ເບຍລາວ ອຸປະຖໍ້າ 180 ກວ່າລ້ານກີບ ຈັດແຂ່ງຂັນບານສົ່ງໃນຮົ່ມຊີງຂັນປະທານ ສະຫະພັນບານສົ່ງແຫ່ງຊາດລາວ

560

ພິທີເປີດການແຂ່ງຂັນລາຍການດັ່ງກ່າວຈັດຂຶ້ນ ໃນຕອນແລງຂອງວັນທີ 20 ພະຈິກ 2019 ທີ່ສະໜາມກີລາບານສົ່ງແຫ່ງຊາດ ຫຼັກ 16 ໃຫ້ກຽດເຂົ້າຮ່ວມໂດຍ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ, ທ່ານ ຈັນສະໝອນ ຜອງຈັນທາ ປະທານສະຫະພັນບານສົ່ງແຫ່ງຊາດລາວ ພ້ອມດ້ວຍຄູຝຶກ, ນັກກີລາ ແລະ ກອງເຊຍເຂົ້າຮ່ວມຢ່າງພ້ອມພຽງ, ເຊິ່ງໃນພິທີດັ່ງກ່າວຍັງມີການມອບເງິນການສະໜັບສະໜູນຈາກບໍລິສັດ ເບຍລາວ ຈໍາກັດ 185.696.000 ກີບ.

ການແຂ່ງຂັນບານສົ່ງໃນຮົ່ມ ຊີງຂັນປະທານ ສະຫະພັນບານສົ່ງແຫ່ງຊາດລາວ ປະຈໍາປີ 2019 ຈັດຂຶ້ນເພື່ອເປັນການສ້າງຂະບວນການຂໍ່ານັບຮັບຕ້ອນ ວັນຊາດທີ 2 ທັນວາ ຄົບຮອບ 44 ປີ, ວັນຄ້າຍວັນເກີດຂອງທ່ານປະທານໄກສອນ ພົມວິຫານ ຄົບຮອບ 98 ປີິ ແລະ ວັນສ້າງຕັ້ງກອງທັບປະຊາຊົນລາວຄົບຮອບ 71 ປີ ລວມເຖິງເປັນການພັດທະນານັກກີລາບານສົ່ງລາວ ແລະ ສ້າງຄວາມສາມັກຄີເຊິ່ງກັນແລະກັນ ພິເສດກໍເປັນການກະກຽມຄວາມພ້ອມຂອງທີມງານວິຊາການຈັດການແຂ່ງຂັນ ແລະ ກໍາມະການຕັດສິນໄປຊ່ວຍດ້ານເຕັກນິກ, ຈັດການແຂ່ງຂັນ ໃນງານມະຫາກໍາກີລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໃນຕົ້ນປີ 2020.

ສໍາລັບ ການແຂງຂັນປີນີ້ມີ ທີມຊາຍ 10 ທີມ ໃນນັ້ນເປັນທີມນ້ອງໃໝ່ເຖິງ 6 ທີມ ແລະ ທີມຍິງ 9 ທີມ ແບ່ງເປັນ 3 ສາຍ ເພື່ອເຂົ້າເຂົ້າຮອບຕໍ່ໄປ ໂດຍຊະນະເລີດທັງສອງປະເພດຈະໄດ້ຮັບຂັນເງິນ 1 ໜ່ວຍພ້ອມເງິນລາງວັນ 12 ລ້ານກີບ, ອັນດັບ 2 ເງິນລາງວັນ 8 ລ້ານກີບ, ອັນດັບ 3 ເງິນສົດ 6 ລ້ານກີບ ແລະ ອັນດັບ 4 ເງິນສົດ 3 ລ້ານກີບ.

ສໍາລັບ ການແຂ່ງຂັນມື້ທໍາອິດປະຈໍາວັນທີ 20 ພະຈິກ 2019 ປາກົດວ່າ: ຄູ່ທໍາອິດ ປະເພດທີມຍິງ ກະຊວງປ້ອງກັນປະເທດ ແຊັມເກົ່າ ເອົາຊະນະ ວິທະຍາໄລ ພະລະສຶກສາ 3-0 ເຊັດ 25-11, 25, 18 ແລະ 25-13, ມະຫາວິທະຍາໄລແຫ່ງຊາດ ເສຍໃຫ້ ກະຊວງປ້ອງກັນຄວາມສະຫງົບ 0-3 ເຊັດ 19-25, 24-26 ແລະ 19-25 ແລະ ວິທະຍາສາດ ປະຫວັດສາດ ຊະນະ ນະຄອນຫຼວງ, ສ່ວນປະເພດທີມຊາຍ ວິທະຍາສາດທໍາມະຊາດ ເສຍໃຫ້ ນະຄອນຫຼວງ 1-3 ເຊັດ 21-25, 26-24, 22-25 ແລະ 23-25 ຂະນະທີ່ ອີກຄູ່ ກະຊວງປ້ອງກັນປະເທດ ແຊັມເກົ່າ ຊະນະ ອິນທະສອນ 3-1 ເຊັດ 25-21, 18-25, 25-18 ແລະ 25-21