ແລ່ນ-ລານ ກອງທັບ ສືບຕໍ່ຝຶກຊ້ອມປົກກະຕິ ຮັກສາມາດຕະຖານ ພ້ອມລ່າຫຼຽນຄຳ ຊຽງຂວາງ ເກມ

522

ທັບນັກກີລາແລ່ນ-ລານ ກະຊວງປ້ອງກັນປະເທດ ຫຼື ກອງທັບ ສືບຕໍ່ດຳເນີນການຝຶກຊ້ອມຢ່າງເປັນປົກກະຕິ ເພື່ອຮັກສາມາດຕະຖານຄວາມແຂງແກ່ນໃຫ້ທັບນັກກີລາແລ່ນ-ລານ ກອງທັບ ຈຳນວນ 17 ຄົນ ໃນນັ້ນເປັນຍິງ 5 ຄົນ ກຽມຄວາມພ້ອມທຸກສະຖານະການ ເຂົ້າຮ່ວມລ່າຫຼຽນຄຳ ໃນງານມະຫະກຳກກີລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ.

ເຖິງວ່າ ຊຽງຂວາງ ເກມ ທີ່ເລື່ອນອອກໄປແບບບໍ່ມີກໍານົດ ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງເຊື້ອຈຸລະໂລກສາຍພັນໃໝ່ ໂຄວິດ-19, ແຕ່ທັບນັກກີລາແລ່ນ-ລານຂອງ ປະຊວງປ້ອງກັນປະເທດ ຫຼື ກອງທັບ ຍັງສືບຕໍ່ຊ້ອມຢ່າງຕໍ່ເນື່ອງ ເພື່ອກຽມພ້ອມສໍາລັບທຸກສະຖານະການແຂ່ງຂັນ ໃນການກຽມເຂົ້າຮ່ວມງານດັ່ງກ່າວ.

ຫຼ້າສຸດ ທ່ານ ຍິງຍົດ ໂນວອມ ຄະນະຄູຝຶກທັບນັກກີລາແລ່ນ-ລານ ກອງທັບ ເປີດເຜີຍວ່າ: ຫຼັງຈາກທາງລັດຖະບານ ກໍຄື ກະຊວງສຶກສາທິການ ແລະ ກີລາ ໄດ້ແຈ້ງການໂຈະການແຂ່ງຂັນງານມະຫະກຳກີລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ທີ່ແຂວງຊຽງຂວາງ ຮັບກຽດເປັນເຈົ້າພາບ ຢ່າງເປັນທາງການ ເພື່ອປ້ອງກັນຈາກ ໂຄວິດ-19 ທີ່ແຜ່ລະບາດຢ່າງໜັກໃນທົ່ວໂລກ ເຮັດໃຫ້ຫຼາຍແຂວງ, ນະຄອນຫຼວງວຽງຈັນ ແລະ ບັນດາກະຊວງ ກໍໄດ້ມີການແຈ້ງການຕໍ່ເຖິງນັກກີລາເພື່ອຢຸດການຝຶກຊ້ອມຊົວຄາວ.

“ ແຕ່ທາງທັບນັກກີລາແລ່ນ-ລານ ກອງທັບ ຂອງພວກເຮົາ ຈຳນວນ 17 ຄົນ, ຍິງ 5 ຄົນ ບໍໄດ້ຢຸດພັກການຝຶກຊ້ອມ ທຸກຄົນແມ່ນພ້ອມພຽງກັນເອົາໃຈໃສ່ຕໍ່ການມາຝຶກຊ້ອມຢ່າງເປັນປົກກະຕິ ທີ່ສະໜາມກີລາເຈົ້າອານຸວົງ ທຸກຄົນສາມາດຮັກສາສະຖິຕິຂອງຕົນເອງຢ່າງໜ້ຽວແໜ້ນ ແລະ ຖ້າຫາກສາມາດຝຶກຊ້ອມໄດ້ຄືແນວນີ້ ຈົນກວ່າຈະເຖິງ ຊຽງຂວາງ ເກມ ທີ່ຈະກັບມາຈັດໃນເວລາທີ່ເໝາະສົມ ເຊື່ອວ່າສະຖິຕິແຕ່ລະຄົນຈະເພີ່ມຂຶ້ນສູງກວ່າເກົ່າທັນທີ່ ແລະ ເຊື່ອໝັ້ນວ່ານັກກີລາແລ່ນ-ລານ ກອງທັບ ຈະສາມາດສ້າງຜົນງານ ໄດ້ດີກວ່າ ງານອຸດົມໄຊ ເກມ ເມື່ອປີ 2014 ໃນຄັ້ງນີ້ ພວກເຮົາ ຍາດໄດ້ພຽງ 2 ຫຼຽນຄຳ ” ທ່ານ ຍິງຍົດ ໂນວອມ ກ່າວ.