ສຕລ ເປີດຄັດນັກເຕະຍິງ ທີມຊາດລາວ ຢູ 15 ກັບ 19 ປີ ກຽມລຸຍລາຍການທີມຊາດ

823

ສະຫະພັນບານເຕະແຫ່ງຊາດລາວ ປະກາດຜ່ານເຟສບຸ໊ກທາງການວ່າ: ອີງຕາມແຜນການເຄື່ອນໄຫວຂອງ ສະຫະພັນບານເຕະແຫ່ງຊາດລາວ ( ສຕລ ) ປະຈໍາປີ 2019, ສຕລ ມີຈຸດປະສົງຄັດເລືອກນັກກີລາທີ່ມີພອນສະຫວັນ ແລະ ທັກສະ ເພື່ອກະກຽມນັກກີລາທີມບານເຕະຍິງທີມຊາດລາວ ຮຸ່ນອາຍຸ 15 ປີ ເຂົ້າຮ່ວມການແຂ່ງຂັນບານເຕະຍິງຊີງແຊັມອາຊຽນ ຮຸ່ນອາຍຸ 15 ປີ ( AFF U – 15 GIRLS’ CHAMPIONSHIP 2019 ) ລະຫວ່າງວັນທີ 9 – 22 ພຶດສະພາ 2019 ຢູ່ທີ່ແຂວງຊົນບູຣີ ປະເທດໄທ ໂດຍທີມຊາດລາວ ຢູ່ກຸ່ມ ບີ ຮ່ວມກັບ ໄທ, ມາເລເຊຍ, ສິງກະໂປ ແລະ ກຳປູເຈຍ.

ສ່ວນການຄັດເລືອກທີມຊາດຍິງ ຢູ 19 ເພື່ອກະກຽມເຂົ້າຮ່ວມການແຂ່ງຂັນລາຍການ Bangmata U19 Women’s International Gold Cup 2019 ຢູ່ທີ່ປະເທດບັງກລາເທດ ໃນລະຫວ່າງວັນທີ 22 ເມສາ ຫາ 03 ພຶດສະພາ 2019 ເຊິ່ງການຄັດເລືອກຈະໄດ້ຈັດຂຶ້ນໃນວັນທີ 3 – 17 ເມສາ 2019 ທີ່ສູນຝຶກສະຫະພັນບານເຕະແຫ່ງຊາດລາວ ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ ໃນເວລາ 16:30 -18:30 ໂມງ.

ສໍາລັບເງື່ອນໄຂຂອງນັກກີລາທີ່ເຂົ້າຮ່ວມການຄັດເລືອກມີດັ່ງນີ້:

-ນັກກີລາທີ່ເຂົ້າຮ່ວມຄັດເລືອກຕ້ອງຮັບປະກັນຄວາມພ້ອມຂອງຮ່າງກາຍຕະຫຼອດໄລຍະການຄັດເລືອກ.

-ສຳລັບນັກກີລາຕ່າງແຂວງທີ່ຕ້ອງການມາຄັດເລືອກນັກກີລາໃນຄັ້ງນີ້ທາງສະຫະພັນບານເຕະແຫ່ງຊາດລາວແມ່ນອຳນວຍຄວາມສະດວກທາງດ້ານທີ່ພັກ ແແລະ ອາຫານການກິນຕະຫຼອດໄລຍະການຄັດເລືອກ, ສ່ວນການເດີນທາງແມ່ນຮັບຜິດຊອບເອງ.

– ຕິດຕໍ່ສອບຖາມຂໍ້ມູນເພີ່ມຕື່ມໄດ້ທີ່ເບີ:020 5251 2321, 020 5896 7148.