ຄໍາປານທີ່ຄ້າຍຝຶກຊ້ອມ ບາເຢິນ ມິວນິກ

309

ກາຍເປັນນັກເຕະເຕັມຕົວສໍາລັບຄໍາປານ ດວງວິໄລ ນັກເຕະເຍົາວະຊົນລາວຈາກແຂວງສາລະວັນ ທີ່ໄດ້ໄປເກັບປະສົບການໃນໂຄງການ Allianz Explorer Camp ເຊິ່ງເປັນການຮ່ວມຄ້າຍຝຶກຊ້ອມກັບ ບາເຢິນ ມິວນິກສະໂມສອນຊັ້ນນໍາຂອງໂລກເຖິງເມືອງມິວນິກ ປະເທດເຢຍລະມັນ ຕະຫຼອດໄລຍະເກືອບ 1 ອາທິດ ລະຫວ່າງວັນທີ 22 – 27 ສິງຫາ 2019.

ຄໍາປານ ພ້ອມດ້ວຍຄະນະຈາກບໍລິສັດ ອາລິອັນສ໌ ປະກັນໄພລາວ ເດີນທາງໄປປະເທດເຢຍລະມັນ ໃນວັນທີ 20 ສິງຫາ 2019, ຮອດວັນທີ 22 ສິງຫາ 2019ໄດ້ເລີ່ມຮ່ວມກິດຈະກໍາ ແລະ ຝຶກຊ້ອມກັບ ຄະນະຄູຝຶກຢ່າງໃກ້ຊິດຮ່ວມກັບນັກເຕະເຍົາວະຊົນອາຍຸລະຫວ່າງ 14 – 16 ປີ ທີ່ມາຈາກທົ່ວໂລກຫຼາຍກວ່າ 50 ຄົນ ຈາກ 20 ກວ່າປະເທດ;ອີງຕາມຂໍ້ມູນຈາກເວັບໄຊທາງການ www.fcbayern.comຈົນມາເຖິງວັນທີ 27 ສິງຫາ 2019ໂຄງການດັ່ງກ່າວໄດ້ສໍາເລັດ.

ກ່ອນກັບ ສປປ ລາວ ຄໍາປານເປີດເຜີຍຕໍ່ ທີມຂ່າວໜັງສືພິມ ເສດຖະກິດ – ການຄ້າ ທາງເຟສບຸ໊ກວ່າ:ກ່ອນອື່ນຕ້ອງຂໍຂອບໃຈ ບໍລິສັດ ອາລິອັນສ໌ ປະກັນໄພລາວທີ່ໃຫ້ໂອກາດນ້ອງມາເຖິງປະເທດເຢຍລະມັນ ເຊິ່ງການເຂົ້າຮ່ວມໂຄງການດັ່ງກ່າວຮູ້ສຶກຕື່ນເຕັ້ນທີ່ສຸດກວ່າທີ່ຜ່ານມາ ທີ່ໄດ້ພົບໝູ່ຊາວຕ່າງຊາດຈາກທົ່ວໂລກທີ່ຊະນະເລີດໃນຮອບຄັດເລືອກ ແລະ ມີຄວາມສາມາດຫຼາກຫຼາຍມາແລກປ່ຽນກັນ, ສ່ວນມື້ຕໍ່ໆມາກໍມີຄະນະຄູຝຶກຈາກສະໂມສອນ ບາເຢິນ ມິວນິກມາສອນເຕັກນິກຕ່າງໆໃຫ້ ພ້ອມທັງມີການອຸ່ນເຄື່ອງ ແລະ ໄດ້ໄປທ່ຽວຕາມສະຖານທີ່ຕ່າງໆໂດຍສະເພາະໄດ້ຢ້ຽມຢາມສະໜາມ Allianz Arena ສະໜາມຂອງ ບາເຢິນມິວນິກ ສະໂມສອນຊັ້ນນໍາຂອງ ບຸນເດສລີກາ ເຢຍລະມັນ ລວມທັງໄດ້ໄປເບິ່ງຂັນແຊັມ ແລະຂອງທີ່ລະນຶກຕ່າງໆ.

“ ພິເສດມື້ສຸດທ້າຍວັນທີ 27 ສິງຫາ 2019ໄດ້ມີຕົວແທນນັກເຕະຂອງ ບາເຢິນ ມິວນິກ ຊຸດໃຫຍ່ຢ່າງ ລີອອນ; ໂກເຣດກ້າ ( Leon Goretzka ) ກອງກາງ ແລະ ທີມຊາດເຢຍລະມັນ ໄດ້ມາເລົ່າປະສົບການ, ຮ່ວມຖ່າຍຮູບ ແລະ ມອບລາຍເຊັນໃຫ້ກັບບັນດານັກເຕະເຍົາວະຊົນທີ່ເຂົ້າຮ່ວມໃນການແຂ່ງຂັນຄັ້ງນີ້ ເປັນເວລາທີ່ໜ້າປະທັບໃຈຫຼາຍ.ແນ່ນອນການມາຄັ້ງນີ້ນ້ອງໄດ້ປະສົບການຫຼາຍໆຢ່າງໂດຍສະເພາະໄດ້ຝຶກຊ້ອມກັບຄູຝຶກທີ່ເຄີຍສອນນັກເຕະທີ່ມີຊື່ສຽງຢ່າງ ອາເຢັນ ຣ໊ອບເບນ ແລະຟຣ໊ອງ ຣີເບຣີ 2ນັກເຕະທີ່ມີຊື່ສຽງຂອງໂລກ, ສ່ວນແຜນຕໍ່ໄປຂອງນ້ອງຈະໄປຮ່ວມຄັດເລືອກກັບທີມຊາດລາວ ຮຸ່ນອາຍຸບໍ່ເກີນ 16 ປີ ”, ຄໍາປານ ກ່າວ.

ສໍາລັບ ຄໍາປານ ດວງວິໄລ ປັດຈຸບັນອາຍຸ 15 ປີ ຈາກເມືອງສະໝ້ວຍ ແຂວງສາລະວັນ ໄດ້ເຂົ້າໂຄງການ Allianz Explorer Camp 2019 ສິງກະໂປ ຮ່ວມກັບຜູ້ຊະນະຈາກບັນດາປະເທດອາຊຽນ ໃນລະຫວ່າງວັນທີ 23 – 26 ກໍລະກົດ 2019 ໂດຍມີນັກກີລາທັງໝົດ 43 ຄົນ ຈາກ 8 ປະເທດ ແລະ ກາຍເປັນຜູ້ຊະນະເລີດຖືກຄັດເລືອກໃຫ້ເປັນ 1 ໃນ 6 ຄົນ ທີ່ຄວ້າສິດໄປຮ່ວມກິດຈະກໍາ ແລະ ຝຶກຊ້ອມບານເຕະກັບໂຄງການດັ່ງກ່າວຕໍ່ທີ່ປະເທດເຢຍລະມັນ ລະຫວ່າງວັນທີ 22 – 27 ສິງຫາທີ່ຜ່ານມາ.

ຂໍ້ມູນຈາກ: ໜັງສືພິມເສດຖະກິດ ການຄ້າ