ຕາມຄາດ 4 ພັນກວ່າຄົນ ຮ່ວມແຂ່ງແລ່ນ ວຽງຈັນ ຮາຟ ມາຣາທອນນາໆຊາດ ຄັ້ງທີ 4 …

406

ຖືວ່າເປັນໄປຕາມຄາດໝາຍ ສໍາລັບການແຂ່ງຂັນແລ່ນ ວຽງຈັນ ຮາຟ ມາຣາທອນນາໆຊາດ ຄັ້ງທີ 4 ປີ 2019 ( 4th Vientiane International Half Marathon 2019 ) ເມື່ອວັນອາທິດທີ 3 ມີນາ 2019 ມີຜູ້ເຂົ້າຮ່ວມເຖິງ 4 ພັນກວ່າຄົນ, ຂະນະທີ່ ລົດແກ້ວ ອິນທະກຸມມານ ນັກແລ່ນຍິງມື 1 ຂອງ ສປປ ລາວ ກໍສາມາດປ້ອງກັນແຊັມປະເພດ 21 ກິໂລແມັດຍິງ ໄດ້ຕາມຄາດເຊັ່ນກັນ.

ກ່ອນໜ້ານີ້ ທ່ານ ຈັນດີ ພົມມະບຸດ ປະທານສະຫະພັນແລ່ນ – ລານແຫ່ງຊາດລາວ ເປີດເຜີຍວ່າ: ຈາກການຈັດ 3 ຄັ້ງທີ່ຜ່ານມາ ເຫັນວ່າມີນັກກີລາເຂົ້າຮ່ວມນັບມື້ເພີ່ມຂຶ້ນ ເຊິ່ງສະແດງອອກ ຄື: ຄັ້ງທີ 1 ມີຈໍານວນນັກກີລາ 1.600 ຄົນ, ຄັ້ງທີ 2 ມີ 2.200 ຄົນ, ຄັ້ງທີ 3 ມີ 2.700 ຄົນ ແລະ ແນ່ນອນໃນປີນີ້ພວກເຮົາຄາດວ່າຈະມີຜູ້ເຂົ້າຮ່ວມ 4.000 ຄົນ ເພື່ອການສົ່ງເສີມການອອກກໍາລັງກາຍ ພ້ອມທັງເປັນການສະຫຼອງປີທ່ອງທ່ຽວ ລາວ – ຈີນ ອີກດ້ວຍ.

ຫຼ້າສຸດ, ຄະນະກໍາມະການຈັດການແຂ່ງຂັນດັ່ງກ່າວ ອອກມາເປີດເຜີຍວ່າ: ຜ່ານການແຂ່ງຂັນແລ່ນລາຍການດັ່ງກ່າວທີ່ແບ່ງອອກເປັນ 3 ປະເພດ ຄື: ຮາຟ ມາຣາທອນ 21 ກິໂລແມັດ, 10 ກິໂລແມັດ ແລະ ແລ່ນ – ຍ່າງເພື່ອສຸຂະພາບ 5 ກິໂລແມັດ ມີຜູ້ເຂົ້າຮ່ວມຕາມຄາດໝາຍຫຼາຍກວ່າ 4 ພັນຄົນ ໂດຍຈຸດປ່ອຍ ແລະ ເສັ້ນໄຊແມ່ນບໍລິເວນປະຕູໂຂງເດີ່ນທາດຫຼວງ.

ຂະນະທີ່ ນາງ ລົດແກ້ວ ອິນທະກຸມມານ ນັກແລ່ນຍິງມື 1 ຂອງ ສປປ ລາວ ສາມາດປ້ອງກັນແຊັມປະເພດ 21 ກິໂລແມັດຍິງ ຮຸ່ນທົ່ວໄປໄດ້ສໍາເລັດ ໂດຍການເຂົ້າເສັ້ນໄຊເປັນອັນດັບ 1 ດ້ວຍເວລາ 1 ຊົ່ວໂມງ 23 ນາທີ 41 ວິນາທີ ເອົາຊະນະອັນດັບ 2 Takako Fukuda ຈາກຍີ່ປຸ່ນ ທີ່ເຂົ້າເສັ້ນໄຊດ້ວຍເວລາ 1 ຊົ່ວໂມງ 36 ນາທີ 38 ວິນາທີ ແລະ ອັນດັບ 3 ນາງ ທັນຍາພອນ ທະຍາພອນ ຈາກປະເທດໄທ ພ້ອມທັງເປັນແຊັມ 3 ສະໄໝຊ້ອນຂອງ ລົດແກ້ວ ໃນລາຍການນີ້ຕໍ່ຈາກປີ 2017 ແລະ 2018.

