ຍິງລາວແບບຢ່າງ! ທ່ານ ນາງ ກັນຍາ ກ້າວຂຶ້ນເປັນຜູ້ຄວບຄຸມການແຂ່ງຂັນຄັດບານໂລກ 2022

488

ສະຫະພັນບານເຕະນາໆຊາດ ( ຟີຟາ ) ປະກາດແຕ່ງຕັ້ງ ທ່ານ ນາງ ກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງຊາດ ໃຫ້ເປັນຜູ້ຄວບຄຸມການແຂ່ງຂັນບານໂລກ 2022 ຮອບຄັດເລືອກຮອບ 2 ນັດແຂ່ງຂັນລະຫວ່າງ ທີມ ຊາດສິງກະໂປ ເສຍໃຫ້ກັບ ທີມຊາດອຸສເບກິສຖານ 1-3 ທີ່ສະໜາມກີລາແຫ່ງຊາດສິງກະໂປ ໃນວັນອັງຄານທີ 15 ຕຸລາ 2019.

ເຊິ່ງເປັນຄົນລາວຄົນທໍາອິດ ແລະ ຄົນດຽວໃນຕໍາແໜ່ງຜູ້ຄວບຄຸມການແຂ່ງຂັນຂອງ FIFA ແລະ AFC, ເຊິ່ງເປັນຕໍາແໜ່ງສໍາຄັນໃນການຈັດການແຂ່ງຂັນບານເຕະ ທີ່ຕ້ອງມີໜ້າທີ່ເປັນຕົວແທນ FIFA ແລະ AFC ຈັດການແຂ່ງຂັນໃຫ້ເປັນໄປຕາມລະບຽບການແຂ່ງຂັນທີ່ FIFA ແລະ AFC ວາງອອກທຸກໆຂັ້ນຕອນ, ເຊິ່ງ ທ່ານ ນາງ ກັນຍາ ແກ້ວມະນີ ເປັນ 1 ໃນຜູ້ຄວບຄຸມການແຂ່ງຂັນຍິງ ຈໍານວນ 4 ທ່ານຈາກທະວີບອາຊີ ທີ່ໄດ້ຮັບການໄວ້ວາງໃຈຈາກ FIFA ໃຫ້ເປັນຜູ້ຄວບຄຸມການແຂ່ງຂັນບານໂລກ 2022 ຮອບຄັດເລືອກໃນຄັ້ງນີ້ ເຊິ່ງຖືວ່າເປັນຄັ້ງປະຫວັດສາດທີ່ FIFA ໄດ້ຄັດເລືອກຜູ້ຄວບຄຸມການແຂ່ງຂັນຍິງເປັນຜູ້ບໍລິຫານຈັດການແຂ່ງຂັນບານໂລກຊາຍໃນໂຊນອາຊີ.

ສໍາລັບ ທ່ານ ນາງກັນຍາ ແກ້ວມະນີ ໃນເສັ້ນທາງການເປັນຜູ້ຄວບຄຸມການແຂ່ງຂັນແມ່ນເລີ່ມຕົ້ນມາຕັ້ງແຕ່ປີ 2007 ຈົນເຖິງປັດຈຸບັນ, ເຊິ່ງມີຜົນງານໃນການຄວບຄຸມການແຂ່ງຂັນ ທັງບານເຕະຊາຍ ແລະ ຍິງ ບໍ່ວ່າຈະເປັນການຄວບຄຸມການແຂ່ງຂັນບານເຕະລາຍການ AFC Champions League, AFC Cup, AFC Futsal Club Championship, AFC Women’s Asian Cup Finals, AFC Women’s Futsal Champshioship, ແລະ ທຸກໆການແຂ່ງຂັນບານເຕະຍິງລຸ້ນອາຍຸຂອງ AFC.

ຈາກ: ສະຫະພັນບານເຕະແຫ່ງຊາດລາວ