ຢູ 16 ໂດດເດັ່ນປາບ ອີຣານ 2 – 0 ຄັດບານເຕະຍິງຊີງແຊັມອາຊີ ຕັດສິນເຂົ້າຮອບນັດສຸດທ້າຍ

398

ທີມຊາດຍິງລາວ ຮຸ່ນອາຍຸບໍ່ເກີນ 16 ປີ ສ້າງຜົນງານໂດດເດັ່ນໃນນັດທີ 2 ຂອງຮອບຄັດເລືອກຮອບ 2 ໃນບານເຕະຍິງຊີງແຊັມອາຊີ 2019 ຮຸ່ນອາຍຸບໍ່ເກີນ 16 ປີ ທີ່ ສປປ ລາວ ເປັນເຈົ້າພາບ ຫຼັງເອົາຊະນະ ທີມຊາດອີຣານ 2 – 0 ເມື່ອວັນທີ 5 ມີນາທີ່ຜ່ານມາ ເກັບ 3 ຄະແນນ ເທົ່າກັບ ຫວຽດນາມ ຕ້ອງໄປຕັດສິນເຂົ້າຮອບກັບທີມນໍາຢ່າງ ອົດສະຕຣາລີ ໃນນັດສຸດທ້າຍ.

ການແຂ່ງຂັນບານເຕະຍິງຊີງແຊັມອາຊີ ຮຸ່ນອາຍຸ 16 ປີ ຮອບຄັດເລືອກ ຮອບທີ 2 ຫຼື AFC U – 16 WOMEN’S CHAMPIONSHIP 2019 QUALIFIERS ROUND 2 ໂດຍ ສປປ ລາວ ໄດ້ຮັບກຽດເປັນເຈົ້າພາບ ວັນທີ 03 – 07 ມີນາ 2019 ເຊິ່ງສາວລາວ ຢູ 16 ລົງສະໜາມນັດທໍາອິດເສຍໃຫ້ກັບຫວຽດນາມ ຫວຸດຫວິດ 0 – 1.

ຫຼ້າສຸດ, ໃນຕອນແລງວັນທີ 5 ມີນາ 2019 ສາວລາວ ຢູ 16 ລົງສະໜາມພົບກັບທີມຊາດອີຣານ ໂດຍທັງ 2 ທີມ ແມ່ນຍັງບໍ່ມີຈັກຄະແນນ ຜົນການແຂ່ງຂັນປາກົດວ່າ: ສາວລາວ ຢູ 16 ສາມາດເອົາຊະນະ ອີຣານ ໄດ້ຢ່າງໜ້າປະທັບໃຈ 2 – 0 ຈາກການຍິງຂອງ ພິມພາ ທອງສະຫວ່າງ ນາທີໆ 44 ແລະ ໃຈຄໍາ ນາທີໆ 66.

ຈາກຜົນດັ່ງກ່າວ ສົ່ງຜົນໃຫ້ທີມຊາດລາວ ເກັບ 3 ຄະແນນທໍາອິດ ຂຶ້ນມາຢູ່ອັນດັບ 3 ຂອງກຸ່ມ ໂດຍມີຄະແນນເທົ່າກັບອັນດັບ 2 ຫວຽດນາມ, ສ່ວນ ອົດສະຕຣາລີ ສ້າງຜົນງານໂດດເດັ່ນລົງສະໜາມ 2 ນັດ ຊະນະລວດມີ 6 ຄະແນນຢຶດທີມນໍາກຸ່ມ A ພ້ອມເຂົ້າຮອບສຸດທ້າຍເປັນທີ່ແນ່ນອນແລ້ວ.

ສະຖານະການດັ່ງກ່າວ ເຮັດໃຫ້ຕອນນີ້ທີມຊາດລາວ ກັບ ຫວຽດນາມ ຖ້າຫາກທີມໃດຊະນະນັດສຸດທ້າຍ ຈະຕາມອົດສະຕຣາລີ ເຂົ້າຮອບສຸດທ້າຍ ໂດຍສາວລາວ ຢູ 16 ງານໜັກເພາະຕ້ອງພົບກັບ ອົດສະຕຣາລີ ໃນວັນທີ 7 ມີນາ 2019 ເວລາ 18:30 ໂມງ, ສ່ວນ ຫວຽດນາມ ຈະພົບກັບ ອີຣານ ໃນວັນດຽວກັນເວລາ 15:00 ໂມງ ເຊິ່ງທັງສອງຄູ່ຈະແຂ່ງຂັນກັນທີ່ສະໜາມກີລາແຫ່ງຊາດ ຫຼັກ 16 ນະຄອນຫຼວງວຽງຈັນ ສປປ ລາວ.

ສໍາລັບຮອບຄັດເລືອກຮອບ 2 ຈະຄັດເອົາ ໂດຍອັນດັບ 1 ແລະ ອັນດັບ 2 ຂອງທັງ 2 ກຸ່ມ ເຂົ້າຮອບສຸດທ້າຍ ທີ່ຈະແຂ່ງຂັນໃນປະເທດໄທ ລະຫວ່າງວັນ 15 – 28 ກັນຍາ 2019 ເຊິ່ງທີມຊາດຍິງລາວ ຮຸ່ນອາຍຸ 16 ປີ ແມ່ນເຄີຍສ້າງປະຫວັດສາດຜ່ານເຂົ້າຮອບສຸດທ້າຍ ການແຂ່ງຂັນບານເຕະຍິງຊີງແຊັມອາຊີ ຮຸ່ນອາຍຸ 16 ປີ ໃນປີ 2017.

ສ່ວນຕອນນີ້ທີມທີ່ໄດ້ເຂົ້າຮອບສຸດທ້າຍແລ້ວປະກອບມີ: ໄທ ເຈົ້າພາບ, ສປປ ເກົາຫຼີ ແຊັມເກົ່າ, ສ.ເກົາຫຼີ ຮອງແຊັມເກົ່າ, ຍີ່ປຸ່ນ ທີມອັນດັບ 3 ຄັ້ງທີ່ຜ່ານມາ, ສປ ຈີນ ແຊັມກຸ່ມ B ໃນຮອບຄັດເລືອກຮອບ 2 ແລະ ບັງກລາເທດ ຮອງແຊັມກຸ່ມ B ໃນຮອບຄັດເລືອກຮອບ 2 ຍັງເຫຼືອອີກ 2 ສິດ ຄື: ແຊັມກຸ່ມ ແລະ ຮອງແຊັມກຸ່ມ A ຈາກຮອບຄັດເລືອກຮອບ 2.