຊາດລາວ)