ຢູ 14 ເອັສຣາ ເອັຟຊີ ທີມຈາກ ສປປ ລາວ ຮ່ວມລຸ້ນແຊ້ມລາຍການນາໆຊາດ ທີ່ປະເທດໄທ

326

ເອັສຣາ ເອັຟຊີ ຊຸດຍເຍົາວະຊົນຮຸ່ນອາຍຸບໍ່ເກີນ 14 ປີຕົກລົງຮ່ວມຊີງໄຊ ໃນການແຂ່ງຂັນບານເຕະເຍົາວະຊົນນາໆຊາດລາຍການ CP-Meiji CUP U-14 International Champions 2019 ຮອບສຸດທ້າຍລະຫວ່າງວັນທີ 19-23 ຕຸລາ 2019 ທີ່ສະໜາມຊ້າງເທຣນນິງ ກຣາວ ແລະ ຊ້າງອາຣີນາ ແຂວງບູຣີຣໍາ ປະເທດໄທ.

ທ່ານ ISSAC KIM ຜູ້ຈັດການທີມຂອງ ເອັສຣາ ເອັຟຊີ ໃຫ້ສໍາພາດວ່າ: ສືບເນື່ອງຈາກ ເອັຊບີ ໂຄເກ້ ( HB Koge ) ທີມຈາກປະເທດດານມາກ ຂໍຖອນຕົວເນື່ອງຈາກພົບບັນຫາເລື່ອງການແຂ່ງຂັນບານເຕະພາຍໃນປະເທດ, ເຮັດໃຫ້ລາຍການດັ່ງກ່າວຍັງເຫຼືອທີ່ຫວ່າງ 1 ທີມ, ເຊິ່ງທາງຜູ້ຈັດການຂັນໄດ້ເຊີນມາ ແລະ ເອັສຣາ ເອັຟຊີ ທີມຈາກ ສປປ ລາວ ທີ່ເຄີຍຄວ້າອັນດັບ 6 ໃນລາຍການນີ້ເມື່ອປີ 2017 ຕົກລົງເຂົ້າຮ່ວມແຂ່ງຂັນແທນທີ່ທີມຈາກປະເທດດານມາກ.

ເອັສຣາ ຈະຢູ່ສາຍ C ຮ່ວມກັບ ອັສສົມຊັນ ຢູໄນເຕັດ ( ASSUMPTION UNITED ) ທີມຈາກໄທ, ເຫີນານ ຈຽນເຢ ຈາກ ສປ ຈີນ ແລະ ໜອງບົວ ພິຊະຍາ ເອັຟຊີ ແຊັມຮອບຈາກຄັດເລືອກ, ສ່ວນກຸ່ມ A ສວນປ່າເຊົາຊະອາງ ຈາກໄທ, ຟາເຈຍໂນ ໂອຄາຢາມາ ຈາກຍີ່ປຸ່ນ, ທຣູ ແບງຄ໊ອກ ຢູໄນເຕັດ ຈາກໄທ ແລະ ຈູບິໂລ ອິວາຕະ ຈາກຍີ່ປຸ່ນ. ຂະນະທີ່ກຸ່ມ B ບູຣິຣໍາ ຢູໄນເຕັດ ຈາກໄທ, ໂຮຈິມິນ ຊິຕີ້ ເອັຟຊີ ຈາກຫວຽດນາມ, ຊົນບຸຣີ ເອັຟຊີ ຈາກໄທ ແລະ ເອັນເອັຟດີພີ ( NFDP Malaysia ) ຈາກມາເລເຊຍ.

ສໍາລັບ ລາຍການນີ້ ຮອບຄັດເລືອກແມ່ນ ລ໋ອບ ສະເຕດ້ຽມ ຕົວແທນຈາກ ສປປ ລາວ ເຂົ້າຮ່ວມແຂ່ງຂັນໃນຕົ້ນເດືອນກັນຍາ 2019, ແຕ່ບໍ່ຜ່ານຮອບຄັດເລືອກ, ສ່ວນທີມທີ່ໄດ້ສິດຢືນໃນຮອບສຸດທ້າຍປະກອບມີ ທຣູ ແບງຄ໊ອກ ຢູໄນເຕັດ ຈາກໄທ ແຊັມເກົ່າ 2018, ບູຣີຣໍາ ຢູໄນເຕັດ ເຈົ້າພາບ ແລະ ຮອງແຊັມເກົ່າ 2018, NFDP Malaysia – PPBN ຈາກມາເລເຊຍ ອັນດັບ 3 ເມື່ອປີ 2018, ຈູບິໂລ ອິວາຕະ ຈາກຍີ່ປຸ່ນ ແຊັມ 2 ສະໄໝ ( 2016 ກັບ 2017 ), ASSUMPTION UNITED ຈາກໄທ ໃນຖານະແຊັມບານເຕະລີກເຍົາວະຊົນແຫ່ງຊາດ ຮຸ່ນອາຍຸບໍ່ເກີນ 13 ປີ ແລະ Ho Chi Minh City F.C ຈາກຫວຽດນາມ ຖືເປັນທີມນ້ອງໃໝ່ໃນຮອບນີ້.

ຂໍ້ມູນຈາກ: ຂ່າວເສດຖະກິດ-ການຄ້າ lao economic daily