ເຄັດບໍ່ລັບກັບການເປັນແມ່ຄ້າຂາຍເຄື່ອງອອນລາຍໃນຍຸກໂຄວິດ

246

ທ່ານ ນາງ ທິບພາພອນ ຈັນທະວົງ ເຈົ້າຂອງຮ້ານຂາຍສິ້ນ ແລະ ເສື້ອຜ້າມືສອງ ເປັນແມ່ຄ້າຂາຍເຄື່ອງລາຍຜູ້ໜຶ່ງຢູ່ໃນນະຄອນຫຼວງວຽງຈັນ ເວົ້າວ່າ: ປັດຈຸບັນຕົນເອງ ກໍຍັງເປັນນັກສຶກສາຢູ່ ແຕ່ຍ້ອນມີຄວາມຮັກມັກໃນດ້ານການຄ້າຂາຍຢູ່ແລ້ວ. ສະນັ້ນ, ຈຶ່ງໄດ້ເລີ່ມທົດລອງເອົາສິ້ນຈາກຮ້ານຂອງປ້າມາຂາຍ ແລະ ກໍໄດ້ລອງຜິດ-ລອງຖືກຂາຍໃນລາຄາທີ່ຖືກແດ່ ແພງແດ່ ຈົນສາມາດຫາຈຸດທີ່ວ່າສາມາດຂາຍໄດ້ ແລະ ພໍມີກໍາໄລ, ການເຄື່ອງອອນລາຍເຮົາຕ້ອງເບິ່ງວ່າສິນຄ້າປະເພດໃດທີ່ຄົນນິຍົມ ແລະ ລາຄາໃດທີ່ທຸກຄົນສາມາດເຂົ້າເຖິງໄດ້ ຖ້າເຮັດແບບນີ້ຈະສາມາດຂາຍເຄື່ອງໄດ້.

May be an image of indoor

ການໃຊ້ສື່ສັງຄົມອອນລາຍໃນການເຂົ້າມາຊ່ວຍການຂາຍ ແມ່ນສາມາດສ້າງຍອດຂາຍໄດ້ອີກທາງ ເຊິ່ງຕົນເອງໄດ້ເລີ່ມສ້າງຕັ້ງເຟສບຸ໊ກເພຈ໌ເປັນຂອງຕົນເອງ ແລ້ວກໍໄດ້ເລີ່ມຖ່າຍຮູບສິນຄ້າ ແລະ ໂພສລົງໄປ ໂດຍອາໄສການແຊຣ໌ຈາກໝູ່ເພື່ອນເພື່ອເຮັດໃຫ້ຫຼາຍໆຄົນໄດ້ເຫັນສິນຄ້າ ແລະ ຮູ້ຈັກຮ້ານເຮົາ ເມື່ອມີຄົນຮູ້ຈັກແລ້ວເຂົາເຈົ້າກໍຈະເຂົ້າມາເບິ່ງມາເລືອກຊື້ເຄື່ອງນໍາຮ້ານ ຖືໄດ້ວ່າມີປະໂຫຍດຫຼາຍເວົ້າງ່າຍໆກໍຄືການສ້າງຖານລູກຄ້າ. ນອກຈາກຂາຍສິ້ນແລ້ວ ຂ້າພະເຈົ້າກໍຍັງໄດ້ຂາຍເຄື່ອງເສື້ອຜ້າແມ່ຍິງມືສອງນຳອີກ.

May be an image of 1 person and text

ການຂາຍໃນອອນລາຍ ທິບພາພອນ ຍັງໃຊ້ວິທີຂາຍແບບຖ່າຍທອດສົດ ຫຼື live ໃຫ້ລູກຄ້າໄດ້ເຫັນສິນຄ້າຕົວຈິງ ແລະ ບາງຄັ້ງກໍໃສ່ໃຫ້ລູກຄ້າເບິ່ງ ເພື່ອຈະງ່າຍໃນການຕັດສິນໃຈຊື້ ໂດຍອຸປະກອນທີ່ໃຊ້ໃນການເຮັດຖ່າຍທອດສົດ ແມ່ນຕ້ອງມີລະບົບອິນເຕີເນັດທີ່ໄວ, ມີໂທລະສັບສອງໜ່ວຍ ກໍຄືໜ່ວຍໜຶ່ງເອົາໄວ້ຖ່າຍທອດສົດ ແລະ ອີກໜ່ວຍໜຶ່ງເອົາໄວ້ແຊຣ໌ ແລະ ອ່ານຄອມເມັ້ນຕອບລູກຄ້າ ແລະ ທີ່ຂາດບໍ່ໄດ້ກໍຄືດອກໄຟທີ່ເອົາໄວ້ສ່ອງໃສ່ສິນຄ້າ ຫຼື ຕົວຂອງແມ່.

ດ້ານເຕັກນິກໃນເວລາຖ່າຍທອດສົດ ແມ່ຄ້າຕ້ອງເປັນຄົນທີ່ເວົ້າເກັ່ງ ແລະ ຕ້ອງກ້າທີ່ຈະເວົ້າຖ້າເປັນຄົນຕະລົກຍິ່ງເປັນການດີ ເພື່ອດຶງດູດໃຫ້ຄົນຢາກເຂົ້າມາເບິ່ງ, ຊື້ເຄື່ອງນໍາ ແລະ ເບິ່ງເຮົາຈົນຈົບການຖ່າຍທອດສົດ, ບາງຄັ້ງການຖ່າຍທອດສົດເຮົາກໍມີການແຈກຂອງລາງວັນ ແລະ ແຖມສິນຄ້ານໍາອີກ ຖ້າລູກຄ້າເຂົ້າມາເບິ່ງ ແລະ ແຊຣ໌ຊ່ວຍແມຄ້າແມ່ຄ້າຈະແຈກບັດຕື່ມເງິນໃຫ້ ເຊິ່ງເປັນວິທີທີ່ຂ້າພະເຈົ້າໃຊ້ໃນການຂາຍເຄື່ອງ ແລະ ປັດຈຸບັນມັນຊ່ວຍໃຫ້ການຂາຍເຄື່ອງໄດ້ ແລະ ມີກໍາໄລ 1 ລ້ານ ຫາ 2 ລ້ານກີບຕໍ່ເດືອນ ຫຼື ບາງເດືອນກໍໄດ້ຫຼາຍກວ່ານັ້ນ.

ພ້ອມດຽວກັນນີ້, ທ່ານ ນາງ ທິບພາພອນ ຈັນທະວົງ ໄດ້ຝາກເຖິງທ່ານໃດທີ່ຢາກຈະເລີ່ມຕົ້ນຂາຍເຄື່ອງອອນລາຍ ແມ່ນໃຫ້ອົດທົນເລີ່ມເຮັດຈາກສິ່ງນ້ອຍໆໄປກ່ອນ ເມື່ອເລີ່ມມີປະສົບການແລ້ວ ກໍຈຶ່ງຂະຫຍາຍຂຶ້ນຕາມຄວາມສາມາດທີ່ເຮັດໄດ້ ແລະ ເຊື່ອວ່າຖ້າມີຄວາມຕັ້ງໃຈ, ອົດທົນແລ້ວ ກໍຈະປະສົບຜົນສຳເລັດໄດ້.