ສຸກອາພອນ ຂໍຈັດການເລື່ອງສັນຍາໃໝ່ໃນ ໄທລີກ 1 ກ່ອນຫວນຄືນທີມຊາດກຽມພ້ອມລຸຍຊີເກມ

329

ສຸກອາພອນ ວົງຈຽງຄຳ ກອງໜ້າທີມຊາດລາວ ເຈົ້າຂອງສາຍາເມສຊີ ກຽມເປີດໂຕສັນຍາສະບັບໃໝ່ຢ່າງເປັນທາງການກັບທີມໃນ ໄທລີກ 1 ໃນທ້າຍອາທິດນີ້ ກ່ອນຈະກັບມາສົມທົບກັບ ທີມຊາດລາວ ຊຸດຊີເກມ 2019 ຄາດວ່າຈະອຳລາ ໄຊນາກ ຮອນບິລ ທີມທີ່ຕົກຊັ້ນໃນ ໄທລີກ 1 ເປັນທີ່ແນ່ນອນແລ້ວໄປຮ່ວມ ພີທີ ປຣະຈວບ ເອັຟຊີ ທີມອັນດັບ 9 ຂອງການແຂ່ງຂັນເຕະບານ ໄທລີກ 1 ໃນລະດູການໜ້າ.

ອີງຕາມຂໍ້ມູນຈາກເວັບໄຊhttps://www.smmsport.com ສື່ຊັ້ນນໍາຂອງປະເທດໄທ ລາຍງານໃນວັນທີ 22 ຕຸລາ ຜ່ານມາ ໃຫ້ຊາບວ່າ: ພີທີ ປຣະຈວບ ເອັຟຊີ ທີມອັນດັບ 9 ຂອງການແຂ່ງຂັນບານເຕະ ໄທລີກ 1 ລະດູການ 2019 ແລະ ແຊັມການແຂ່ງຂັນບານເຕະ ໂຕໂຢຕ້າ ລີກ ຄັບ 2019 ໄດ້ຄວ້າຕົວ ສຸກອາພອນ ວົງຈຽງຄຳ ເຂົ້າຮ່ວມທີມ, ສ່ວນການເປີດຕົວຂອງ ສຸກອາພອນ ວົງຈຽງຄໍາ ຈະມີຂຶ້ນຢ່າງເປັນທາງການຫຼັງການແຂ່ງຂັນນັດສຸດທ້າຍຂອງ ພີທີ ປຣະຈວບ ເອັຟຊີ ທີ່ຈະເປີດບ້ານຕ້ອນຮັບການມາຢາມຂອງ ຣາດຊະບູລີ ເອັຟຊີ ໃນວັນທີ 26 ຕຸລາ 2019 ເວລາ 18:00 ໂມງ.

ຂະນະດຽວກັນ ສຸກອາພອນ ໄດ້ເປີດເຜີຍກັບທີມຂ່າວໜັງສືພິມ ເສດຖະກິດ – ການຄ້າ ວ່າ: ການແຂ່ງຂັນບານເຕະ ໄທລີກ 1 ນັດສຸດທ້າຍຈະປິດສາກໃນວັນທີ 26 ຕຸລາ 2019 ເຊິ່ງປັດຈຸບັນຂ້ອຍຍັງມີສັນຍາກັບ ໄຊນາກ ເອັຟຊີ ໄປຈົນຈົບນັດສຸດທ້າຍ, ສ່ວນເລື່ອງສັນຍາໃໝ່ນັ້ນແມ່ນຂໍປິດໄວ້ກ່ອນ ແລະ ຈະມີການເປີດເຜີຍສັນຍາໃໝ່ຢ່າງເປັນທາງການຫຼັງຈົບນັດສຸດທ້າຍຂອງ ໄທລີກ 1 ທ້າຍອາທິດນີ້.

“ ແນ່ນອນປັດຈຸບັນຂ້ອຍມີຊື່ຕິດທີມຊາດລາວ ຊຸດກຽມໄປແຂ່ງຂັນໃນງານມະຫະກໍາກີລາຊີເກມ 2019 ທີ່ປະເທດຟີລິບປິນ ຫຼັງຈາກທີ່ເຈລະຈາເລື່ອງສັນຍາ ແລະ ອື່ນໆກັບຕົ້ນສັງກັດແລ້ວຈະກັບມາ ສປປ ລາວ ເພື່ອກັບມາສົມທົບກັບທີມຊາດລາວ ຝຶກຊ້ອມ ແລະ ອຸ່ນເຄື່ອງກຽມຄວາມພ້ອມເພື່ອງານດັ່ງກ່າວ ” ສຸກອາພອນ ກ່າວ.

ສໍາລັບ ສຸກອາພອນ ວົງຈຽງຄໍາ ຜ່ານມາແມ່ນເຄີຍຮ່ວມທີມໃນລີກຂອງປະເທດໄທຢ່າງຫຼວງຫຼາຍ ບໍ່ວ່າຈະເປັນ ສະໂມສອນ ບີອີຊີ ເທໂຣ, ສະໂມສອນ ກະບີ່ ເອັຟຊີ, ສະໂມສອນ ພິດສະນຸໂລກ ເອັຟຊີ, ສະໂມສອນ ສະລະບູຣີ ເອັຟຊີ, ສະໂມສອນ ສີສະເກດ ເອັຟຊີ ແລະ ໄຊນາກ ຮອນບິລ ລົງສະໜາມ 15 ນັດ ຍິງໄປ 1 ປະຕູ ບໍ່ສາມາດຊ່ວຍໃຫ້ທີມໜີການຕົກຊັ້ນໄດ້, ສ່ວນຜົນງານໃນ ສປປ ລາວ ເຄີຍຫຼິ້ນໃຫ້ກັບ ເອັສຣາ ເອັຟຊີ, ນະຄອນຫຼວງວຽງຈັນ ເອັຟຊີ, ລ້ານຊ້າງ ຢູໄນເຕັດ ແລະ ນະຄອນຫຼວງ ຢູໄນເຕັດ.

ຂະນະທີ່ ທີມຊາດລາວ ແມ່ນຕິດມາແຕ່ເຍົາວະຊົນຈົນເຖິງຊຸດໃຫຍ່ ແລະ ຫຼ້າສຸດກຽມນໍາທີມຊາດລາວ ລຸຍການແຂ່ງຂັນບານເຕະໃນຊີເກມ 2019 ທີ່ປະເທດຟີລິບປິນ ທ້າຍປີນີ້.

( ຄໍາສອນ )

ທີ່ມາ: ໜັງສືພິມ ເສດຖະກິດ-ການຄ້າ