ລັດຖະມົນຕີກະຊວງ ສສກ ນໍາຄະນະນຳທັບນັກກີລາລາວ ອອກເດີນທາງຮ່ວມງານກິລາ ຊີເກມ 2019

447

ໃນຕອນເຊົ້າວັນທີ 27 ພະຈິກ ຜ່ານມາ ທີ່ສະໜາມບິນສາກົນ (ວັດໄຕ) ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ ( ສສກ ), ປະທານ ຄອລ ແລະ ທັງເປັນຄະນະນຳພາທັບນັກກິລາທີມຊາດລາວ ເຂົ້າຮ່ວມງານກິລາ ຊີເກມ ທີ່ປະເທດຟິລິບປິນ ເຊິ່ງອອກສົ່ງ ມີທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງ ສສກ ພ້ອມດ້ວຍຄະນະກົມ, ຮອງກົມ, ຄະນະນຳສະຫະພັນກິລາແຫ່ງຊາດ ບາງປະເພດ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ໃຫ້ສຳພາດວ່າ: ສຳລັບຄະນະນັກກິລາເຂົ້າຮ່ວມໃນຄັ້ງນີ້ ໄດ້ມີຄວາມກຽມພ້ອມຮອບດ້ານ ໂດຍສະເພາະໄດ້ຈັດຂະບວນທັບນັກກິລາອອກເດີນທາງເປັນໄລຍະ ຈະບໍ່ໄດ້ໄປພ້ອມກັນ ເຊິ່ງທາງເຈົ້າພາບ ໄດ້ຈັດໃຫ້ນັກກິລາແຕ່ລະປະເພດ ໄປຮອດງານແຂ່ງຂັນກ່ອນ 2 ມື້ ທັງນີ້ ກໍເພື່ອໃຫ້ແທດເໝາະກັບຂະບວນການແຂ່ງຂັນກິລາຕົວຈິງ ເປັນຕົ້ນແມ່ນກິລາບານເຕະກໍໄດ້ເດີນທາງເຂົ້າຮ່ວມແຂ່ງຂັນກ່ອນໜ້ານີ້ ນັດທຳອິດ ກໍສາມາດຢັນສະເໝີ ກັບທີມຊາດສິງກະໂປ 0-0 ປະຕູ ເຫັນວ່າເລີ່ມມີຜົນງານທີ່ພົ້ນເດັ່ນຂຶ້ນມາ ແລະ ຍັງເປັນກຳລັງໃຈໃຫ້ທັບນັກກິລາລາວ ທີ່ເຂົ້າຮ່ວມ ແລະ ກຳລັງເຂົ້າຮ່ວມມີກຳລັງໃຈ ແລະ ມີຄວາມຫ້າວຫັນຂຶ້ນກວ່າເກົ່າ ໃນການເດີນທາງຂອງຄະນະນຳພາທັບນັກກິລາລາວໃນຄັ້ງນີ້ ຄາດວ່າຈະໄປເຖິງນະຄອນມະນີລາ ໃນຕອນແລງມື້ດຽວກັນ ໃນເວລາ 18:00 ໂມງ ແລະ ໃນວັນທີ 28 ພະຈິກ 2019 ກໍຈະໄດ້ເຂົ້າຮ່ວມຊົມ ແລະ ເຊຍ ທັບນັກເຕະບານທີມຊາດລາວ ພົບກັບ ທີມຊາດຫວຽດນາມ ຈາກນັ້ນ ໃນວັນທີ 29 ພະຈິກ 2019 ຈະໄດ້ເດີນທາງໄປເມືອງກຣັກ ເຊິ່ງເປັນເມືອງທີ່ຈະຈັດພິທີເປີດ-ປິດງານກິລາຊີເກມ ໃນວັນທີ 30 ພະຈິກ 2019 ຢ່າງເປັນທາງການ. ຫຼັງຈາກນັ້ນ, ທ່ານລັດຖະມົນຕີ ພ້ອມດ້ວຍຄະນະ ກໍຈະໄດ້ໄປພົບປະ ແລະ ໃຫ້ກຳລັງໃຈທັບນັກກິລາລາວ ເພື່ອເຂົ້າຮ່ວມສ້າງຜົນສຳເລັດຕາມເປົ້າໝາຍ ທີ່ສປປ ລາວ ຕັ້ງເປົ້າໄວ້ທີ 2 ຫຼຽນຄຳ.

ໂດຍ ສົງການ

ທີ່ມາ: ເກາະຕິດ Sea Games 30