ອົງການ USAID ແລະ ກະຊວງສາທາລະນະສຸກເຢຍລະມັນ ຊ່ວຍເຫລືອລົດຕູ້ເຢັນສຳລັບຂົນວັກຊິນ ແລະອຸປະກອນສະໜັບສະໜູນວຽກງານການສັກວັກຊິນກັນພະຍາດ ໂຄວິດ-19 ຢູ່ ສປປ ລາວ

50

ຕາມຂ່າວວິທະຍຸແຫ່ງຊາດໃຫ້ນູ້ວ່າ: ຕອນບ່າຍວັນທີ 11 ມັງກອນ 2022 ທີ່ກະຊວງສາທາລະນະສຸກ ໄດ້ມີພີທີມອບ – ຮັບລົດຕູ້ເຢັນສຳລັບຂົນວັກຊິນ ແລະອຸປະກອນໄອທີໂດຍການຊ່ວຍເຫຼືອຂອງອົງການພັດທະນາສາກົນ ປະເທດສະຫະ ລັດອາເມລິກາ (USAID) ແລະກະຊວງສາທາລະນະສຸກເຢຍລະມັນ (BMG) ຜ່ານອົງການ ອະນາໄມໂລກ (WHO) ມູນຄ່າ 383.794ໂດລາ ໃຫ້ສູນສຸຂະພາບແມ່ ແລະເດັກ, ກະຊວງສາທາ ລະນະສຸກ (MOH), ອຸປະກອນດັ່ງກ່າວຈະຊ່ວຍໃຫ້ ສປປ ລາວ ສາມາດນຳໃຊ້ເຕັກໂນໂລຊີຂໍ້ມູນ ຂ່າວສານເພື່ອຂັບເຄື່ອນວຽກງານສັກຢາ ແລະຮັບປະກັນຄວາມຖືກຕ້ອງຂອງຂໍ້ມູນທົ່ວ ສ ປປ ລາວ ເພື່ອສະໜັບສະໜູນເປົ້າໝາຍຂອງ ສ ປປ ລາວ ທີ່ຈະສັກວັກຊີນໃຫ້ປະຊາກອນໃຫ້ໄດ້ 80%.


ພິທີຄັ້ງນີ້ ໂດຍການເຂົ້າຮ່ວມກ່າວຮັບຂອງທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ແລະກ່າວມອບ ໂດຍທ່ານນາງ Annette Knobloch, ເອກອັກ ຄະລັດຖະທູດ ເຢຍລະມັນປະຈຳ ສ ປປ ລາວ, ທ່ານນາງຈອຍມິຊິໂກະ ຊາກຸໄຣ, ຮອງທູດ ແຫ່ງສະຫະລັດອາເມລິກາປະຈໍາ ສ ປປລາວ; ທ່ານຄູເລິນຮິວ ຮອງຜູ້ຕາງໜ້າອົງການ USAID ປະຈຳລາວ ແລະທ່ານ ດຣ ຢູລີ, ຮັກສາການແທນຜູ້ຕາງໜ້າອົງການອະນາໄມໂລກປະຈຳ ສປປ ລາວ ມີຜູ້ຕາງໜ້າກະຊວງການຕ່າງປະເທດ, ກະຊວງສາທາລະນະສຸກ ແລະພະນັກງານທີ່ກ່ຽວຂ້ອງເຂົ້າຮ່ວມ.

ອຸປະກອນດັ່ງກ່າວຊ່ວຍຊຸກຍູ້ສູນສຸຂະພາບແມ່ ແລະເດັກ, ກົມອະນາໄມ ແລະສົ່ງເສີມສຸຂະພາບ ແລະກົມແຜນການແລະການຮ່ວມມື, ໃນການພັດທະນາລະບົບໃໝ່ເພື່ອນັດໝາຍ, ລົງທະບຽນ ລ່ວງໜ້າ, ແລະບັນທຶກຂໍ້ມູນການສັກວັກຊີນລະດັບບຸກຄົນ ແລະສະໜອງບັດວັກຊີນທີ່ນຳໃຊ້ QR code ຢູ່ຈຸດບໍລິການໃຫ້ວັກຊີນ ແລະໂຮງໝໍສູນກາງ 5 ແຫ່ງ. ດ້ວຍຄວາມສາມາດດ້ານໄອທີທີ່ເພີ່ມຂຶ້ນ, ລະບົບດັ່ງກ່າວຈະຂະຫຍາຍໄປສູ່ບັນດາໂຮງໝໍແຂວງ ແລະໂຮງໝໍເມືອງ.


