ນັບແຕ່ມື້ເປີດບໍລິການ ຕົວເລກຜູ້ຂີ່ລົດໄຟລາວ-ຈີນ ລວມ1ເດືອນມີ 48.200 ເທື່ອຄົນ ຫລື ສະເລ່ຍ1.554 ຄົນ/ມື້

75

ສຳລັບລົດໄຟລາວ-ຈີນ ຕົກມາຮອດມາຮອດມື້ນີ້ 4 ມັງກອນ 2022 ແມ່ນຄົບກຳນົດໃນການເປີດໃຫ້ບໍລິການຢ່າງເປັນທາງການ 1 ເດືອນເຕັມ ເຊິ່ງຕະຫຼອດໄລຍະທີ່ຜ່ານມາຫຼັງເປີດໃຊ້ແມ່ນເປັນທີ່ນິຍົມ ແລະ ຕອບສະໜອງຄວາມຕ້ອງການຂອງສັງຄົມຢ່າງດີ ໂດຍສະເພາະຜູ້ທີ່ຕ້ອງການເດີນທາງໄປບັນດາແຂວງພາກເໜືອທີ່ມີທາງລົດໄຟຜ່ານ ແລະຄົນເໜືອຢາກລົງມານະຄອນຫຼວງວຽງຈັນ.

ໃນນັ້ນ ເພື່ອຕອບສະໜອງຄວາມຕ້ອງການທີ່ເພີ່ມຂຶ້ນໄລຍະປີໃໝ່ສາກົນ ບໍລິສັດທາງລົດໄຟລາວ-ຈີນໄດ້ ຕົກລົງເພີ່ມຖ້ຽວບໍລິການພິເສດ ອີກ 1 ຖ້ຽວ ແລະກໍ່ເປັນໄປຕາມຄາດ, ພາຍຫຼັງລົດໄຟລາວ-ຈີນ ໄດ້ເພີ່ມຖ້ຽວບໍລິການອີກ 1 ຖ້ຽວຈາກນະຄອນຫຼວງວຽງຈັນ-ບໍ່ເຕັນ ເນື່ອງໃນໂອກາດສົ່ງທ້າຍປີເກົ່າ ຕ້ອນຮັບປີໃໝ່ ເຮັດໃຫ້ມາຮອດວັນທີ 3 ມັງກອນ 2022, ລົດໄຟລາວ-ຈີນ ສາມາດບໍລິການຜູ້ໂດຍສານທັງໝົດ 67 ຄູ່ ບັນຈຸຜູ້ໂດຍສານລວມທັງໝົດ 48.200 ຄົນ (ນັບແຕ່ມື້ເປີດບໍລິການຢ່າງເປັນທາງການ) ສະເລ່ຍແລ້ວ 1.554 ຄົນຕໍ່ມື້.

ອີງຕາມຂໍ້ມູນຂອງເຈົ້າໜ້າທີ່ລົດໄຟແຈ້ງໃນວັນທີ 3 ມັງກອນ 2022 ວ່າ: ທາງລົດໄຟລາວ-ຈີນ ຍັງບໍລິການຂົນສົ່ງສິນຄ້າໄດ້ທັງໝົດ 52 ຄູ່ ສາມາດສົ່ງອອກສິນຄ້າທັງໝົດ 50.800 ໂຕນ ເຊິ່ງສະແດງໃຫ້ເຫັນວ່າທັງການບໍລິການຜູ້ໂດຍສານ ແລະ ສິນຄ້າລ້ວນແຕ່ເປັນຂະບວນຟົດຟື້ນ ມີປະສິດທິຜົນດີ.

ທີ່ມາ: ຊີອາໄອ