ເປີດໃຈ ສາວ ດາວມະຍຸລີ ເຮັດແນວໃດໃຫ້ເກັ່ງຈົນກ້າວສູ່ແຊັມມວຍໂລກ

608

ຍັງເປັນກະແສທີ່ມາແຮງສຸດໆ ແລະຕິດຕາຊາວລາວທັງປະເທດ ສໍາລັບ ນາງ ດາວມະຍຸລີ ຈັນທິລາດ ( ດີ້ ສາວລາວ )ນັກມວຍຍິງຊາວລາວ ອາຍຸ 21 ປີ ທີ່ສາມາດເອົາຊະນະນັກມວຍຈາກເມັກຊິກໂກ ໄປສະບາຍໃນຍົກທີ 2ຄວ້າສາຍແອວແຊັມໂລກ ລາຍການຊີງແຊັມມວຍໄທໂລກ ຄັ້ງທີ 2 ( The 2nd Pro – Am World Championship ) ທີ່ນະຄອນຣາຊະສີມາ ປະເທດໄທ ເມື່ອວັນທີ 15 ມີນາ 2019 ຢ່າງຍິ່ງໃຫຍ່.

ດາວມະຍຸລີ ລົງແຂ່ງຂັນໃນລຮຸ່ນ 50 ກິໂລກຣາມ ມີນັກມວຍ 4 ຄົນເຂົ້າຮ່ວມຊີງແຊັມ ( ໄທ 2, ລາວ 1 ແລະ ເມັກຊິກໂກ 1 ຄົນ ) ປາກົດວ່າ: ຂຶ້ນເວທີໄຟທ໌ທໍາອິດເມື່ອວັນທີ 13 ມີນາ 2019 ສາມາດເອົາຊະນະນ໊ອກ ເພັດພະຫງາດ ນັກມວຍຈາກໄທ ໄປສະບາຍໃນຍົກທີ 2 ໄດ້ຜ່ານເຂົ້າຮອບຊີງສາຍແອວແຊັມກັບ Alejandro Citlali Montoya Lopez ນັກມວຍຈາກເມັກຊິກໂກ ທີ່ເອົາຊະນະ ຍິ້ມສະຢາມ ຈາກໄທ ໃນຮອບທໍາອິດ ເຊິ່ງໃນຮອບຊີງສາຍແອວແຊັມ ດາວມະຍຸລີ ເດີນໜ້າບຸກຢ່າງຕໍ່ເນື່ອງ ກ່ອນເອົາຊະນະຄະແນນ Alejandro Citlali Montoya Lopez ເຮັດໃຫ້ ດາວມະຍຸລີ ຄວ້າແຊັມມາປະດັບແອວໄດ້ສໍາເລັດ.

ເຫດການດັ່ງກ່າວໂດ່ງດັງໄປຊົ່ວຂ້າມຄືນເພາະຄັ້ງນີ້ຖືເປັນການປະກາດສັກດາກັບມວຍຍິງລາວອີກຄັ້ງ ເພາະກ່ອນໜ້ານີ້ ນາງ ນໍ້າເພັດຂວັນໃຈສີໂຄດ ຫຼື ມີນາ ກຸນລະວົງເຄີຍສ້າງປະຫວັດສາດເປັນນັກມວຍຍິງຊາວລາວທີ່ຄວ້າສາຍແອວສະພາມວຍໂລກແຫ່ງອາຊີ ( WBCAsia ) ໃນຮຸ່ນນໍ້າໜັກ 48 ກິໂລກຣາມ ( ລຸ້ນໄລຟລາຍເວດ )ຫຼັງເອົາຊະນະ ການດາ ເມືອງເພັດ ຈາກໄທ ເມື່ອເດືອນສິງຫາ 2014.

ຫຼ້າສຸດ ດາວມະຍຸລີກັບມາຝຶກຊ້ອມຢ່າງເປັນປົກກະຕິ ເມື່ອວັນຈັນທີ 25 ມີນາ 2019 ໃຫ້ສໍາພາດກັບທີມງານໜັງສືພິມເສດຖະກິດ – ການຄ້າ ເຖິງຈຸດເລີ່ມຕົ້ນ, ເຄັດລັບ, ເປົ້າໝາຍ ແລະ ອື່ນໆ ດັ່ງນີ້:

