ລາວ-ທ໊ອບ ຄັດໄດ້ແລ້ວ 20 ນັກເຕະ ກຽມພ້ອມລຸຍ ລາວລີກ 2020

574

ເມື່ອວັນທີ 22 ຜ່ານມາ ທີ່ສະໜາມບານເຕະວິທະຍາໄລສັບພະວິຊາ ໄດ້ມີພິທີຄັດເລືອກນັກເຕະຂອງ ລາວ-ທ໊ອບ ເອັຟຊີ ໂດຍມີນັກກີລາເຂົ້າຮ່ວມຄັດເລືອກ 100 ກວ່າຄົນ, ຈົນຫຼ້າສຸດໃນວັນທີ 24 ມີນາ 2020 ໄດ້ມີການປະກາດ 20 ລາຍຊື່ນັກເຕະທີ່ຜ່ານການຄັດເລືອກ.

ທ່ານ ປອ. ພັນທະວິໄລ ນວນຮຸ່ນ ຮອງອໍານວຍການຂອງວິທະຍາໄລ ລາວ-ທ໊ອບ ທັງເປັນປະທານສະໂມສອນ ລາວ-ທ໊ອບ ເປີດເຜີຍວ່າ: ການຄັດເລືອກນັກເຕະຊຸດນີ້ແມ່ນເພື່ອກະກຽມທີມເຂົ້າຮ່ວມການແຂ່ງຂັນ ຄອມມານໂດ ລາວລີກ 2 (ສາຍ ກ) ທີ່ຈະເປີດສາກຂຶ້ນໃນເດືອນພຶດສະພາ 2020 ແລະ ອີກຢ່າງໜຶ່ງກໍແມ່ນການສົ່ງເສີມກິດຈະກໍາພາຍໃນ ເພື່ອສົ່ງເສີມໃຫ້ນັກຮຽນມີຄວາມສາມັກຄີ ເຊິ່ງສາມາດຄັດໄດ້ແລ້ວ 20 ຄົນທີ່ດີເດັ່ນ ແລະ ຈະມີການຄັດເອົາອີກ 2 ຄົນໃນຂັ້ນຕອນຕໍ່ໄປກ່ອນການແຂ່ງຂັນຈະເລີ່ມຂຶ້ນ ແລະ ພວກເຮົາຈະຮ່ວມກັນສຸມໃສ່ເພື່ອຫວັງຕິດ 1 ໃນ 4 ໃຫ້ໄດ້.

ສໍາລັບ 20 ນັກເຕະທີ່ຜ່ານການຄັດເລືອກໃນທ້າຍອາທິດທີ່ຜ່ານມາ ປະກອບມີ: ສັນຕິສຸກ ຄໍາຜານຸວົງ, ອານຸກອນ ວັນນະສີ, ກິດຕ້າ ນ້ອຍຜີວພັນ, ອຸດົມຄຳ ສີວິໄລ, ວົງຍາລັດ ຈັນສຸດາ, ຕິກ ແກ້ວມາລາຄໍາ, ພົມມະສອນ ສາງແກ້ວ, ໄຊຍາ ມົນລັງສີ, ພອນສະຫວັນ ພົມມະຈັນ, ບຸນຫຼົງ ວົງພັນ, ຄໍາພຸດ ວົງພັກດີ, ວິລະກອນ (ໝີ), ມະໂນລົມ ພົມສຸວັນ, ອາທິດ ພິລາສີ, ເຊນ, ຊິດຕີ້, ອ່ອນແກ້ວ ຄໍາສຸລິຍາ, ຕາວັນ, ລັດວິຫານ ສີປະກອນ ແລະ ຄໍາປັນຍາ.