ບານເຕະເຍົາວະຊົນ ຢູ 18 ຊີງຂັນ ສຕລ ເປີດສາກທ້າຍອາທິດ 10 ທີມຮ່ວມຊີງໄຊ

368

ໃນຕອນເຊົ້າ ວັນອັງຄານ 19 ພະຈິກ 2019 ຢູ່ທີ່ຫ້ອງປະຊຸມໃຫຍ່ ສະຫະພັນບານເຕະແຫ່ງຊາດລາວ ໄດ້ມີການຈັບສະຫຼາກປະຄົບຄູ່ໂດຍມີ ທ່ານ ໂພທອນ ຖານະວະດີ ຫົວຫນ້າພະແນກຈັດການແຂ່ງຂັນ ສຕລ, ພ້ອມດ້ວຍພະນັກງານວິຊາການທີ່ກ່ຽວຂ້ອງ ແລະ ບັນດາທີມທີ່ເຂົ້າຮ່ວມການແຂ່ງຂັນ ເຂົ້າຮ່ວມຈັບສະຫຼາກແບ່ງສາຍ.

ທີມທີ່ເຂົ້າຮ່ວມໃນປີນີ້ມີທັງຫມົດ 10 ທີມ ແບ່ງອອກເປັນກຸ່ມ 2 ກຸ່ມໂດຍແຂ່ງຂັນແບບພົບກັນໝົດຮອບດຽວ ເພື່ອຄັດເອົາທີມທີ່ມີຄະແນນເປັນອັນດັບ 1 ແລະ 2 ຂອງແຕ່ລະກຸ່ມ ຜ່ານເຂົ້າຮອບຮອງຊະນະເລີດຕໍ່ໄປ ໂດຍໃຊ້ເວລາທັງໝົດ 90 ນາທີຕໍ່ນັດໂດຍແບ່ງເປັນເຄິ່ງລະ 45 ນາທີ ແລະ ພັກເຄິ່ງເວລາ 15 ນາທີ, ໂດຍຈະແຂ່ງຂັນໃນສະໜາມຂະໜາດມາດຕະຖານ 11 ຄົນ.

ເຊິ່ງຜົນການຈັບສະຫຼາກມີດັ່ງນີ້:

– ກຸ່ມ ເອ: ວຽງຈັນ ເອັຟທີ, ລາວໂຕໂຢຕ້າ ເອັຟຊີ, ເຄເອັນຊີ ເອັຟຊີ, ເຄພີເອັສ ເອັຟຊີ ແລະ ທະເວັນຕີຊິກ ຢູໄນເຕັດ

– ກຸ່ມ ບີ: ຊ້າງນ້ອຍ ເອັຟຊີ, ແຄນລາວ ຢູໄນເຕັດ, ມາສເຕີ້ ເຊເວັ້ນ ເອັຟຊີ, ທຣີນີຕີ ເອັຟຊີ ແລະ ເອັສຣາ ເອັຟຊີ.

ສໍາລັບ ທີມທີ່ເຂົ້າຮ່ວມການແຂ່ງຂັນແມ່ນບໍ່ໄດ້ເສຍຄ່າສະຫມັກ ແລະ ຈະໄດ້ຮັບເງິນອຸດໜູນທີມຈຳນວນ 3.000.000 ກີບ ພ້ອມທັງໄດ້ຮັບບານສຳລັບການຝຶກຊ້ອມຈຳນວນ 10 ໜ່ວຍຕໍ່ທີມໃນການເຂົ້າຮ່ວມການແຂ່ງຂັນ, ສ່ວນສະໂມສອນຊະນະເລີດຈະໄດ້ຮັບເງີນລາງວັນຈໍານວນ 15.000.000 ກີບ ພ້ອມດ້ວຍຂັນລາງວັນຊະນະເລີດ ແລະ ຫຼຽນລາງວັນ, ອັນດັບ 2 ຈະໄດ້ຮັບເງີນລາງວັນ ຈຳນວນ 10.000.000 ກີບ ແລະ ຫຼຽນລາງວັນ, ເຊິ່ງທ້າຍອາທິດນີ້ ຈະເປີດການແຂ່ງຂັນຢ່າງເປັນທາງການ ໃນວັນເສົາ 23 ພະຈິກ 2019 ໃຊ້ 2 ສະໜາມຄື: ສະໜາມກີລາແຫ່ງຊາດ ຫຼັກ 16 ( ສະໜາມໃນ ) ແລະ ສະໜາມກີລາແຫ່ງຊາດ ຫຼັກ 16 ( ສະໜາມນອກ ), ສ່ວນຕາຕະລາງການແຂ່ງຂັນແມ່ນຍັງບໍ່ທັນໄດ້ຜົນເທື່ອ.