ໄດ້ແລ້ວທີມຕົວແທນຈາກ 9 ຕົວເມືອງລຸຍຮອບສຸດທ້າຍ ບານເຕະ ໂຄປາ ໂຄຄາ-ໂຄລາ 2019

310

ການແຂ່ງຂັນບານເຕະນັກຮຽນສາມັນລາຍການ ໂຄປາ ໂຄຄາ-ໂຄລາ 2019 ຮຸ່ນອາຍຸບໍ່ເກີນ 16 ປີປ່ຽນມາແຂ່ງຂັນແບບ 7 ຄົນຫຼັງຈາກທີ 2 ຄັ້ງທີ່ຜ່ານມາແຂ່ງຂັນແບບ 11 ຄົນ, ໂດຍມີ 119 ທີມ​ແບ່ງ​ເປັນ​ທີ​ມຍີ​ງ 42 ທີ​ມ ​ແລະ ທີ​ມຊາຍ 77 ທີ​ມຈາກ 9 ຕົວເມືອງທົ່ວນະຄອນຫຼວງວຽງຈັນ​.

ໂດຍອາທິດທີ່ຜ່ານມາ ເປັນການແຂ່ງຂັນຮອບຄັດເລືອກ ຈົນເຖິງວັນທີ 4 ຕຸລາ ໂດຍໃຊ້ 2 ສະໜາມຄື ສະໜາມກູດໄລທ໌ ແລະ ນິວອາລີນາ ສາມາດຄັດໄດ້ຕົວແທນທີມທີດີທີ່ສຸດຕົວຂອງແຕ່ລະເມືອງທີມຊາຍ 9 ທີມ ແລະ ທີມຍິງ 8 ທີມເຂົ້າຮອບສຸດທ້າຍດັ່ງນີ້:

ປະເພດທີມຊາຍ ມີທັງໝົດ 9 ທີມ ໂດຍຈະເອົາ 2 ທີມຢ່າງ ມສ ສາລາຄໍາ ຈາກເມືອງຫາດຊາຍຟອງ ຈະພົບກັບ ໂຮງຮຽນ ວິທະຍາ ຈາກເມືອງສີສັດຕະນາກ ເພື່ອຫາທີມຊະນະໄປພົບກັບ ມສ ຫົວຊຽງ ຕົວແທນເມືອງໄຊທານີ ໃນຮອບ 8 ທີມສຸດທ້າຍ, ສ່ວນຄູ່ອື່ນໆໃນຮອບ 8 ທີມມີ ມສ ສັງໄຊ ຈາກເມືອງສັງທອງ ພົບ ມສ ນາຊາຍທອງ ແຊັມເກົ່າ ຈາກເມືອງນາຊາຍທອງ, ມປ ທົ່ງປົ່ງ ຈາກເມືອງສີໂຄດຕະບອງ ພົບ ມສ ໜອງບອນ ຈາກເມືອງໄຊເສດຖາ ແລະ ມສ ສຸກສະຫວັດ ຈາກເມືອງຈັນທະບູລີ ພົບ ມສ ນາຝາຍ ຈາກເມືອງປາກງື່ມ.

ສ່ວນປະເພດທີມຍິງມີ 8 ທີມປະກອບມີ: ມສ ສີຖານ ຈາກເມືອງຫາກຊາຍຟອງ ພົບ ມຕ ອີ່ໄລ ຈາກເມືອງນາຊາຍທອງ, ໂຮງຮຽນ ກຽດຕິສັກ ຈາກເມືອງສີສັດຕະນາກພົບ ມສ ໂຄກສີວິໄລ ຈາກເມືອງໄຊທານີ, ມສ ໂພນທັນ ຈາກເມືອງໄຊເສດຖາ ພົບ ມສ ວຽງຈັນ ຈາກເມືອງຈັນທະບູລີ ແລະ ມສ ສົມສະຫວາດ ຈາກເມືອງປາກງື່ມ ພົບ ມສ ນາທຽມ ຈາກເມືອງສັງທອງ.

ສໍາລັບ ຮອບສຸດທ້າຍ ຈະເແຂ່ງຂັນໃນວັນ 8 ຕຸລາ ແຂ່ງຂັນຂັ້ນນະຄອນຫຼວງ ແລະ ວັນທີ 11 ຕຸລາ 2019 ນັດຊີງອັນດັບ 3 ແລະ ຊີງຊະນະເລີດ ໂດຍທຸກໆນັດຈະໃຊ້ສະໜາມ ລ້ານຊ້າງ ສະເຕດ້ຽມ ບ້ານໜອງໄຮ ເປັນສະໜາມຈັດການແຂ່ງຂັນ.

ທີ່ມາ: ໜັງສືພິມເສດຖະກິດ-ການຄ້າ