ປະຊາຊົນ 3 ບ້ານໃນກຸ່ມດອນຄູນ ເມືອງວຽງຄໍາ ໄດ້ຮັບເຄື່ອງຊ່ວຍເຫຼືອຈາກອົງການກາແດງ ແຂວງຫຼວງພະບາງ

59

ເມື່ອບໍ່ດົນມານີ້ ອົງການກາແດງ ແຂວງຫຼວງພະບາງ ສົມທົບກັບຫ້ອງການແຮງງານ ແລະສະຫວັດດີການສັງຄົມເມືອງວຽງຄໍາ ໄດ້ໄປມອບເຄື່ອງໃຫ້ປະຊາຊົນຜູ້ທຸກຍາກ ຢູ່ບ້ານລ້ອງຫຍ້າ, ບ້ານໃໝ່ ແລະບ້ານນໍ້າມີ້ ກຸ່ມດອນຄູນ ເມືອງວຽງຄໍາ ມີ ທ່ານ ບຸນນາກ ເພັດສຸພັນ ຮອງຫົວໜ້າອົງການກາແດງລາວປະຈຳແຂວງ ພ້ອມດ້ວຍຜູ້ຕາງໜ້າຫ້ອງການແຮງງານ ແລະສະຫວັດດີການ-ສັງຄົມເມືອງ, ຄະນະພັດທະນາກຸ່ມບ້ານ ແລະປະຊາຊົນ 3 ບ້ານ ເຂົ້າຮ່ວມ.


ເຄື່ອງທີ່ນໍາໄປມອບຄັ້ງນີ້ ປະກອບມີ ເຄື່ອງນຸ່ງປະສົມ ຈໍານວນ 30 ຖົງ, ເກີບ ແລະເສື້ອກັນໜາວ ຈໍານວນ 10 ແກັດ ເພື່ອບັນເທົາທຸກແກ່ປະຊາຊົນຜູ້ທຸກຍາກ, ຄອບຄົວບໍ່ມີກໍາລັງແຮງງານ, ເຖົ້າແກ່, ພະນັກງານບໍານານ-ເສຍອົງຄະ ແລະຜູ້ທີ່ມີຄຸນງາມຄວາມດີ ທັງໝົດ 30 ຄອບຄົວ, ພົນລະເມືອງ 181 ຄົນ, ຍິງ 66 ຄົນ ໃນນັ້ນ ເຖົ້າແກ່ບໍານານ-ເສຍອົງຄະຈໍານວນ 45 ຄົນ, ຍິງ 5 ຄົນ.

ໂອກາດນີ້ ທ່ານ ຈັນເພັງ ພັນນະສີ ຫົວໜ້າຫ້ອງການແຮງງານ ແລະສະຫວັດດີການ-ສັງຄົມເມືອງ ໄດ້ກ່າວຄໍາຂອບໃຈຢ່າງສູງ ຕໍ່ອົງການກາແດງລາວ ແຂວງຫຼວງພະບາງ ທີ່ເຫັນໄດ້ຄວາມຫຍຸ້ງຍາກຂາດເຂີນ ຂອງປະຊາຊົນຢູ່ເມືອງວຽງຄໍາຕະຫຼອດມາ ພ້ອມທັງຂໍໃຫ້ສືບຕໍ່ຊ່ວຍເຫຼືອບັນເທົາທຸກແກ່ປະຊາຊົນຜູ້ທຸກຍາກ ຢູ່ພາຍໃນເມືອງວຽງຄໍາ ຕື່ມອີກ.