ບານເຕະສາຍ ກ ປ່ຽນມາໃຊ້ຊື່ ລາວລີກ 2 ພ້ອມເງື່ອນໄຂໃໝ່ ຄາດເປີດແຂ່ງຕົ້ນເດືອນພຶດສະພາ

679

ການແຂ່ງຂັນບານເຕະສາຍ ກ ຈັດມາແຕ່ປີ 2017 ຈົນມາເຖິງປີ 2020 ແມ່ນປ່ຽນຊື່ມາເປັນ ຄອນມານໂດ ລາວລີກ 2 ໂດຍກໍານົດເປີດການແຂ່ງຂັນພາຍໃນວັນທີ 2 ພຶດສະພາ 2020 ເຊີ່ງຈະເປັນການແຂ່ງຂັນໃນຮູບແບບລີກໂດຍແຂ່ງຂັນແບບພົບກັນໝົດ 2 ຮອບ ຈໍານວນທີມໃນການແຂ່ງຂັນດັ່ງກ່າວແມ່ນສູງສຸດບໍ່ເກີນ 12 ທີມ.
ການແຂ່ງຂັນບານເຕະໃນລີກຂອງ ສປປ ລາວ ໃນໄລຍະທີ່ຜ່ານມາ ສະໂມສອນໜຶ່ງສາມາດສິ່ງເຂົ້າຮ່ວມໄດ້ 2 ລາຍການ ກໍຄື: ເປບຊີ ລາວພຣີເມຍລີກ ( ລາວລີກ 1 ) ແລະ ສາຍ ກ ( ລາວລີກ 2 ), ແຕ່ປີ 2020 ຈະບໍ່ມີແບບນັ້ນອີກຄື: ຈະເນັ້ນຈັດແບບສາກົນ ໂດຍສະເພາະໃນລີກອັງກິດ ສະໂມສອນໜຶ່ງຈະມີທີມຊຸດດຽວສະເພາະລີກ.

ດັ່ງນັ້ນ, ການແຂ່ງຂັນບານເຕະ ລາວລີກ 2 ປີນີ້ ສຕລ ບໍ່ອະນຸຍາດໃຫ້ສະໂມສອນໃນການແຂ່ງຂັນເປັບຊີ ລາວລີກ 1 ສົ່ງທີມສຳຮອງ ຫຼື ທີມສອງຂອງສະໂມສອນເຂົ້າຮ່ວມການແຂ່ງຂັນບານເຕະ ຄອມມານໂດ ລາວລີກ 2 ລະດູການ 2020 ຕາມລາຍລະອຽດດັ່ງລຸ່ມນີ້:

– ສະໂມສອນໃນການແຂ່ງຂັນ ເປັບຊີ ລາວລີກ 1 ລະດູການ 2020 ບໍ່ສາມາດສົ່ງທີມສຳຮອງ ຫຼື ທີມສອງຂອງສະໂມສອນເຂົ້າຮ່ວມແຂ່ງຂັນ ຄອມມານໂດ ລາວລີກ 2 ລະດູການ 2020, ແຕ່ສາມາດສົ່ງເຂົ້າຮ່ວມການແຂ່ງຂັນເຍົາວະຊົນຊີງຂັນ ສຕລ ລຸ້ນ ອາຍຸບໍ່ເກີນ 15 ແລະ 18 ປີໄດ້.
– ເພື່ອເປັນການສ້າງໃຫ້ ຄອມມານໂດ ລາວລີກ 2 ມີຄວາມຫຼາກຫຼາຍດ້ານສະໂມສອນ ແລະ ມີການເຂົ້າຮ່ວມຂອງສະໂມສອນໃໝ່ຫຼາຍຂື້ນ ລວມທັງນັກກີລາໜ້າໃໝ່ໃນການແຂ່ງຂັນ.
(ຂ່າວຈາກ: ໜັງສືພິມເສດຖະກິດ-ການຄ້າ; ຮູບຈາກ: ສະຫະພັນບານເຕະແຫ່ງຊາດລາວ)