ຢູ 19 ລາວ ຮັບໂບນັດຈາກ ສຕລ 100 ລ້ານກີບ ຈາກຜົນງານທະລຸເຂົ້າຮອບສຸດທ້າຍ

375

ສະຫະພັນບານເຕະແຫ່ງຊາດລາວ ( ສຕລ ) ມອບເງິນອັດສີດໃຫ້ ທັບນັກກີລ ທີມຊາດລາວ ຮຸ່ນອາຍຸບໍ່ເກີນ 19 ປີ ຈໍານວນ 100 ລ້ານກີບ ໃນວັນທີ 12 ພະຈິກ 2019 ທີ່ສະຫະພັນບານເຕະແຫ່ງຊາດລາວ ເພື່ອເປັນຂວັນກຳລັງໃຈ ທີ່ສາມາດຜ່ານເຂົ້າຮອບສຸດທ້າຍ ໃນການແຂ່ງຂັນບານເຕະຊີງແຊັມອາຊີ 2020.

ໃນພິທີດັ່ງກ່າວ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ຍ້ອງຍໍຊົມເຊີຍຕໍ່ຄະນະຄູຝຶກ ແລະ ນັກກິລາ ທີ່ໄດ້ສ້າງຜົນງານກຽດຊື່ສຽງໃຫ້ກັບປະເທດຊາດ ກ່ອນທີ່ທາງ ສຕລ ແມ່ນໄດ້ມອບເງິນອັດສີດຈຳນວນ 100.000.000 ກີບ ໃຫ້ກັບ ຄະນະຄູຝຶກ ແລະ ນັກກີລາ ເພື່ອເປັນຂວັນກຳລັງໃຈ ທີມຊາດລາວ ຮຸ່ນອາຍຸບໍ່ເກີນ 19 ປີ ກ່ອນຈະເລີ່ມເກັບຕົວຝຶກຊ້ອມນັບຕັ້ງແຕ່ວັນທີ 6 ມັງກອນ 2020 ເປັນຕົ້ນໄປ.

ຫຼັງຈາກພິທີ ທ່ານ ປະສິດ ສຸພາບ ຮອງປະທານ ສຕລ ໄດ້ນໍາພາຄະນະຄູຝຶກ ແລະ ນັກກີລາ ຢູ 19 ໄປກາບໄຫວ້ ແລະ ວາງກະຕ່າດອກໄມ້ ຢູ່ທີ່ ຫໍພິພິດຕະພັນ ໄກສອນ ພົມວິຫານ ເພື່ອເປັນສິລິມົງຄຸນ.

ຈາກ: ສະຫະພັນບານເຕະແຫ່ງຊາດລາວ