ບໍລິສັດ ອຳມະຕະ ຊີຕີ້ ລາວ ວາງສີລາລຶກ ໂຄງການພັດທະນາເມືອງທັນສະໄຫມ ແລະ ເປັນມິດຕໍ່ສິ່ງແວດລ້ອມ ຢູ່ນາເຕີຍ ແຂວງຫລວງນໍ້າທາ

66

ວັນທີບໍລິສັດ ອຳມະຕະ ຊີຕີ້ ລາວ ຈຳກັດ ຜູ້ດຽວ ໄດ້ວາງສີລາລຶກໂຄງການພັດ ທະນາເມືອງທັນສະໄຫມ ແລະ ເປັນມິດຕໍ່ສິ່ງແວດລ້ອມ ຢູ່ຈຸດນາເຕີຍ ເມືອງຫລວງນໍ້າທາ ແຂວງຫລວງນໍ້າທາ ໃນວັນທີ11 ມັງກອນ 2022 ໂດຍການເຂົ້າຮ່ວມຂອງ ທ່ານ ຄຳໄຫລ ສີປະເສີດ ເຈົ້າແຂວງໆຫລວງນໍ້າທາ, ທ່ານ ນາງ ຄຳຈັນ ວົງແສງບຸນ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ວະລົງ ຕັງປະພຶດກຸນ ອຳນວຍການບໍລິສັດ ອຳມະຕະ ຊີຕີ້ລາວ ຈຳກັດ ຜູ້ດຽວ, ມີບັນດາທ່ານແຂກຖືກເຊີນຈາກສູນກາງ-ທ້ອງຖິ່ນ, ພ້ອມທັງມີຜູ້ເຂົ້າຮ່ວມທາງອອນລາຍດ້ວຍລະບົບທາງໄກ.


ໂຄງການພັດທະນາເມືອງທັນສະໄຫມ ແລະ ເປັນມິດຕໍ່ສິ່ງແວດລ້ອມ ຢູ່ຈຸດນາເຕີຍ ເມືອງຫຼວງນໍ້າທາ ແຂວງຫລວງນໍ້າທາ ກໍແມ່ນໂຄງການຫນຶ່ງທີ່ລັດຖະບານ ສປປ ລາວ ໃຫ້ຄວາມສຳຄັນສູງ ແລະ ໃຫ້ກາຍເປັນໂຄງການຕົວແບບໃນການພັດທະນາໄປຕາມທິດສີຂຽວ ແລະ ຍືນຍົງ, ເປັນບ່ອນສ້າງຖານລາຍຮັບໃຫ້ແກ່ລັດຖະບານ, ສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນ ກໍຄືແຂວງຫລວງນໍ້າທາຫລາຍຂຶ້ນ ແລະ ເພື່ອເປັນການເສີມຂະຫຍາຍ ການຮ່ວມມືດ້ານການຄ້າ ແລະ ການລົງທຶນ ລະຫວ່າງ ສປປ ລາວ ແລະ ລາຊະອານາຈັກໄທ ໃຫ້ມີບາດກ້າວຂະຫຍາຍຕົວຍຶ່ງຂຶ້ນ ເຊິ່ງປະເທດລາວກໍແມ່ນປະເທດຫນຶ່ງທີ່ມີທ່າແຮງທາງດ້ານຊັບພະຍາກອນທຳມະຊາດ ທີ່ອຸດົມສົມບູນ ແລະ ເປັນຈຸດສູນໃນການເຊື່ອມໂຍງ ເຊື່ອມຈອດທາງດ້ານຄົມມະນາຄົມຂົນສົ່ງກັບບັນດາປະເທດໃນອະນຸພາກພື້ນ ແລະ ສາກົນ, ໃນການພັດທະນາເສດຖະກິດ-ສັງຄົມຂອງປະເທດໃຫ້ຂະຫຍາຍ ຕົວຢ່າງແຂງແຮງ ໂດຍສະເພາະການດຶງດູດການລົງທຶນຈາກພາຍໃນ ແລະ ຕ່າງປະເທດເຂົ້າມາພັດທະນາໂຄງການຕ່າງໆ ຕາມແລວເສດຖະກິດຕາເວັນອອກ-ຕາເວັນຕົກ ແລະ ແລວທາງເສດຖະກິດເຫນືອ-ໃຕ້.

ຍ້ອນເຫັນໄດ້ຄວາມສຳຄັນດັ່ງກ່າວ ລັດຖະບານ ສປປ ລາວ ຈິ່ງໄດ້ຕົກລົງເຊັນສັນຍາກັບບໍລິສັດ ອຳມະຕະຊີຕີ້ລາວຈຳກັດ ຜູ້ດຽວ ເຊິ່ງເປັນບໍລິສັດລູກຂອງກຸ່ມບໍລິສັດ ອຳມະຕະ ຄອບເປີເຣຊັນ ຈຳກັດ ມະຫາຊົນ ຈາກປະເທດໄທ ເພື່ອເຂົ້າມາລົງທຶນ ແລະ ພັດທະນາໂຄງການຢູ່ຈຸດນາເຕີຍ ເມືອງຫລວງນໍ້າທາ ແຂວງຫລວງນໍ້າທາ ເພື່ອສ້າງເປັນເຂດອຸດສາຫະກຳທີ່ສະອາດເປັນມິດຕໍ່ສິ່ງແວດລ້ອມ ໂດຍມີເນື້ອທີ່ດິນທັງຫມົດ 410 ເຮັກຕາ, ມີອາຍຸສຳປະທານ 50 ປີ ມູນຄ່າການລົງທຶນ70 ລ້ານໂດລາ

ທ່ານວິກົມ ກົມມະດິດ ປະທານກຳມະການບໍລິຫານ ບໍລິສັດ ອຳມະຕະ ຄອບເປີເຣຊັນ ຈຳກັດ ມະຫາຊົນ ໃຫ້ຮູ້ວ່າ: ການເປີດໂຄງການກໍ່ສ້າງໄລຍະແລກ ມີຄວາມໝາຍຄວາມສຳຄັນໃນເປົ້າໝາຍການລົງທຶນການພັດທະນາໂຄງການທັງໝົດໃນເນື້ອທີ່ 200 ກິໂລຕາແມັດ ໂດຍວາງງົບການລົງທຶນໄວ້1.000ລ້ານໂດລາສະຫະລັດ.


ໃນໂອກາດດັ່ງກ່າວ ທ່ານ ເຈົ້າແຂວງ ພ້ອມດ້ວຍປະທານຜູ້ແທນໃນພິທີໄດ້ພ້ອມກັນຕັດແຖບຜ້າ ແລະ ລັ່ນຄ້ອງ 9 ບາດ ເປີດພິທີຢ່າງເປັນທາງການ.