ຢູ 19 ລາວ ລົງອຸ່ນເຄື່ອງ 3 ນັດ ຊະນະ 2 ເສຍ 1 ກ່ອນລຸຍຊີງແຊັມອາຊີ ຮອບຄັດເລືອກ

323

ທີມຊາດລາວ ຢູ 19 ພາຍໃຕ້ການນໍາທີມຂອງ ທ່ານ Sundram Moorthy ຫົວໜ້າຄູຝຶກຊາວສິງກະໂປ ແລະ ນັກເຕະທີມຊາດລາວ ຮຸ່ນອາຍຸ 19 ປີ ຈໍານວນ 26 ຄົນ ເດີນທາງໄປອຸ່ນເຄື່ອງ 3 ນັດ ທີ່ປະເທດໄທ ລະຫວ່າງວັນທີ 17 – 21 ຕຸລາ 2019 ເພື່ອກຽມພ້ອມໃສ່ການແຂ່ງຂັນບານເຕະຊາຍ ຊີງແຊັມອາຊີ 2020 ຮຸ່ນອາຍຸບໍ່ເກີນ 19 ປີ ຮອບຄັດເລືອກ ທີ່ຈະເປີດສາກຂຶ້ນໃນເດືອນພະຈິກນີ້.

ຜ່ານການແຂ່ງຂັນອຸ່ນເຄື່ອງ 3 ນັດ ປາກົດວ່າ: ນັດທໍາອິດໃນວັນທີ 17 ຕຸລາ 2019 ເວລາ 18:00 ໂມງ ຢູ 19 ລາວ ສາມາດເອົາຊະນະ ຂອນແກ່ນ ເອັຟຊີ ຢູ 19 ໄປ 1 – 0 ທີ່ໂຮງຮຽນກີລາຂອນແກ່ນ, ນັດທີ 2 ວັນທີ 19 ຕຸລາ 2019 ເວລາ 18:00 ໂມງ ເສຍໃຫ້ກັບ ສະຣະບູລີ ຢູໄນເຕັດ ທີມໃນໄທລີກ 4 ໄປດ້ວຍ 0 – 1 ທີ່ສະໜາມກີລາຈັງຫວັດສະຣະບູລີ ແລະ ຫຼ້າສຸດໃນວັນທີ 21 ຕຸລາ 2019 ເວລາ 16:00 ໂມງ ສາມາດເອົາຊະນະ ນະຄອນຣາດຊະສີມາ ຢູ 19 ທີ່ສະໜາມກີລາ 80 ພັນສາ 2 – 0 ຈາກການຍິງຂອງ ນາລົງສິດ ຈັນທະລັງສີ ນາທີ 17 ແລະ ອານຸສອນ ໄຊປັນຍາ ນາທີ 65.

ຫຼັງຈົບການແຂ່ງຂັນ ນາລົງສິດ ຈັນທະລັງສີ ນັກເຕະຈາກແຂວງຈໍາປາສັກ ທີ່ຍິງປະຕູທໍາອິດກັບທີມຊາດລາວ ໃຫ້ສໍາພາດວ່າ: ດີໃຈຫຼາຍທີ່ສາມາດຍິງປະຕູທໍາອິດໃນນາມທີມຊາດລາວໄດ້ສໍາເລັດ ແນ່ນອນການມາອຸ່ນເຄື່ອງໃນຄັ້ງນີ້ ນ້ອງໄດ້ປະສົບການຫຼາຍໆຢ່າງ ໂດຍສະເພາະແມ່ນການບີບບານ, ສົ່ງບານ ແລະ ອື່ນໆ ທີ່ຈະນໍາເອົາມາຊ່ວຍທີມຊາດລາວ, ສ່ວນແຜນຕໍ່ໄປພວກເຮົາຈະໄປອຸ່ນເຄື່ອງນັດສຸດທ້າຍທີ່ປະເທດມຽນມາ ໃນວັນທີ 27 ຕຸລາ 2019 ເພື່ອກຽມພ້ອມລົງແຂ່ງຂັນໃນການແຂ່ງຂັນບານເຕະຊີງແຊັມອາຊີ 2020 ຮອບຄັດເລືອກ, ຢ່າງໃດກໍຂໍກໍາລັງໃຈໃຫ້ກັບພວກເຮົາຕໍ່ໄປ ແລະ ພວກເຮົາຈະເຮັດເຕັມທີ່.

ສຳລັບການແຂ່ງຂັນບານເຕະຊາຍ ຊີງແຊັມອາຊີ ຮຸ່ນອາຍຸບໍ່ເກີນ 19 ປີ ຮອບຄັດເລືອກ 2020 ຢູ່ກຸ່ມ H ຮ່ວມກັບ ໄຕ້ຫວັນ ເຈົ້າພາບ, ອົສຕຣາລີ ແລະ ມາເກົ໊າ ລະຫວ່າງວັນທີ  6 – 10 ພະຈິກ 2019.

ສ່່ວນຕາຕະລາງ ທີມຊາດລາວ ນັດທໍາອິດຈະມີຂຶ້ນໃນວັນທີ 6 ພະຈິກ 2019 ເວລາ 16:00 ໂມງ ພົບ ທີມຊາດອົສ ຕຣາລີ, ນັດທີ 2 ວັນທີ 8 ພະຈິກ 2019 ເວລາ 19:00 ໂມງ ພົບ ໄຕ້ຫວັນ ແລະ ນັດທີ 3 ວັນທີ 10 ພະຈິກ 2019 ເວລາ 16:00 ໂມງ ພົບ ມາເກົ໊າ ໂດຍທຸກໆນັດແມ່ນແຂ່ງຂັນທີ່ສະໜາມ National Stadium ( Kaohsiung City ) ໄຕ້ຫວັນ.

( ຄໍາສອນ; ຮູບຈາກ: Nakhonratchasima FC )

ທີ່ມາ: ໜັງສືພິມ ເສດຖະກິດ-ການຄ້າ