ສ່ວນແຊັມ 21 ກິໂລແມັດຊາຍ ຮຸ່ນທົ່ວໄປ ຕົກເປັນຂອງ James Gikunga Karaja ຈາກເຄນຢາ, ແຊັມ 21 ກິໂລແມັດຊາຍ ຮຸ່ນ 50 – 59 ປີ ຕົກເປັນຂອງ Woradit Inthasuwan ຈາກປະເທດໄທ, ແຊັມ 21 ກິໂລແມັດ ຮຸ່ນອາຍຸ 16 – 29 ປີ ຕົກເປັນຂອງ ຕຸ້ຍ ໄຊຍະແສງ ຈາກປະເທດລາວ, ແຊັມ 21 ກິໂລແມັດຊາຍ ຮຸ່ນ 40 – 49 ປີ ເປັນຂອງ Yuki Hamada ຈາກຍີ່ປຸ່ນ ແລະ ແຊັມໄລຍະ 21 ກິໂລແມັດຊາຍ ຮຸ່ນ 60 ປີຂຶ້ນໄປເປັນຂອງ Nalong Vongkhiem ຈາກປະເທດໄທ.

ຮຸ່ນ 10 ກິໂລແມັດຊາຍທົ່ວໄປ ແຊັມເປັນຂອງ ສີສະຫວາດ ທໍາມະວົງຈິດ ຈາກລາວ, ແຊັມ 10 ກິໂລແມັດຊາຍ 60 ປີຂຶ້ນໄປ ເປັນຂອງ ທອງສຸກ ທໍາມະວົງຈິດ ຈາກລາວ, ແຊັມ 10 ກິໂລແມັດຊາຍ ຮຸ່ນ 50 – 59 ປີ ເປັນຂອງ ວຽງວິໄລ ໄພພຸດໄຊ ຈາກລາວ, ແຊັມ 10 ກິໂລແມັດຊາຍ ຮຸ່ນ 40 – 49 ປີ ແຊັມຕົກເປັນຂອງ ຕິດ ລິນຍະວົງສາ ຈາກລາວ, ແຊັມ 10 ກິໂລແມັດຊາຍ ຮຸ່ນ 30 – 39 ປີ ແຊັມຕົກເປັນຂອງ Tanakhan Kongkaew ຈາກໄທ ແລະ ແຊັມ 10 ກິໂລແມັດຊາຍ ຮຸ່ນ 12 – 19 ປີ ເປັນຂອງ ກົມ ສີສະໝຸດ ຈາກລາວ.

ສ່ວນແຊັມ 10 ກິໂລແມັດຍິງ ຮຸ່ນ 50 – 59 ປີ ເພັດພອນ ສົມສະຫວັນ ຈາກລາວ, ແຊັມ 10 ກິໂລແມັດຍິງ ຮຸ່ນ 40 – 49 ປີ ສຸພາວັນ ສາຍສະໝອນ ຈາກລາວ, ແຊັມ 10 ກິໂລແມັດຍິງ ຮຸ່ນ 20 – 29 ປີ ຄູນສະຫວັນ ຈາກລາວ, ແຊັມ 10 ກິໂລແມັດ ຍິງ ຮຸ່ນ 12 – 19 ປີ ດວງຈັນ ທໍາມະເລືອງ ແລະ ແຊັມ 10 ກິໂລແມັດຍິງ ທົ່ວໄປ Chinaru Watanabe ຈາກຍີ່ປຸ່ນ.