ເພື່ອຫຼຸດຜ່ອນຄວາມສ່ຽງ ຄະນະສະເພາະກິດແຂວງຄໍາມ່ວນ ໄດ້ລົງຂາຍສິນຄ້າໃຫ້ປະຊາຊົນເຖິງທີ່

180

ເພື່ອອໍານວຍຄວາມສະດວກແກ່ປະຊາຊົນໃນການຫຼຸດຜ່ອນຄວາມແອອັດຢູ່ຕະຫຼາດ ຄະນະສະເພາະກິດຂອງແຂວງຄໍາມ່ວນ ທີ່ປະກອບມີພະແນກອຸດສາຫະກຳ ແລະ ການຄ້າແຂວງຄໍາມ່ວນ ໃຫ້ມີທີມຈັດຊື້ອາຫານສົດໄປຂາຍໃຫ້ຜູ້ບໍລິໂພກຮອດເຮືອນ ເປັນຕົ້ນແມ່ນໃນເທສະບານແຂວງ ກໍຄືພາຍໃນຕົວເມືອງທ່າແຂກຢູ່ຕາມບັນດາບ້ານແດງ ທີ່ປິດການເຂົ້າ-ອອກໃຫ້ຜູ້ບໍ່ໄດ້ອອກໄປໃສມີອາຫານສຳຮອງ ແລະ ບໍ່ຕ້ອງໄປສ່ຽງຢູ່ຂ້າງນອກ.

ທ່ານ ບຸນໂຮມ ມຸກດາສັກ ຫົວໜ້າພະແນກອຸດສາຫະກໍາ ແລະ ການຄ້າແຂວງຄຳມ່ວນ ໃຫ້ສໍາພາດວ່າ: ສຳລັບປະເພດສິນຄ້າ ທີ່ນຳລົງມາຂາຍໃຫ້ກັບປະຊາຊົນຄັ້ງນີ້ ແມ່ນຈຳພວກຊີ້ນງົວ – ຄວາຍ, ໝູ, ປາ ແລະ ປະເພດພືດຜັກຕ່າງໆ ເພື່ອເຮັດໃຫ້ພວກເຂົາສາມາດຊື້ງ່າຍ ໃນຂະນະທີ່ກັກຕົວ ໂດຍທີ່ບໍ່ຕ້ອງເດີນທາງໄປໃສມາໃສໃນເຂດບ້ານແດງ, ບ້ານເຫຼືອງໃນໄລຍະທີ່ມີການປິດການເຂົ້າ-ອອກ ຫຼື ລັອກດາວ ໂດຍແບ່ງອອກເປັນ 3 ເຂດ ຄື: ເຂດຈອມແຈ້ງ ມີ 13 ບ້ານ, ນາໂບ ແລະ ຈອມແຈ້ງ ເຂດລະ 11 ບ້ານ.

ຜູ້ຮັບຜິດຊອບຂາຍ ແມ່ນໄດ້ລົງໄປທັງຕອນເຊົ້າ ແລະ ຕອນບ່າຍໃນແຕ່ລະວັນ ແຕ່ອະນຸຍາດໃຫ້ປະຊາຊົນອອກມາຊື້ຄອບຄົວລະຄົນ ແລະ ຕ້ອງຖືບັດຢັ້ງຢືນການສັກວັກແຊັງມາພ້ອມ ແລະ ບໍ່ມີປະຫວັດສຳຜັດໃກ້ຊິດກັບຜູ້ຕິດເຊື້ອມາກ່ອນ ໂດຍມີຕາງໜ້າຈາກອົງການປົກຄອງບ້ານເປັນຜູ້ຢັ້ງຢືນໃຫ້, ນອກຈາກນີ້ທັງຜູ້ໄປຂາຍ ແລະ ຜູ້ຊື້ສິນຄ້າຕ້ອງປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ.

ຂ່າວຈາກ: Lao National Radio