ຄາລສະເບີກ ກ໊ອຟ ຄລາສສິກ 2019 ເລື່ອນໄປຈັດໃສ່ທ້າຍເດືອນມີນາ

425

ສະຫະພັນກ໊ອຟແຫ່ງຊາດລາວ ຮ່ວມກັບ ຄາລສະເບີກ ( Carlsberg ) ຜະລິດຕະພັນເບຍທີ່ມີຊື່ສຽງເລື່ອນຈັດການແຂ່ງຂັນກ໊ອຟລາຍການ ຄາລ ສະເບີກ ກ໊ອຟ ຄລາສສິກ 2019 ( Carlsberg Golf Classic 2019 ) ທີ່ ສປປ ລາວ ໄປໃສ່ທ້າຍເດືອນມີນາ 2019 ເພື່ອເປັນການຕໍ່ຍອດຜົນສໍາເລັດໃນການຈັດການແຂ່ງຂັນກ໊ອຟລາຍການດັ່ງກ່າວເມື່ອປີ 2018 ໃຫ້ມີ ຄວາມຕໍ່ເນື່ອງ ທັງເປັນການສົ່ງເສີມ ແລະ ສ້າງບັນຍາກາດໃຫ້ວົງການກີລາກ໊ອຟລາວ ໃຫ້ມີການພັດທະນາກ້າວສູ່ລະດັບມາດຕະຖານສາກົນ.

ກ່ອນໜ້ານີ້ ລາຍການດັ່ງກ່າວກໍານົດຈັດໃນວັນທີ 23 ກຸມພາ 2019 ແຕ່ເນື່ອງຈາກບໍ່ມີຄວາມພ້ອມຈຶ່ງຕ້ອງເລື່ອນການແຂ່ງຂັນອອກໄປ. ຫຼ້າສຸດ, ຄະນະຮັບຜິດຊອບຈັດການແຂ່ງຂັນໃຫ້ຂໍ້ມູນ ວ່າ: ດ້ວຍປະສົບການຂອງຄາລສະເບີກ ແລະ ຕ້ອງການມອບປະສົບການທີ່ດີທີ່ສຸດໃຫ້ກັບລູກຄ້າ ຄາລສະເບີກ ຈຶ່ງນໍາສະເໜີຄວາມຕື່ນເຕັ້ນ ແລະ ມ່ວນຊື່ນໃນການແຂ່ງຂັນ ຄາລສະເບີກ ກ໊ອຟ ຄລາສສິກ 2019 ໂດຍຈະເລື່ອນໄປຈັດໃສ່ວັນທີ 30 ມີນາ 2019 ເຊິ່ງເມື່ອປີ 2018 ທີ່ຜ່ານມາການຈັດການແຂ່ງຂັນກີລາກ໊ອຟລາຍການນີ້ໄດ້ຮັບການຕອບຮັບເປັນຢ່າງດີຈາກນັກກ໊ອຟສະໝັກຫຼິ້ນສີມືດີທັງຄົນລາວ ແລະ ຕ່າງປະເທດເຂົ້າຮ່ວມການແຂ່ງຂັນຫຼາຍກວ່າ 250 ຄົນ.

ຄາລສະເບີກ ລາວ ໄດ້ວາງເປົ້າໝາຍໃນການຈັດການແຂ່ງຂັນກ໊ອຟລາຍການນີ້ໃຫ້ມີຄວາມຕໍ່ເນື່ອງພາຍໃນປີ ແລະ ຈັດການແຂ່ງຂັນໃຫ້ໄດ້ 3 ຄັ້ງ ໃນສະໜາມທີ່ແຕກຕ່າງກັນພາຍໃນນະຄອນຫຼວງວຽງຈັນ ໂດຍຈະແຂ່ງຂັນສະໜາມທໍາອິດຂອງລາຍການ ຄາລສະເບີກ ກ໊ອຟ ຄລາສສິກ 2019 ທີ່ສະໜາມກ໊ອຟຊີເກມ ( ຫຼັກ 16 ) ໃນວັນທີ 30 ມີນາ 2019, ສ່ວນຮູບແບບການແຂ່ງຂັນ ຄາລສະເບີກ ກ໊ອຟ ຄລາສສິກ 2019 ແມ່ນຈະແຂ່ງຂັນມື້ດຽວຈົບກໍານົດ 18 ຂຸມ, 1 ກ້ວນ ມີຈໍານວນນັກກ໊ອຟ 4 ທ່ານ ໃຊ້ລະບົບນັບຄະແນນມີ 2 ປະເພດ ຄື: ແບບ Cross and Net ຄ່າສະໝັກເຂົ້າຮ່ວມແຂ່ງຂັນແມ່ນ 700.000 ກີບຕໍ່ທ່ານ ແລະ ສາມາດລົງທະບຽນໄດ້ທີ່ລິ້ງ: https://www.wgalaos.org/cgc-2019.

ສໍາລັບຜູ້ທີ່ໄດ້ຊະນະເລີດແຕ່ລະປະເພດຈະໄດ້ຮັບຂັນລາງວັນ ແລະ ຂອງຂວັນຈາກຄາລສະເບີກ. ນອກນັ້ນ, ຍັງມີລາງວັນອັນດັບ 2 – 3 – 4 ແລະ ຍັງມີລາງວັນພິເສດຕີໃກ້ 2 ລາງວັນ, ລາງວັນຕີໄກ 1 ລາງວັນ ແລະ ລາງວັນ Hole In One 2 ລາງວັນ ລຸ້ນຮັບຂອງລາງວັນຕ່າງໆອີກຫຼາຍລາຍການລວມມູນຄ່າຂອງລາງວັນທັງໝົດຫຼາຍກວ່າ 300 ລ້ານກີບ.