ສປປ ລາວ ໄດ້ຮັບວັກຊິນ Astra Zeneca ເພີ່ມຈາກປະເທດໂປແລນ ຈຳນວນ 501.600 ໂດສ

59

ກະຊວງສາທາລະນະສຸກ 7 ມັງກອນ 2022 ໄດ້ພິທີມອບ-ຮັບວັກຊິນ ຈັດຂື້ນທີ່ກະຊວງສາທາລະນະສຸກ. ໂດຍກ່າວຮັບຂອງທ່ານ ດຣ. ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ແລະ ກ່າວມອບຂອງທ່ານ ນາງ ໄບບ້າ ຊາລີນາ ອຸປະທູດແຫ່ງສະຫະພາບເອີຮົບ ປະຈຳ ສປປ ລາວ. ມີຕາງໜ້າຈາກກະຊວງການຕ່າງປະເທດ, ກະຊວງສາທາລະນະສຸກ ແລະ ພະນັກງານຂອງສະຫະພາບເອີຮົບເຂົ້າຮ່ວມ.


ໃນພິທີ ທ່ານ ລັດຖະມົນຕີກະຊວງສາທາລະນະສຸກໄດ້ກ່າວສະແດງຄວາມຍິນດີ ແລະ ຂອບໃຈ ຕໍ່ລັດຖະບານໂປແລນ ຕໍ່ກັບການປະກອບສ່ວນຢ່າງຕໍ່ເນື່ອງ ເຊິ່ງຈະເປັນການປະກອບສ່ວນຢ່າງໃຫຍ່ຫຼວງໃຫ້ລາວໃນເປົ້າໝາຍຂອງປະເທດທີ່ຈະສັກວັກຊິນໃຫ້ກວມໄດ້ຢ່າງໜ້ອຍ 70% ຂອງຈຳນວນປະຊາກອນທັງໝົດ.

ຂະນະທີ່ ອຸປະທູດແຫ່ງສະຫະພາບເອີລົບ ປະຈຳ ສປປ ລາວ ໄດ້ກ່າວວ່າ ວັກຊິນເຫຼົ່ານີ້ແມ່ນຈະໄດ້ນຳໃຊ້ເປັນຕົ້ນເພື່ອໃຫ້ການປ້ອງກັນແກ່ຜູ້ທີ່ມີຄວາມສ່ຽງສູງຕໍ່ການຕິດເຊື້ອພະຍາດໂຄວິດ-19 ຂັ້ນຮ້າຍແຮງແຕ່ຍັງບໍ່ທັນໄດ້ຮັບວັກຊິນຄົບເຂັມເທື່ອ. ກຸ່ມບູລິມະສິດສຳລັບການສັກວັກຊິນກັນພະຍາດໂຄວິດ-19 ແມ່ນປະກອບມີ: ພະນັກງານສາທາລະນະສຸກແຖວໜ້າ, ຜູ້ສູງອາຍຸ 60 ປີ ຂື້ນໄປ, ຄົນທີ່ມີພະຍາດປະຈຳຕົວ, ແມ່ຍິງຖືພາ ແລະ ບຸກຄະລາກອນທີ່ສຳຄັນ.

ທີ່ມາ:ສູນຂ່າວສານການແພດສຸຂະສຶກສາ