ເປີດບໍລິສັດ ເອໄອດີຊີ ໂລຈິສຕິກ ບໍລິການຢູ່ແຂວງສະຫວັນນະເຂດແລ້ວ

226

ໃນວັນທີ 3 ຕຸລາ 2021 ຜ່ານມາ ໄດ້ມີພິທີເປີດການບໍລິການຂົນສົ່ງພາກໃຕ້ ແຂວງສະຫວັນນະເຂດ ຂຶ້ນທີ່ບໍລິເວນເດີ່ນຂອງຫ້ອງການກອງຄຸ້ມຄອງພາສີ VI ສະຫວັນນະເຂດ ນະຄອນໄກສອນພົມວິຫານ ໂດຍການເຂົ້າຮ່ວມຂອງ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ.

May be an image of 1 person, standing and outdoors

ທ່ານ ພຶດສະພາ ພູມມະສັກ ຜູ້ອຳນວຍການ ບໍລິສັດ ເອໄອດີຊີ ໂລຈິສຕິກ (AIDC Logistics) ຈຳກັດ ຜູ້ດຽວ ໄດ້ລາຍງານໃຫ້ຮູ້ວ່າ: ບໍລິສັດໄດ້ເລັງເຫັນໂອກາດທາງທຸລະກິດໃນການຂົນສົ່ງ ໂດຍສະເພາະດ້ານຄົມມະນາຄົມ ໂດຍເຊື່ອມຕໍ່ກັບໂຄງການທີ່ລັດຖະບານ ໄດ້ຕັດສິນໃຈລົງທຶນເຊື່ອມຕໍ່ກັບໂຄງການທາງລົດໄຟລາວ-ຈີນ (ລົດໄຟຄວາມໄວສູງ), ສະນັ້ນເຫັນໄດ້ວ່າຖ້າປະເທດລາວມີທ່າແຮງທາງດ້ານການຜະລິດສິນຄ້າ, ເປັນບ່ອນເຊື່ອມໂຍງສິນຄ້າຈາກປະເທດເພື່ອນບ້ານ ສົ່ງໄປປະເທດອ້ອມຂ້າງ ແລະ ເອົາສິນຄ້າຈາກປະເທດອ້ອມຂ້າງໄປສູ່ ສປ ຈີນ.

ເຊິ່ງບໍລິສັດໄດ້ເລີ່ມເຄື່ອນໄຫວຕັ້ງແຕ່ເດືອນມີນາ 2021 ໂດຍເລີ່ມຕົ້ນທີ່ແຂວງຈໍາປາສັກ ແລະ ແຂວງບໍລິຄໍາໄຊ, ຈາກການສຶກສາເບື້ອງຕົ້ນ ບໍລິສັດເຫັນໄດ້ວ່າແຂວງສະຫວັນນະເຂດ ເປັນແຂວງທີ່ມີກໍາລັງແຮງ, ມີລານຄ່ຽນຖ່າຍສິນຄ້າ ເຊິ່ງມີລານຄ່ຽນຖ່າຍ ICD ແລະ ລານຄ່ຽນຖ່າຍທ່າບົກ ທີ່ມີການຂົນສົ່ງສິນຄ້າສະເລ່ຍ 200-500 ຄັນຕໍ່ມື້. ນອກຈາກນີ້ ຍັງເປັນທາງເຊື່ອມຈອດກັບປະເທດອ້ອມຂ້າງເປັນຕົ້ນແມ່ນ ປະເທດໄທ ແລະຫວຽດນາມ ໂດຍມີດ່ານຊາຍແດນຄື: ດ່ານຂົວມິດຕະພາບ ລາວ-ໄທ ແຫ່ງທີ 2 ເຊິ່ງຂົນສົ່ງສິນຄ້າ: ນໍ້າຕານ, ໄມ້ວິກ, ໝາກໄມ້, ງົວ, ແບ້ ແລະ ອື່ນໆ; ດ່ານຊາຍແດນ ລາວ-ຫວຽດນາມ ແດນສະຫວັນ-ລາວບາວ ເຊິ່ງຂົນສົ່ງສິນຄ້າ: ນໍ້າຕານ, ເຄື່ອງນຸ່ງຫົ່ມ, ເຄື່ອງເອເລັກໂຕຣນິກ ແລະ ອື່ນໆ ແລະ ຍັງເປັນຈຸດທີ່ສໍາຄັນໃນຂໍ້ຕໍ່ຍອດໄປສູ່ສະຖານີລົດໄຟລາວ-ຈີນ.

ຈຸດເດັ່ນອັນສຳຄັນແມ່ນເປັນບໍລິສັດຂອງລາວ 100% ເຊິ່ງແຜນການຕໍ່ໜ້າໃນປີ 2022 ບໍລິສັດກໍມີແຜນຈັດຊື້ພາຫະນະເພີ່ມຕື່ມອີກໃຫ້ຄົບ 300 ຄັນ ແລະ ວາງເປົ້າໝາຍໃນປີ 2023 ແມ່ນ 500 ຄັນ, ໃນປີ 2024 ແມ່ນ 600 ຄັນ.