ທີມຊາດລາວ ຕ້ານ ຫວຽດນາມ ບໍ່ໄຫວເສຍໄປ 1-6 ລຸ້ນອີກ 3 ນັດສຸດທ້າຍບານເຕະຊີເກມ

526

ກ່ອນໜ້ານີ້ ການແຂ່ງຂັນບານເຕະຊາຍ ໃນງານມະຫາກຳກິລາຊີເກມ ຄັ້ງທີ 30 ທີ່ປະເທດຟີລິບປິນ ໃນນະຄອນຫລວງມານິລາ ໃນວັນທີ 26 ພະຈິກນີ້ ທີມຊາດລາວ ລົງສະໜາມນັດທໍາອິດພົບກັບ ທິມຊາດສິງກະໂປ ປາກົດວ່າ: ທິມຊາດລາວ ເສຍປຽບຊັດເຈນດ້ານຮູບຮ່າງ ໂດຍເຄິ່ງເວລາ ຕ້ອງປ້ອງກັນການໂຈມຕີບານສູງຂອງສິງກະໂປຢ່າງຮັດກຸມ ໂອກາດຍິງຂອງທັງສອງທິມມີ ແຕ່ບໍ່ຫລາຍ ຈົບດ້ວຍຜົນສະເໝີກັນ 0-0, ສ່ວນເຄິ່ງເວລາທີ 2 ທັງສອງສືບຕໍ່ເດີນໜ້າແລກກັນ ແຕ່ຍັງຄົງຮັກສາເກມຮັບຢ່າງແໜ້ນໜາ ບໍ່ໄດ້ກໍ່ບໍ່ໃຫ້ເສຍ ເຮັດໃຫ້ເຈາະປະຕູກັນລຳບາກ ທັງສອງມີໂອກາດໄດ້ປະຕູ ແຕ່ຂາດຄວາມຄົມ ສຸດທ້າຍຈົບເກມ 0-0 ແບ່ງທິມລະຄະແນນ

ຫຼ້າສຸດ ທີມຊາດລາວ ກຽມລົງສະໜາມນັດທີ 2 ຂອງກຸ່ມນີ້ (ກຸ່ມບີ) ໃນວັນທີ 28 ພະຈິກນີ້ ພົບກັບ ຫວຽດນາມ ພົບ ລາວ ໃນເວລາ 16:00 ໂມງ ( 15:00 ໂມງ ເວລາໃນບ້ານເຮົາ ) ປາກົດວ່າ: ເຄິ່ງເວລາທໍາອິດ ທີມຊາດ ຫວຽດນາມ ສະແດງສັກກະຍະພາບໃຫ້ເຫັນໄດ້ຊັດເຈນ ໃຊ້ເວລາພຽງ 17 ນາທີຍິງໄດ້ 2 ປະຕູຈາກການຍິງຂອງ ຫງຽນ ລິນ ທັງສອງປະຕູ ເຮັດໃຫ້ ຫວຽດນາມ ນໍາຢູ 2-0

ສ່ວນເຄິ່ງເວລາທີ 2 ຫວຽດນາມ ມາໄດ້ປະຕູທີ 3 ນາທີໆ 53 ຈາກການຍິງຂອງ ດັງ ໂດ ແລະ ປະຕູທີ 4 ຈາກ ຫງຽນ ລິນ ນາທີໆ 56 ກ່ອນທີ່ ທີມຊາດລາວ ຈະໄດ້ປະຕູຕີໄຂ່ແຕກຈາກການຍິງຂອງ ກ້າຫານ ໂໝ່ງເຂົ້າປະຕູໄປໄລ່ມາເປັນ 1-4 ແລະ ເຂົ້າສູ່ທ້າຍເກມນາທີໆ 83 ຫວຽດນາມ ໄດ້ປະຕູທີ 5 ຈາກການຍິງຂອງ ຫງຽນ ຮອງ ແລະ ປະຕູໄຊຈາກ ຫງຽນ ກວາງ ໄຮ ໃນໄລຍະຕໍ່ເວລາພິເສດ ຈົບການແຂ່ງຂັນ ຫວຽດນາມ ເອົາຊະນະໄປ 6-1

ສະຫຼຸບຕາຕະລາງ ກຸ່ມ B ຫວຽດນາມ ຂຶ້ນນໍາກຸ່ມຕໍ່ຈາກການມີ 6 ຄະແນນຈາກ 2, ອິນໂດເນເຊຍ ມີ 3 ຄະແນນລົງແຂ່ງ 1 ນັດ, ໄທ ລົງ 2 ນັດມີ 3 ຄະແນນ, ອິນໂດເນເຊຍ ມີ 1 ຄະແນນຈາກ 2 ນັດ, ລາວ ລົງ 2 ນັດມີ 1 ຄະແນນ ແລະ ບຣູໄນ ບໍ່ມີຈັກຄະແນນຈາກ 2 ນັດ.

ສ່ວນນັດຕໍ່ໄປຂອງ ທີມຊາດລາວ ຈະລົງແຂ່ງຂັນໃນ ວັນທີ 1 ທັນວາ 2019 ເວລາ 16:00 ໂມງ ພົບ ທີມຊາດບຣູໄນ