ເພາະກາຍລາວ ສົ່ງນັກກີລາຮ່ວມຊີງແຊັມໂລກ ທີ່ເກົາຫຼີ ທ້າຍອາທິດນີ້ລຸ້ນນໍາກັນ

458

ສະຫະພັນກີລາເພາະກາຍລາວ ສົ່ງຄະນະຄູຝຶກ ແລະ ນັກກີລາເພາະກາຍທີມຊາດລາວ ໄດ້ອອກເດີນທາງໄປແຂ່ງຂັນເພາະກາຍຊີງແຊັມໂລກ ທີ່ ສ ເກົາຫຼີ ລະຫວ່າງ 5-11 ພະຈິກ 2019.

ນໍາໂດຍ ທ່ານ ກົງປະເສີດ ແພງແສນ ກໍາມະການເພາະກາຍລາວ ຄົນທໍາອິດທີ່ຖືກບັນຈຸເຂົ້າເປັນກໍາມະການ ໃນສະຫະພັນກີລາເພາະກາຍໂລກ ເຂົ້າຮ່ວມຕັດສິນໃນລາຍການດັ່ງກ່າວ, ທ່ານ ນາງ ພອຍໄພລິນ ພັນທະລີ ໄປສອບເສັງບັນຈຸເປັນກຳມະການຕັດສິນເພາະກາຍ ສະຫະພັນເພາະກາຍໂລກ, ທ່ານ ອາພິຊາດ ພັນທະລີ ຄູຝຶກນັກກີລາ ທັງຜູ້ປະສານງານການເດີນທາງ ແລະ ທ້າວ ສັນຕິສຸກ ດວງແກ້ວມະນີ ເຈົ້າຂອງອັນດັບ 4 ລາຍການຊີງແຊັມໂລກ 2018 ທີ່ປະເທດໄທ ຈະລົງແຂ່ງຂັນຮຸ່ນ men model physiqe up to 175 ຊັງຕີແມັດ.

ສໍາລັບ ປັດຈຸບັນໃນ ສປປ ລາວ ມີກໍາມະການເພາະກາຍໂລກພຽງ 1 ທ່ານຄື ທ່ານ ກົງປະເສີດ ແພງແສນ, ເຊິ່ງຫຼັງຈົບລາຍການຊີງແຊັມໂລກ 2019 ຕ້ອງຕິດຕາມວ່າ ທ່ານ ນາງ ພອຍໄພລິນ ພັນທະລີ ຈະເປັນຄົນທີ 2 ໄດ້ຫຼືບໍ?, ສ່ວນສະຖິຕິນັກກີລາເພາະກາຍທີມຊາດລາວ ປັດຈຸບັນມີທັງໝົດ 8 ຄົນ ( ຍິງ 2 ຄົນ )