1.ຈຸດເລີ່ມຕົ້ນຂອງການກ້າວສູ່ວົງການມວຍ:ສໍາລັບນ້ອງເຄີຍມີຄວາມຄິດທີ່ບໍ່ມັກກີລາແບບຕໍ່ສູ້້ ເພາະຢ້ານການກະທົບ ແລະໄດ້ຮັບບາດເຈັບທີ່ສຸດແຕ່ເຫດຜົນທີ່ນ້ອງຫັນມາຫຼິ້ນກີລາແມ່ນຕອນສະໄໝຍັງຮຽນມັດທະຍົມຢູ່ນັ້ນແມ່ນຕິດໂທລະສັບຢ່າງໜັກ ແລະ ຄອບຄົວເຫັນວ່າຕົວເອງເປັນເດັກນ້ອຍ ແລະບໍ່ມີເປົ້າໝາຍໃນຊີວິດ ກ່ອນທີ່ ອາຈານ ຊາຟາ ເຊິ່ງເປັນທັງອ້າຍເຂີຍ ແລະ ຄູຝຶກ
ໄດ້ໄປປຶກສາກັບພໍ່ແມ່ ເພື່ອເອົານ້ອງມາຝຶກຊ້ອມສິລະປະການປ້ອງກັນຕົວກໍຄືມວຍຄິກບ໊ອກຊິ້ງ ( Kickboxing ) ແລະ ກໍໄດ້ເລີ່ມຝຶກຊ້ອມມາຕັ້ງແຕ່ປີ 2013 ຈົນກາຍເປັນຈຸດປ່ຽນຂອງຊີວິດ ເພາະມັນມີຄວາມມ່ວນ,ໄດ້ປະສົບການ, ຄວາມຮູ້ສັງຄົມກີລາ ແລະໄດ້ຮູ້ວ່າການແຂ່ງຂັນມວຍບໍ່ໄດ້ໂຫດຮ້າຍຢ່າງທີ່ຄິດ ລວມເຖິງໄດ້ເຫັນເຖິງເປົ້າໝາຍ.

2.ເລີ່ມຝຶກຊ້ອມມວຍເຕັມຊຸດ: ພາຍຫຼັງຫັນຈາກການຫຼິ້ນກີລາບານສົ່ງທີ່ເປັນກີລາແບບທີມ ມາຫຼິ້ນກີລາແບບດ່ຽວກໍຄືການຝຶກມວຍ ແລະ ສິລະປະການຕໍ່ສູ້ຕ່າງໆນັ້ນ ນ້ອງຕັ້ງເປົ້າຈະໃຫ້ຈົບ ມ 7 ສາກ່ອນຈຶ່ງຫັນມາຝຶກຊ້ອມມວຍຢ່າງເຕັມທີ່ ຈົນມາເຖິງປີ 2016 ກໍໄດ້ຈົບ ມ 7 ກ່ອນໄດ້ມາຝຶກຊ້ອມມວຍແບບເຕັມທີ່ ເກືອບວ່າເປັນອາຊີບ ເພາະຕ້ອງນອນ, ກິນ ແລະ ຢູ່ ຟາຊາ ຢິມ ຄ້າຍມວຍເລີຍ.

3. ເຄັດລັບ: ວົງຈອນຊີວິດຂອງນ້ອງກໍຄືຕື່ນແຕ່ເຊົ້າ 6:00 ໂມງຂຶ້ນມາຝຶກຊ້ອມແລ້ວ ປະມານ 9:00 ໂມງກິນເຂົ້າ, ອາບນໍ້າ, ນອນ, ຕື່ນ. ສ່ວນຕອນສວາຍແມ່ນກິນເຂົ້າ, ພັກຜ່ອນ ແລະ ມາຝຶກຊ້ອມກີລາ 16:00 ໂມງ ໂດຍມື້ໜຶ່ງຈະຝຶກຢ່າງໜ້ອຍ 4ຊົ່ວໂມງຂຶ້ນໄປ ຈະເຮັດແບບນີ້ໄປເລື້ອຍໆ ເພື່ອເຮັດໃຫ້ເປັນອາຊີບຫຼາຍທີ່ສຸດ.

