ວັດຖຸອຸປະກອນຕ່າງໆ ທີ່ຈະຮັບໃຊ້ ຊຽງຂວາງ ເກມ ຮອດເປົ້າໝາຍຄົບຖ້ວນ ລໍຖ້າພຽງວັນເປີດ

660

ວັດຖຸ, ອຸປະກອນ ແລະ ສິ່ງປະກອບຕ່າງໆ ທີ່ຈະຮັບໃຊ້ງານກີລາແຫ່ງຊາດ ຄັ້ງທີ 11 ຫຼື ຊຽງຂວາງເກມ ໄດ້ຮອດຈຸດໝາຍປາຍທາງ ແຂວງຊຽງຂວາງ ຢ່າງເປັນທາງການ ຫຼ້າສຸດໃນວັນທີ 18 ມີນາ 2020 ໄດ້ມີພິທີມອບ-ຮັບຢ່າງເປັນທາງການ ໂດຍແມ່ນສູນຈຳໜ່າຍເຄື່ອງກິລາຄົບວົງຈອນ ສະເຕດ້ຽມ ສະປອດ ເປັນຜູ້ຈັດຊື້ ແລະ ນຳສົ່ງ ໃຫ້ກຽດການກ່າວມອບໂດຍທ່ານ ວຽງສະຫວັນ ແສງຈັນ ເຈົ້າຂອງສູນຈຳໜ່າຍເຄື່ອງກີລາຄົບວົງຈອນ ສະເຕດ້ຽມ ສະປອດ ຕົວແທນຈຳໜ່າຍເຄື່ອງກີລາ FBT ພຽງຜູ້ດຽວໃນ ສປປ ລາວ ແລະ ຕາງໜ້າກ່າວຮັບໂດຍ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ທັງເປັນຫົວໜ້າກໍາມະການເຕັກນິກ-ຈັດການແຂ່ງຂັນ, ມີຄະນະຫົວໜ້າກໍາມະການເຕັກນິກ-ຈັດການແຂ່ງຂັນ, ບັນດາພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ທ່ານ ວຽງສະຫວັນ ແສງຈັນ ເຈົ້າຂອງສູນຈຳໜ່າຍເຄື່ອງກີລາຄົບວົງຈອນ ສະເຕດ້ຽມ ສະປອດ ຕົວແທນຈຳໜ່າຍເຄື່ອງກີລາ FBT ພຽງຜູ້ດຽວໃນ ສປປ ລາວ ລາຍງານວ່າ: ງວດທີ 1 ໄປຮອດແຂວງຊຽງຂວາງໃນວັນເສົາທີ 14 ມີນາ 2020 ເວລາ 14:30 ໂມງ, ເກັບມ້ຽນໄວ້ສະໜາມກີລາໄຊຊະນະ ປະກອບມີອຸປະກອນບານເຕະ, ມວຍສາກົນ, ມວຍລາວ, ເທຄວັນໂດ, ໜ້າເກັກ, ເທັນນິສ, ປັນຈັກສີລັດ, ວູຊູ, ບານສົ່ງໃນຮົ່ມ,ບານສົ່ງຫາດຊາຍ, ກະຕໍ້, ແລ່ນ-ລານ, ປິ່ງປ່ອງ, ດອກປີກໄກ່, ບານບ້ວງ, ເປຕັງ, ກະຕໍ້ຊູນລອນ, ເກີບ ແລະ ຖົງຕີນ.

ຫຼ້າສຸດຮອດວັນທີ 17 ມີນາ 2020 ເວລາ 10:30 ໂມງສືບຕໍ່ຂົນສົ່ງເຄື່ອງກີລາງວດທີ 2 ຮອດແຂວງຊຽງຂວາງ ແລະ ເວລາ 14:00 ໂມງ ຈັດເຄື່ອງລົງເກັບໄວ້ໃນສະໜາມກີລາໄຊຊະນະມີ: ອຸປະກອນກີລາບິລລຽນ-ສະນຸກເກີ, ຍິງທະນູ, ລົດຖີບ, ໝາກເສິກ, ໝາກແລ້, ມວຍປໍ້າ, ຄາຣາເຕໂດ, ເຮືອຊ່ວງ, ບານບ້ວງ, ປິ່ງປ່ອງ, ຢູໂດ, ລອຍນໍ້າ, ຍິງປືນ ແລະ ຊຸດກໍາມະການຕັດສິນ.

ວັດຖຸອຸປະກອນກີລາທຸກປະເພດ, ທຸກອັນໄດ້ຜ່ານການກວດກາຈາກຄະນະກໍາມະການເຕັກນິກແຂວງ, ສູນກາງ ແລະ ພາກສ່ວນກໍາມະການທີ່ກ່ຽວຂ້ອງ ແຂວງຊຽງຂວາງ ຢ່າງລະອຽດ ແລະ ຖືກຕ້ອງຄົບຖ້ວນຕາມແຜນການຈັດຊື້ທຸກຢ່າງ ເຊິ່ງຂ້້າພະເຈົ້າຕາງໜ້າສູນກີລາສະເຕດ້ຽມຂໍຢັ້ງຢືນ ແລະ ຮັບປະກັນດ້ວຍກຽດວ່າ ອຸປະກອນກີລາທັງໝົດ ທີ່ຈະນໍາໃຊ້ເຂົ້າໃນມະຫະກໍາກີລາແຫ່ງຊາດ ຄັ້ງທີ 11 ມີຄຸນນະພາບ ແລະ ໄດ້ມາດຕະຖານຂອງສາກົນແທ້.

ແຫຼ່ງ: ຂ່າວເສດຖະກິດ-ການຄ້າ lao economic daily