ມວຍສາກົນລາວ ໄປເກັບຕົວທີ່ປະເທດໄທ 20 ມື້ ກ່ອນລຸຍລາຍການທີ່ ສປ ຈີນ

375

ທັບນັກກີລາມວຍສາກົນລາວ ເດີນທາງໄປເກັບຕົວທີ່ສູນຝຶກກີລາແຫ່ງຊາດຂອງປະເທດໄທ ທີ່ອໍາເພີໝວກເຫຼັກ ຈັງຫວັດສະຣະບຸລີ ເມື່ອວັນທີ 1 ຕຸລາ 2019, ເຊິ່ງຈະໃຊ້ເວລາເກັບຕົວ 20 ມື້ ກ່ອນກຽມພ້ອມໄປແຂ່ງຂັນລາຍການທີ່ ສປ ຈີນ ທີ່ຈະເປີດສາກຂຶ້ນໃນວັນທີ 23 ຕຸລາ 2019.

 ທ່ານ ອຸດອນ ຂັນໄຊ ຄູຝຶກນັກກີລາມວຍສາກົນທີມຊາດລາວ ເປີດເຜີຍກ່ອນອອກເດີນທາງໄປປະເທດໄທ ໃນວັນທີ 1 ຕຸລາ 2019 ວ່າ: ນັກກີລາເດີນທາງໄປເກັບຕົວທີ່ປະເທດໄທ ຊຸດນີ້ປະກອບມີ 8 ຄົນ ໃນນັ້ນເປັນຍິງ 2 ຄົນ ໂດຍຈະໃຊ້ເວລາເກັບຕົວ 20 ວັນລະຫວ່າງວັນທີ 1-20 ຕຸລາ 2019 ເພື່ອກຽມພ້ອມໄປແຂ່ງຂັນລາຍການລະດັບອາຊີທີ່ ສປ ຈີນ ໃນວັນທີ 23 ຕຸລາ 2019,​ ເຊິ່ງພວກເຮົາສົ່ງເຂົ້າຮ່ວມ 2 ຮຸ່ນຄື ຮຸ່ນ 49 ທ້າວ ຄໍາພູວັນ ຄໍາສະທອນ ແລະ ຮຸ່ນ 60 ກິໂລ ທ້າວ ສີແພ ມະນີຈັນ, ສ່ວນນັກກີລາຄົນອື່ນໆແມ່ນເກັບຕົວທີ່ປະເທດໄທ ເພື່ອກຽມພ້ອມໃສ່ຊີເກມ 2019 ຕໍ່ໄປ.

ຂະນະທີ່ ທ້າວ ຄໍາພູວັນ ຄໍາສະທອນ ນັກມວຍຄວາມຫວັງຂອງ ສປປ ລາວ ກ່າວວ່າ: ສໍາລັບ ນ້ອງເອັງໄດ້ເລີ່ມເຂົ້າສູນຝຶກຊ້ອມທີມຊາດທີ່ ສູນຝຶກສີເກີດ ຕັ້ງແຕ່ວັນທີ 2 ກັນຍາ 2019 ໂດຍຊ້ອມຕັ້ງແຕ່ວັນຈັນ-ວັນເສົາ ໃນຕອນແລງ ແລະ ນ້ອງມີນັດໄປແຂ່ງຂັນທົດສອບໃນລາຍການທີ່ ສປ ຈີນ ໃນວັນທີ 23 ຕຸລາ 2019 ກ່ອນລຸຍຊີເກມ ຫຼັງມີຊື່ໄປຮ່ວມແຂ່ງຂັນທີ່ເປັນທີ່ຮຽບຮ້ອຍ ໂດຍນ້ອງຈະລົງແຂ່ງຂັນຮຸ່ນ 49 ກິໂລກຣາມ ”  ນ້ອງເບຍ ກ່າວ.

ຂ່າວຈາກ: ໜັງສືພິມເສດຖະກິດ-ການຄ້າ