ເປີດກອງປະຊຸມ ວຽກງານກິລາລະດັບສູງ ປະຈຳປີ 2019 ທີ່ແຂວງຊຽງຂວາງ

525

ຜູ້ແທນກິລາຈາກບັນດາແຂວງ, ກະຊວງ, ສະຖາບັນ, ມະຫາວິທະຍາໄລ, ວິທະຍາໄລ, ສະຫະພັນກິລາແຫ່ງຊາດ ທີ່ກ່ຽວຂ້ອງ ກວ່າ​ 100 ຄົນ ໄດ້ເຂົ້າຮ່ວມກອງປະຊຸມສະຫຼຸບການຈັດຕັ້ງປະຕິບັດວຽກງານ ກິລາລະດັບສູງ ປະຈຳປີ 2019 ທົ່ວປະເທດ ແລະ ທິດທາງແຜນການ ປະຈຳປີ 2020 ຊຶ່ງໄຂຂຶ້ນໃນຕອນເຊົ້າ ວັນທີ 21 ມັງກອນ ທີ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງຊຽງຂວາງ.

ກອງປະຊຸມ ເຊິ່ງພາຍໃຕ້ການເປັນປະທານຂອງທ່ານ ບົວລານ ສິລິປັນຍາ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ບົວລີ ພັນນາວົງ, ຫົວໜ້າພະແນກ ສຶກສາທິການ ແລະ ກິລາ ແຂວງຊຽງຂວາງ ແລະ ທ່ານ ແສງພອນ ພົນອາມາດ, ຫົວໜ້າກົມກິລາລະດັບສູງ, ກະຊວງສຶກສາທິການ ແລະ ກິລາ, ໄດ້ຮັບຟັງການລາຍງານຮ່າງການຈັດຕັ້ງປະຕິບັດວຽກງານກິລາລະດັບສູງ ປະຈຳປີ 2019 ແລະ ແຜນການວຽກຈຸດສຸມ ໃນປີ 2020; ຮ່າງຂໍ້ຕົກລົງຂອງລັດຖະມົນຕີ ວ່າດ້ວຍເຄື່ອງແບບກິລາ-ກາຍຍະກຳ; ຄົ້ນຄວ້າ ແລະ ການປະກອບຄຳຄິດຄຳເຫັນ ຕໍ່ຮ່າງເອກະສານຕ່າງໆທີ່ກ່ຽວຂ້ອງ.

ໃນການກ່າວເປີດກອງປະຊຸມ, ທ່ານ ບົວລານ ສິລິປັນຍາ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການຈັດກອງປະຊຸມຄັ້ງນີ້ ເຊິ່ງເປັນການສະຫຼຸບຕີລາຄາວຽກງານ, ຖອດຖອນຈຸດດີ-ຈຸດອ່ອນ, ສິ່ງທ້າທາາຍ, ຂໍ້ຄົງ ຄ້າງ ແລະ ວຽກຈຸດສຸມ ໃນການຈັດຕັ້ງປະຕິບັດວຽກງານກິລາລະດັບສູງ ໃນໄລຍະ 1 ປີ ຜ່ານມາ ແລະ ແຜນປີ 2020 ເຊິ່ງຍັງເປັນປີມ້ວນທ້າຍຂອງການຈັດຕັ້ງປະຕິບັດແຜນພັດທະນາ ເສດະກິດ-ສັງຄົມ ຄັ້ງທີ 8 ແລະ ກະກຽມກ້າວເຂົ້າໃສ່ແຜນພັດທະນາ 5 ປີ ຄັ້ງທີ 9 ຂອງພັກ ຂອງລັດຖະບານ. ດັ່ງນັ້ນ, ບັນດາກົມວິຊາການບັນ ດາສະຫະພັນ ກໍຕ້ອງມີການກະກຽມວາງແຜນໃສ່ການພັດທະນາກິລາ ຢູ່ບັນດາແຂວງໃນຂອບເຂດທົ່ວປະເທດ, ທົບທວນຄືນເບິ່ງບັນດາກົດໝາຍ, ລຸ່ມກົດໝາຍ, ນິຕິກຳ ຫຼື ເອກະສານທີ່ກ່ຽວຂ້ອງທີ່ສຳຄັນ ແລະ ມີຄວາມຈຳເປັນໃຫ້ແກ່ກົມກິລາລະດັບສູງ ລວມທັງບັນດາສະຫະພັນກິລາໃນບັນດາແຂວງທົ່ວປະເທດ ວ່າມີອັນໃດແດ່ຄວນປັບປຸງແກ້ໄຂ ໃນປີ 2020 ນີ້.

ໃນກອງປະຊຸມ ຄະນະຜູ້ແທນຍັງໄດ້ຜັດປ່ຽນກັນ ປະກອບຄຳຄິດຄຳເຫັນ ໃສ່ຮ່າງບົດສະຫຼຸບ, ຮ່າງຂໍ້ຕົກລົງຂອງລັດຖະມົນຕີວ່າດ້ວຍເຄື່ອງແບບກິລາທີມຊາດ ລວມທັງບັນຫາຕ່າງໆທີ່ປິ່ນອ້ອມ ຢ່າງກົງໄປກົງມາ ເຊິ່ງກອງປະຊຸມຈະດຳເນີນໄປຮອດວັນທີ 22 ມັງກອນ.

ຂໍ້ມູນ#ຄົນຂ້າງສະໜາມ ລາຍງານຈາກແຂວງຊຽງຂວາງ