ຊ້າງນ້ອຍ ເອັຟຊີ ຕ້ອງຊະນະນັດສຸດທ້າຍເພື່ອລຸ້ນເຂົ້າຮອບ ລາຍການທີ່ບັງກລາເທດ

360

ຊ້າງນ້ອຍ ເອັຟຊີ ສະໂມສອນອັນດັບ 3 ໃນ ເປບຊີ ລາວພຣີເມຍລີກ 2019 ລົງສະໜາມນັດທີ 2 ເສຍໃຫ້ກັບ Chittagong Abahani ຈາກບັງກລາເທດ 2 – 4 ໃນການແຂ່ງຂັນບານເຕະລາຍການ Sheikh Kamal International Club Cup 2019 ທີ່ປະເທດບັງກລາເທດ ໃນວັນທີ 23 ຕຸລາທີ່ຜ່ານມາ ແຕ່ກໍຍັງມີໂອກາດເຂົ້າຮອບ ຖ້າຫາກນັດສຸດທ້າຍສາມາດຊະນະໄດ້.

ການແຂ່ງຂັນບານເຕະລາຍການ Sheikh Kamal International Club Cup 2019 ມີທີມເຂົ້າຮ່ວມທັງໝົດ 8 ທີມ ຈາກ 6 ປະເທດ ໂດຍ ຊ້າງນ້ອຍ ເອັຟຊີ ຖືກຈັດຢູ່ຮ່ວມກຸ່ມ A ປະກອບມີ: T.C Sports Club ຈາກມານດີບ, Muhun Bagan AC ຈາກອິນເດຍ ແລະ Chittagong Abahani LTD ຈາກບັງກລາເທດ; ສ່ວນກຸ່ມ B ປະກອບມີ: Bashundhara Kings ຈາກບັງກລາເທດ, Chennai City Football Club ຈາກອິນເດຍ, Terengganu Football Club ຈາກມາເລເຊຍ ແລະ Abahani Limited Dhaka ຈາກບັງກລາເທດ.

ໃນວັນທີ 23 ຕຸລາ 2019 ຊ້າງນ້ອຍ ເອັຟຊີ ລົງສະ     ໜາມນັດທີ 2 ພົບກັບ CHITTAHONG ABHANI ປາກົດວ່າ: ການແຂ່ງຂັນດໍາເນີນໄປຢ່າງດຸເດືອດ ໂດຍສະເພາະເຄິ່ງເວລາທໍາອິດທີມຈາກເຈົ້າພາບໄດ້ປະຕູຂຶ້ນນໍາຕັ້ງແຕ່ນາທີໆ 9 ຈາກການຍິງຂອງ Matthew Chinedu. ແຕ່ຢ່າງໃດກໍຕາມ, ຊ້າງນ້ອຍ ເອັຟຊີ ສາມາດພິກກັບມາຂຶ້ນນໍາ 2 – 1 ຈາກການຍິງຂອງ ອາພິໄຊ    ທະນະຂັນຕີ ນາທີໆ 14 ແລະ ສົມໄຊ ແກ້ວຫານາມ ນາທີໆ 33 ກ່ອນຈົບເຄິ່ງເວລາທໍາອິດ, ສ່ວນເຄິ່ງເວລາທີ 2 ທີມຈາກເຈົ້າພາບຫຼິ້ນໄດ້ດີກວ່າ ແລະ ຍິງຄົມກວ່າຈັດການຍິງ 3 ປະຕູລວດຈາກ Luka Rotkovic ນາທີໆ 54 ແລະ Jamal Bhuyan 2 ປະຕູ ນາທີໆ 72 ກັບ 78 ເອົາຊະນະ ຊ້າງນ້ອຍ ເອັຟຊີ 4 – 2.

ຈາກຜົນດັ່ງກ່າວເຮັດໃຫ້ ຊ້າງນ້ອຍ ເອັຟຊີ ຍັງມີ 3 ຄະແນນ ເທົ່າກັບຄູ່ແຂ່ງສໍາຄັນຢ່າງ Muhun Bagan AC ທີມອັນດັບ 2 ຂອງຕາຕະລາງ ເນື່ອງຈາກຜົນປະຕູໄດ້ເສຍລື່ນກັນພຽງ 1 ປະຕູ ຈະຕັດສິນນັດສຸດທ້າຍ, ສ່ວນອັນດັບ 1 ຂອງກຸ່ມເປັນຂອງ Chittagong Abahani ລົງສະໜາມ 2 ນັດ ຊະນະລວດ ມີ 6 ຄະແນນ ເກັບໂອກາດເຂົ້າຮອບສົດໃສ, ຂະນະທີ່ T.C Sports Club ຕົກຮອບເປັນທີ່ແນ່ນອນແລ້ວລົງ 2 ນັດບໍ່ມີຈັກຄະແນນ.

ສໍາລັບລາຍການດັ່ງກ່າວຈັດຂຶ້ນລະຫວ່າງວັນທີ 19 – 29 ຕຸລາ 2019 ທີ່ສະໜາມ M.A Aziz Stadium Chittagong ປະເທດບັງກລາເທດ ໂດຍນັດສຸດທ້າຍຮອບແບ່ງກຸ່ມ ຊ້າງນ້ອຍ ຈະໄດ້ພົບກັບ T.C Sports Club ທີມຈາກມານດີບ ໃນວັນທີ 25 ຕຸລາ 2019         ເວລາ 16:00 ໂມງ, ສ່ວນ Muhun Bagan AC ພົບກັບ CHITTAHONG ABHANI ໃນເວລາ 19:00 ໂມງ.

( ຄໍາສອນ; ຮູບຈາກ: Sheikh Kamal International Club Cup )

ທີ່ມາ: ໜັງສືພິມ ເສດຖະກິດ-ການຄ້າ