ຂໍ້ມູນດີໆການສຶກສາລະດັບປະລິນຍາໂທ ຫລັກສູດ FIFA MASTER ມີຢູ່ 3 ປະເທດເທົ່ານັ້ນ

373

ໃນລະຫວ່າງວັນທີ 29-30 ຕຸລາ 2019 ຢູ່ທີ່ໂຮງແຮມ ຄຣາວ ພລາຊ່າ ນະຄອນຫລວງວຽງຈັນ ສປປ ລາວ ສະຫະພັນບານເຕະອາຊີ ຫລື AFC ໄດ້ຈັດງານສຳມະນາພາຍໃຕ້ຫົວຂໍ້ AFC MEMBER ASSOCIATION DEVELOPMENT WORKSHOP ເຊິ່ງມີບັນດາປະເທດສະມາຊິກເຂົ້າຮ່ວມໃນໂຊນອາຊຽນເຂົ້າຮ່ວມ.

ສຳລັບຈຸດປະສົງໃນການຈັດສຳມະນາໃນຄັ້ງນີ້ກໍ ເພື່ອແນະນຳແຕ່ລະໂຄງການພັດທະນາປະເທດສະມາຊິກ ທີ່ຈະເກີດຂຶ້ນໃນຫລາຍໆໂຄງການເຊັ່ນ: ເງິນສະຫນັບສະຫນູນຕ່າງໆ, ໂຄງການສົ່ງເສີມທາງດ້ານບຸກຄະລາກອນເຂົ້າຮ່ວມຝຶກງານຢູ່ສະຫະພັນບານເຕະອາຊີ ແລະ ມອບທຶນການສຶກສາລະດັບປະລິນຍາໂທດ້ານການບໍລິຫານຈັດການກິລາ ທີ່ຮັບຮອງໂດຍ ຟີຟາ ຫລື FIFA MASTER .

ສຳລັບການສຶກສາຮ່ຳຮຽນ ຟີຟາ ມາສເຕີ ຈະໃຊ້ເວລາປະມານ 1 ປີ ໃນການຮຽນຢູ່ 3 ປະເທດຄື: ອັງກິດ, ອີຕາລີ ແລະ ສະວິດເຊີແລນ ໂດຍທີ່ ສະຫະພັນບານເຕະອາຊີ ຈະເປັນຜູ້ຮັບຜິດຊອບຄ່າຫນ່ວຍກິດທັງຫມົດ ແລະ ຄ່າທຳນຽມ ຕ່າງໆ ລວມເຖິງທີ່ພັກ ແລະ ອາຫານ ອີກດ້ວຍ.

ສຳລັບລາຍລະອຽດການສຶກສາລະດັບປະລິນຍາໂທ ຫລັກສູດ FIFA MASTER ນັ້ນເປີດກວ້າງ ສຳລັບບຸກຄະລາກອນ ສະໂມສອນທີ່ເປັນສະມາຊິກ ສະຫະພັນ ໂດຍສາມາດສະຫມັກໄດ້ທີ່ www.cies.ch ຕັ້ງແຕ່ມື້ນີ ຈົນເຖິງເດືອນ ມັງກອນ 2020 .

ຜູ້ທີ່ໄດ້ຮັບການຄັດເລືອກທາງ CIES ຈະໄດ້ແຈ້ງໄປຍັງ EMAIL ເພື່ອໃຫ້ຜູ້ສະຫມັກສາມາດຕິດຕໍ່ຂໍທຶນ ກັບ ສະຫະພັນບານເຕະອາຊີ ແລະ CIES ໂດຍກົງຕໍ່ໄປ.

ຂ່າວຈາກ: ສະຫະພັນບານເຕະແຫ່ງຊາດລາວ