ທີມຊາດລາວ ເຮັດໄດ້ດີເຖິງຮູບຮ່າງເສຍປຽບສາມາດສະເໝີ ສິງກະໂປ ນັດທໍາອິດໃນ ຊີເກມ

501

ການແຂ່ງຂັນບານເຕະຊາຍ ນງານມະຫາກຳກິລາຊີເກມ ຄັ້ງທີ 30 ທີ່ປະເທດຟີລິບປິນ ທີ່ສະໜາມ Rizal Memorial ໃນນະຄອນຫລວງມານິລາ ໃນວັນທີ 26 ພະຈິກນີ້ ທີມຊາດລາວ ລົງສະໜາມນັດທໍາອິດພົບກັບ ທິມຊາດສິງກະໂປ, ນັດນີ້ ຊຸຣດຣາມ ມູຕີ້ ຄູຝຶກຊາວສິງກະໂປ ນຳທິມຊາດລາວ ພົບກັບ ທິມບ້ານເກີດ ໂດຍຈັດທັບໃຫ້ 3 ກອງໜ້າຕົວຫລັກນຳທັບເຊັ່ນ: ສຸກອາພອນ ວົງຈຽງຄຳ, ສົມໄຊ ແກ້ວຫານາມ ແລະ ບຸນພະຈັນ ບຸນກອງ; ກອງກາງວາງ ພິທັກ ກອງມາທິລາດ, ຈັນທະຈອນ ທິໂນລາດ ແລະ ສົມລິດ ແສງວັນນີ; ກອງຫລັງ: ວັນນາ ບຸນຫລໍ່ວົງສາ, ກິດຕິສັກ ພົມວົງສາ, ກ້າຫານ ເພັດສີວິໄລ ແລະ ອາພິໄຊ ທະນະຂັນຕີ; ຜູ້ຮັກສາປະຕູ ໄຊສະຫວາດ.

ປາກົດວ່າ: ທິມຊາດລາວ ເສຍປຽບຊັດເຈນດ້ານຮູບຮ່າງ ໂດຍເຄິ່ງເວລາ ຕ້ອງປ້ອງກັນການໂຈມຕີບານສູງຂອງສິງກະໂປຢ່າງຮັດກຸມ ໂອກາດຍິງຂອງທັງສອງທິມມີ ແຕ່ບໍ່ຫລາຍ ຈົບດ້ວຍຜົນສະເໝີກັນ 0-0, ສ່ວນເຄິ່ງເວລາທີ 2 ທັງສອງສືບຕໍ່ເດີນໜ້າແລກກັນ ແຕ່ຍັງຄົງຮັກສາເກມຮັບຢ່າງແໜ້ນໜາ ບໍ່ໄດ້ກໍ່ບໍ່ໃຫ້ເສຍ ເຮັດໃຫ້ເຈາະປະຕູກັນລຳບາກ ທັງສອງມີໂອກາດໄດ້ປະຕູ ແຕ່ຂາດຄວາມຄົມ ສຸດທ້າຍຈົບເກມ 0-0 ແບ່ງທິມລະຄະແນນ.

ຈາກຜົນດັ່ງກ່າວ ເຮັດໃຫ້ ກຸ່ມ B ຈົບນັດທຳອິດຂອງກຸ່ມນີ້ ຫວຽດນາມ ຊະນະ ບຣູໄນ 6-0, ໄທແຊ້ມເກົ່າ ເສຍໃຫ້ ອິນໂດເນເຊຍ 0-2 ແລະ ລາວ ສະເໝີກັບ ສິງກະໂປ 0-0.
ສໍາລັບ ນັດທີ 2 ຂອງກຸ່ມນີ້ (ກຸ່ມບີ) ຈະແຂ່ງຂັນໃນວັນທີ 28 ພະຈິກນີ້ ຫວຽດນາມ ພົບ ລາວ, ບຣູໄນ ພົບ ໄທ ຈະແຂ່ງຂັນພ້ອມກັນເວລາ 15:00 ແລະ ອິນໂດເນເຊຍ ພົບ ສິງກະໂປ ຈະແຂ່ງຂັນ ເວລາ 19:00.

ຮູບຈາກ: ສະຫະພັນບານເຕະແຫ່ງຊາດລາວ