4. ອາຫານ: ເວລາຫຼຸດນໍ້າໜັກຈະຄຸມອາຫານໂດຍກິນອາຫານປະເພດຜັກ, ໝາກໄມ້, ເຂົ້າກ້ອງ, ເຂົ້າໂອດ, ອາຫານທະເລ, ຊີ້ນຕ້ອງເປັນຊີ້ນເນື້ອສີຂາວ, ຕ້ອງມີໂປຣຕິນ ແລະ ນ້ຳມັນມີແຕ່ນໍ້າມັນໝາກກອກ, ຄາໂບໄຮເດຣດ, ແອລມອນເປັນຕົ້ນບໍ່ເນັ້ນໃສ່ເຄື່ອປຸງເຄມີແປ້ງນົວ, ນ້ຳຕານ ແລະ ອື່ນໆທີ່ເປັນເຄມີຈະບໍ່ໃສ່ເລີຍ, ສ່ວນໄຂມັນຈະກິນບໍ່ຫຼາຍເພາະຮັກສານໍ້າໜັກລະຫວ່າງ 50 ກິໂລ ເພື່ອໃນເວລາຢາກຫຼຸດ ຫຼື ເພີ່ມນໍ້າໜັກເພື່ອບໍ່ໃຫ້ເມື່ອຍຫຼາຍ ໂດຍຄວບຄຸມເຄື່ອງປຸງທີ່ມີແປ້ງນົວ, ນໍ້າຕານ ແລະ ເກືອຕ້ອງໃຫ້ເໝາະສົມ, ສ່ວນອາຫານທົ່ວໆໄປຈະກິນອາທິດໜຶ່ງ 2 – 3ເທື່ອພໍໃຫ້ຮ່າງກາຍໄດ້ຮູ້ກັບລົດຊາດຂອງມັນ.

5. ເປົ້າໝາຍ: ແຕ່ກ່ອນເປັນຄົນທີ່ໃຊ້ຊີວິດແບບທໍາມະດາ ແລະ ບໍ່ມີເປົ້າໝາຍໃນຊີວິດ ແຕ່ຫຼັງຈາກມາໄດ້ຝຶກກີລາມວຍລາວ ໄດ້ເຫັນເຖິງເປົ້າໝາຍຊີວິດຄືຢາກສ້າງຫຍັງໃຫ້ກັບຕົວເອງ, ສັງຄົມ ແລະ ປະເທດຊາດ ກໍຄືຢາກເປັນຍິງລາວທີ່ສ້າງຊື່ສຽງໃຫ້ກັບສັງຄົມ ແລະ ປະເທດຊາດ ເພື່ອເປັນຈຸດປະກາຍໃຫ້ກັບແມ່ຍິງລາວໂດດເດັ່ນຂຶ້ນເລື້ອຍໆ.

6. ຊາຍໃນຝັນ: ຢ່າງທີ່ນ້ອງຕັ້ງເປົ້າໄວ້ວ່າຕ້ອງມີຫຍັງສໍາລັບຕົວເອງສາກ່ອນ ເຊິ່ງຂ້ອຍມີເປົ້າໝາຍ ແລະ ໃຫ້ສໍາເລັດໃນລະດັບທີ່ດີທີ່ສຸດ. ຢ່າງໃດກໍຕາມ, ກໍປາສະຈາກບໍ່ໄດ້ທີ່ຈະຄິດກ່ຽວກັບເລື່ອງນີ້ ແນ່ນອນຊາຍທີ່ຈະເຂົ້າມາໃນຊີວິດຂອງນ້ອງ ຈະບໍ່ແມ່ນທໍາມະດາ ເພາະຕ້ອງເຂົ້າໃຈໃນການໃຊ້ຊີວິດຂອງນ້ອງ ເນື່ອງຈາກທຸກໆມື້ຕ້ອງໃຊ້ຊີວິດຄື: ຝຶກຊ້ອມກີລາ, ພັກຜ່ອນເປັນເວລາ ເພາະຖ້າບໍ່ໄດ້ຝຶກຊ້ອມເຕັມທີ່ກໍຈະສ້າງຜົນງານບໍ່ໄດ້ດີ ເຊິ່ງນ້ອງບໍ່ໄດ້ວ່າເລື່ອງການມີຄູ່ຄອງເປັນການຂັດຂວາງຊີວິດ, ແຕ່ຢາກໃຫ້ເຂົ້າໃຈວ່າ ຄົນທີ່ປະສົບຜົນສໍາເລັດລະດັບໃດ ກໍຈະພົບຊີວິດຄູ່ລະດັບນັ້ນ ສະຫຼຸບແລ້ວຜູ້ຊາຍທີ່ເຂົ້າມາໃນຊີວິດນ້ອງສໍາຄັນແມ່ນຕ້ອງເຂົ້າໃຈວ່າທັງສອງຈະເຮັດຫຍັງ ແລະ ໃຫ້ເວລາກັນ ລວມເຖິງຕ້ອງມີຄວາມຄິດເປັນຂອງຕົວເອງ, ມີເປົ້າໝາຍ, ຄວາມຝັນ ແລະ ມີຄວາມເປັນຜູ້ໃຫຍ່ ຫຼື ມີຄວາມຮູ້, ສ່ວນເລື່ອງຖານະແມ່ນບໍ່ເປັນອຸປະສັກ ເພາະຄົນທີ່ມີສິ່ງນີ້ແລ້ວ ຖ້າເຮົາຈະຢູ່ໃສກໍຈະຢູ່ລອດ.