ທຶນການຊ່ວຍເຫຼືອ ຄັ້ງນີ້ ຄືອົງການ USAID ມູນຄ່າ 197.633 ໂດລາ, ກະຊວງສາທາລະນະສຸກເຢຍລະມັນພາຍໃຕ້ທຶນການຊ່ວຍເຫຼືອຈາກ BMG ມູນຄ່າ 186.161 ໂດລາໂດຍອົງການWHO ຈະເປັນຜູ້ຮັບຜິດຊອບໃນການຈັດຊື້ ແລະຂົນສົ່ງເຄື່ອງຊ່ວຍເຫຼືອຄັ້ງນີ້. ເພື່ອໃຫ້ການບໍລິການວັກຊີນ ແບບເຄື່ອນທີ່ຢູ່ນະຄອນຫຼວງວຽງຈັນ.

ການສະໜັບສະໜູນດັ່ງກ່າວຈະຊ່ວຍໃຫ້ລັດຖະບານລາວສາມາດສະໜອງການບໍລິການວັກຊີນໃຫ້ປະຊາຊົນໄດ້ໄວ ແລະສະດວກ, ມີປະສິດທິພາບກວ່າເກົ່າລວມທັງການບັນທຶກການສັກວັກຊີນ ທີ່ຖືກຕ້ອງ ຊັດເຈນຂຶ້ນ. ພອມກັນນີ້ກໍຍັງຊ່ວຍຫຼຸດຜ່ອນຄວາມແອອັດຢູ່ບ່ອນໃຫ້ບໍລິການວັກຊີນ ແລະຫຼີກລ່ຽງ ການສະໜອງວັກຊີນບໍ່ພຽງພໍ ແລະວັກຊີນທີ່ເກີນຢູ່ແຕ່ສະຖານທີ່ໃຫ້ບໍລິການ.


ທ່ານບຸນແຝງ ພູມມະໄລສິດໄດ້ຕາງໜ້າໃຫ້ກະຊວງສາທາລະນະສຸກສະແດງຄວາມ ຂອບໃຈຢ່າງສູງມາຍັງອົງການUSAID, ກະຊວງສາທາລະນະສຸກຂອງເຢຍລະມັນແລະອົງການອະນາໄມໂລກທີ່ໄດ້ປະກອບສ່ວນຊ່ວຍເຫຼືອວຽກງານສັກຢາກກັນພະຍາດ ແລະເຫັນວ່າລົດຕູ້ເຢັນຂົນສົ່ງອຸປະກອນໄອທີດັ່ງກ່າວນີ້ ຈະຊ່ວຍຊຸກຍູ້ສົ່ງເສີມສູນສຸຂະພາບແມ່ ແລະເດັກ, ໂຮງໝໍສູນກາງ 5 ແຫ່ງ ແລະໂຮງໝໍເມືອງ 9 ແຫ່ງໃນນະຄອນຫຼວງວຽງຈັນໃຫ້ສາມາດປັບປຸງຄຸນະພາບດ້ານຂໍ້ມູນຂ່າວສານ, ປັບປຸງຂະບວນການປ້ອນຂໍ້ມູນ, ການລາຍງານໃຫ້ທັນເວລາແລະໄວຂຶ້ນໂດຍລະບົບທີ່ຫຼຸດຜ່ອນການນຳໃຊ້ເອກະສານ. ພິທີການມອບ-ຮັບ ຄັ້ງນີ້ແມ່ນສ່ວນຫນຶ່ງຂອງຄວາມພະຍາຍາມຂອງພວກເຮົາທີ່ນໍາໃຊ້ເຕັກໂນໂລຢີເພື່ອຫຼຸດຜ່ອນ ພາລະຂອງແພດໝໍທີ່ເຄັ່ງຕຶງ ແລະປັບປຸງການຈັດສົ່ງວັກຊີນ.