ຮ່ວມບໍລິຈາກໃນງານແລ່ນ 385 ກິໂລແມັດແຕ່ ວຽງຈັນ ຫາ ຫຼວງພະບາງ ກາງເດືອນນີ້

486

ອີງຕາມການຖະແຫຼງຂ່າວ ໃນວັນທີ 29 ກັນຍາ 2019 ທີ່ຮ້ານອາຫານ ຂອບໃຈເດີ ກຽມຈັດໂຄງການແລ່ນ 385 ກິໂລແມັດ ແຕ່ນະຄອນຫຼວງວຽງຈັນ ຫາ ນະຄອນຫຼວງພະບາງ ປີນີ້ຈັດຂຶ້ນເພື່ອ 2 ເປົ້າໝາຍຄື: ເພື່ອເດັກນ້ອຍ ແລະ ເພື່ອບັນເທົ່າໄພພິບັດ ໂດຍກໍານົດເອົາ 4 ວັນໃນການແລ່ນລະດົມທຶນລະຫວ່າງວັນທີ 15-18 ຕຸລາ 2019

 ທ່ານ ນາງ ມານິດາ ສິດທິມໍລະດາ ຜູ້ກໍ່ຕັ້ງທີມວີຣັນ ທັງເປັນຫົວໜ້າຜູ້ຈັດໂຄງການແລ່ນ 385 ກິໂລແມັດ ຖະແຫຼງການວ່າ: ໂຄງການແລ່ນ 385 ກິໂລແມັດຈັດຂຶ້ນມາເປັນປີທີ 5 ເພື່ອຊ່ວຍເຫຼືອສັງຄົມ ໂດຍສະເພາະແມ່ນການລະດົມທຶນເຂົ້າໃນການສ້າງໂຮງໝໍ ເພື່ອນລາວ ສໍາລັບເດັກນ້ອຍແບບບໍ່ໄດ້ເສຍຄ່າ ທີ່ຫຼວງພະບາງ ສ່ວນປີນີ້ພວກເຮົາຈະຈັດເພື່ອລະດົມທຶນຊ່ວຍ 2 ຈຸດໝາຍຄື: ເຄິ່ງໜຶ່ງມອບໃຫ້ກັບ ໂຮງໝໍ ເພື່ອນລາວ ແລະ ອີກເຄິ່ງໜຶ່ງມອບໃຫ້ຜູ້ປະສົບໄພ

ສໍາລັບ ການແລ່ນໃນຄັ້ງນີ້ມີຈິດອາສາເຂົ້າຮ່ວມທັງໝົດ 8 ຄົນຫຼັກໆ ໃນນັ້ນແບ່ງອອກເປັນ 3 ກຸ່ມຄື ກຸ່ມທີ 1 ມີນັກແລ່ນ 1 ຄົນຄື ທ່ານ ຄາໂລ ບາຄາລາ ນັກແລ່ນມາລາທອນຊາວຟິລິບປິນ ຜູ້ລິເລີ່ມການແລ່ນ 385 ກິໂລແມັດ ແລ່ນ 100 ກິໂລແມັດຕໍ່ມື້, ກຸ່ມທີ 2 ມີນັກແລ່ນ 3 ຄົນແລ່ນຜູ້ລະ 50 ກິໂລແມັດຕໍ່ມື້ ທ່ານ ນາງ ເຈີຣາດີນ ແຢມ ຈາກອົດສະຕຣາລີ, ທ່ານ ໄຣອັນ ຄາຄາຢານ ຈາກຟິລິບປິນ ແລະ ທ່ານ ຖິຕິພົງ ພົງໄພລັດ ຈາກລາວ,​ ສ່ວນກຸ່ມທີ 3 ມີ 4 ທ່ານແລ່ນຜູ້ລະ 25 ກິໂລແມັດຕໍ່ມື້ ທ່ານ ດາລາສົມ ສຸດທິພົງ ຈາກລາວ, ທ່ານ ນິມມານ ພົນປະເສີດ ຈາກລາວ, ທ່ານ ວິລະພອນ ພຸດທະວົງໄຊ ນັກກີລາລົດຖີບຄົນພິການທີມຊາດລາວ ແລະ ທ່ານ ທະວີສັກ ລໍາພາທອງ ຈາກໄທ