ຂະນະດຽວກັນ, ທ່ານ Safaa FREEMAN ຄູຝຶກຂອງ ດາວມະຍຸລີ ໃຫ້ສໍາພາດ ວ່າ: ດາວມະຍຸລີ ເຄີຍເຂົ້າຮ່ວມແຂ່ງຂັນລາຍການນີ້ມາແລ້ວເມື່ອປີກາຍນີ້, ແຕ່ບໍ່ສາມາດຍາດໄດ້ແຊັມ ເຊິ່ງວ່າປີນີ້ສະຫະພັນມວຍໄທບູຮານໄດ້ເຊີນພວກເຮົາໄປແຂ່ງຂັນໃນນາມ ສປປ ລາວ ກ່ອນຈະປະກາດໃຫ້ສັງຄົມຮັບຮູ້ດ້ວຍການເປັນແຊັມມວຍໄທໂລກຄັ້ງທີ 2, ສໍາລັບ ສາວດີ້ ແມ່ນຝຶກທັງມວຍສາກົນ, ເທຄວັນໂດ, ຄາຣາເຕ, ມວຍລາວ ແລະ ມວຍຄິກບ໊ອກຊິ້ງ ເຊິ່ງມວຍຄິກບ໊ອກຊິ້ງທີ່ໃຊ້ຊົກ ແລະ ເຕະ ຈະບໍ່ມີການໃຊ້ສອກ ຫຼື ເຂົ່າເຊິ່ງແຕ່ກ່ອນຍັງບໍ່ທັນມີຢູ່ໃນລາວ ແຕ່ປັດຈຸບັນແມ່ນມີສະຫະພັນມວຍຄິກບ໊ອກຊິ້ງແລ້ວ
ທີ່ຫາກໍ່ສ້າງຕັ້ງຂຶ້ນໃນປີນີ້, ສໍາລັບແຜນຕໍ່ໄປຂອງ ດາວມະຍຸລີຈະມີຂຶ້ນມໍ່ໆນີ້ຈະເຂົ້າຮ່ວມການແຂ່ງຂັນມວຍສາກົນ ລາຍການປະຈໍາປີ ທີ່ພັດທະຍາ ປະເທດໄທໃນວັນທີ 7 ເມສາ 2019, ວັນທີ 17 ເມສາ 2019ຈະໄປແຂ່ງຂັນມວຍສາກົນລາຍການໃຫຍ່ຢ່າງ ມວຍສາກົນ ຊີງແຊັມອາຊີ ທີ່ບາງກອກ ປະເທດໄທ.

ສໍາລັບ ດາວມະຍຸລີ ຈັນທິລາດ ເກີດເມື່ອວັນທີ 19 ພະຈິກ 1998 ທີ່ບ້ານທ່າແຂກ ເມືອງຫາດຊາຍຟອງ ນະຄອນຫຼວງວຽງຈັນ ເປັນນັກມວຍທີ່ຫຼາຍໆຄົນຮູ້ຈັກຈາກຫຼາກຫຼາຍວົງການ ເປັນຕົ້ນແມ່ນຫຼິ້ນທັງເທຄວັນໂດ, ຄາຣາເຕ, ມວຍລາວ, ມວຍສາກົນ, ມວຍປໍ້າ ເປັນຕົ້ນ ໂດຍເລີ່ມເປັນທີ່ຮູ້ຈັກເມື່ອປີ 2013 ຈາກການຂຶ້ນແຂ່ງຂັນ ມວຍສາກົນ, ເທຄວັນໂດ ແລະ ຄາຣາເຕ ທັງພາຍໃນ ແລະ ຕ່າງປະເທດ ໂດຍສະເພາະໃນປີ 2017 ດາວມະຍຸລີ ກາຍເປັນນັກມວຍຍິງລາວຄົນທໍາອິດ ທີ່ເຂົ້າຮ່ວມແຂ່ງຂັນມວຍສາກົນຍິງ ໃນລາຍການຊີງແຊັມອາຊີ ທີ່ໂຮ່ຈິມິນ ປະເທດຫວຽດນາມ ແລະ ທັງເປັນນັກມວຍສາກົນຍິງລາວຄົນທໍາອິດທີ່ໄດ້ເຂົ້າຮ່ວມການແຂ່ງຂັນໃນເອຊຽນ ເກມ 2018 ທີ່ປະເທດສິງກະໂປ ທີ່ເສຍໃຫ້ Lin Yu – ting ຈາກໄຕ້ຫວັນ ໃນຮອບ 16 ຄົນ. ກ່ອນຫຼ້າສຸດຈະມາປະສົບຜົນສໍາເລັດຄວ້າແຊັມມວຍໄທໂລກ 2019.